ស.រ.អា. និង ចិន កំពុងច្រានពួកយោធារុស្ស៊ី ចេញពីតំបន់អាស៊ីកណ្តាល
ការដែលទីក្រុង Douchanbé កិកកុកក្នុងរឿងពន្យារវត្តមាន “មូលដ្ឋានយោធានៃកងទ័ពរុស្ស៊ីទី២០១” នៅតាហ្ស៊ីគីស្ថាន គឺមកពីស.រ.អា. និង ចិន ចេះតែសកម្មក្នុងប្រទេសនោះ ហេតុដែលគំរាមទីក្រុងម៉ូស្គូ ឲ្យបាត់បង់ឥទ្ធិពលខ្លួន នៅតំបន់អាស៊ីកណ្តាល។ សេចក្តីនេះ ទើបចុះផ្សាយដោយកាសែតរុស្ស៊ី “Kommersant”។
ចុះផ្សាយនៅថ្ងៃ៖
ស្តាប់ - ០២:៤១
តាមកាសែតរុស្ស៊ីនេះ ៖ ស.រ.អា.កំពុងធ្វើកិច្ចចរចាជាមួយទីក្រុង Douchanbé ដើម្បីផ្ទេរទៅឲ្យតាហ្ស៊ីគីស្ថាន នូវគ្រឿងបច្ចេកទេសយោធាមួយភាគ ពេលដែលទ័ពអាមេរិកនឹងដកចេញពីអាហ្វហ្កានីស្ថានទៅវិញ។
ចំណែក ប្រធានាធិបតីតាហ្ស៊ីគីស្ថាន លោក Emomali Rakhmon ក្នុងដំណើរទស្សនកិច្ច ពេលថ្មីៗ នៅប្រទេសចិន បានទទួលពីក្រុងប៉េកាំង នូវឥណទានក្នុងទឹកប្រាក់ប្រមាណ២.០០០លានដុល្លារអាមេរិក ទាល់តែញ៉ាំងឲ្យគាត់ចាត់ទុកទំនាក់ទំនងជាមួយសាធារណរដ្ឋប្រជាមានិតចិនថាជា “អាទិភាពនៃនយោបាយក្រៅប្រទេសរបស់តាហ្ស៊ីគីស្ថាន”។
មិនតែប៉ុណ្ណោះ គេនៅចងចាំថា ក្នុងឆ្នាំទៅមិញ ទីក្រុង Douchanbé បានចុះជាមួយប៉េកាំង គឺកិច្ចព្រមព្រៀង ស្តីអំពីការដោះស្រាយវិវាទដែនដីបានរួចរាល់ហើយ និងស្តីអំពីការកំណត់ខ្សែព្រំប្រទល់ រវាងប្រទេសទាំងពីរ ដោយតាហ្ស៊ីគីស្ថានបានប្រគល់ផ្ទៃដី១.១២២គ.ម.២ ទៅឲ្យចិន-ផ្ទៃដីនេះដែលស្ថិតនៅក្នុងភ្នំ គឺស្មើនឹង ១% នៃដែនដីប្រទេសតាហ្ស៊ីគីស្ថានផ្ទាល់។
កាសែតរុស្ស៊ី “Kommersant” លើកឡើងតមកទៀត ៖ នាពេលចុងក្រោយ គេសង្កេតឃើញថា តាហ្ស៊ីគីស្ថានស្រាប់តែធ្វើសហប្រតិបត្តិការរស់រវើកមែនទែន ជាមួយឥណ្ឌា និងប្រទេសនានា នៃតំបន់ឈូងសមុទ្រ Persique។ អស់ទាំងនេះ គឺដកហូតពីម៉ូស្គូ នូវទំនាក់ទំនងផ្តាច់មុខជាមួយតាហ្ស៊ីគីស្ថាន និង តួនាទីរបស់ម៉ូស្គូក្នុងឋានៈជា “បងធំ”។
តបនឹងការចុះផ្សាយនៃកាសែត“Kommersant” ដែលថា តាហ្ស៊ីគីស្ថានចង់ឲ្យរុស្ស៊ី បង់ឲ្យខ្លួនក្នុង១ឆ្នាំៗ ២៥០-៣០០លានដុល្លារ ចំពោះការជួលប្រើប្រាស់ “មូលដ្ឋានយោធានៃកងទ័ពរុស្ស៊ីទី ២០១” គឺមានប្រតិកម្មទៅហើយពីទីក្រុង Douchanbé ដែលដោះសារថា ”លុយមិនសំខាន់ទេ” សំខាន់ គឺឲ្យរុស្ស៊ីចេះគន់គិតដល់ “ផលប្រយោជន៍ជាតិ” របស់តាហ្ស៊ីគីស្ថាន។ ថ្លែងក្នុងសន្និសីទកាសែត នៅក្រុង Douchanbé ជំនួយការប្រធានាធិបតីតាហ្ស៊ីគីស្ថាន លោក Saifullo Safarov ក៏សុំឲ្យរុស្ស៊ី បន្ទាបយ៉ាងបង្កួរទៅ ពន្ធដែលហូតពីប្រេងកាតលក់ទៅឲ្យតាហ្ស៊ីគីស្ថាន។
គួរនិយាយថា “មូលដ្ឋានយោធានៃកងទ័ពរុស្ស៊ី ទី ២០១” សព្វថ្ងៃ ជាមូលដ្ឋានទ័ពជើងគោក ធំបំផុតរបស់រុស្ស៊ី នៅក្រៅប្រទេស ដោយមានយោធារុស្ស៊ីឈរជើងចំនួន ៧.០០០នាក់។
រុស្ស៊ីវត្តមាននៅទីនោះ តាំងពីឆ្នាំ២០០៤មក ដោយនឹងអស់សុពលភាពនៅឆ្នាំ ២០១៤ខាងមុខ។
ទោះបីកិច្ចចរចា ដើម្បីពន្យារវត្តមានរុស្ស៊ីនៅទីនោះ ប្រព្រឹត្តទៅតាំងពីឆ្នាំ២០០៨មកក្តី ក៏ពី១លើកទៅ១លើក ភាគីតាហ្ស៊ីគីស្ថាន ចេះតែរុញច្រានចេញមកនូវល័ក្ខខ័ណ្ឌ មិនចេះចប់ សរុបទៅ មាន២០ល័ក្ខខ័ណ្ឌ ដែលរុស្ស៊ីមិនអាចទទួលយកបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ