អាមេរិកពឹងរុស្ស៊ីឲ្យដាស់សតិអ៊ីរ៉ង់
តាមកាសែតក្រុងម៉ូស្គូ Kommersant លេខថ្ងៃទី១៤មីនានេះ សំណូមពរដែលមានត្រូវបានលោកស្រីរដ្ឋមន្ត្រីការបរទេសអាមេរិក Hillary Clinton ធ្វើទៅកាន់សមភាគីរុស្ស៊ី លោក Serguei Lavrov ក្នុងជំនួបទ្វេភាគីនៅក្រុងញីវយ៉កបន្ទាប់ពីសម័យប្រជុំនៃក្រុមប្រឹក្សាសន្តិសុខ អ.ស.ប. ថ្ងៃទី១២មីនាជុំវិញស្ថានការណ៍នៅប្រទេសស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
ខ្លឹមសារសំណូមពរអាមេរិកគឺសុំឲ្យរុស្ស៊ីប្រាប់ទៅថ្នាក់ដឹកនាំអ៊ីរ៉ង់ថា សម្រាប់ពួកគេខែមេសាខាងមុខជាឱកាសចុងក្រោយ ដើម្បីគេចឲ្យផុតពីការវាយប្រហារដោយអាមេរិកនិងអ៊ីស្រាអែលទៅលើអ៊ីរ៉ង់។ ពិតជាក្នុងខែមេសានោះដែលត្រូវប្រព្រឹត្តទៅកិច្ចចរចារវាងអ៊ីរ៉ង់និង៦ អន្តរការីអន្តរជាតិ ពោលគឺ៥ប្រទេសសមាជិកអចិន្ត្រៃយ៍នៃក្រុមប្រឹក្សាសន្តិសុខអ.ស.ប. បានន័យថារុស្ស៊ី ចិន ស.រ.អា បារាំង អង់គ្លេស ព្រមទាំងអាល្លឺម៉ង់តាងនាមឲ្យសហភាពអឺរ៉ុប។
តើលទ្ធផលយ៉ាងណាៗនៃកិច្ចចរចានេះ គឺអាស្រ័យនឹងឥរិយាបថប្រទេសអ៊ីរ៉ង់តែម្តង។ ចំណែកប្រធានបទនៃកិច្ចចរចា គឺអំពី ៖
- កម្មវិធីនុយក្លេអ៊ែររបស់អ៊ីរ៉ង់និងលទ្ធភាពអ៊ីរ៉ង់ប្រើកម្មវិធីនេះសម្រាប់គោលដៅយោធា។
- បញ្ហាអនុញ្ញាតឲ្យពួកអធិការនៃ”ទីភ្នាក់ងារអន្តរជាតិខាងថាមពលបរមាណូ” AIEA ទៅពិនិត្យមើលដោយផ្ទាល់ភ្នែកមជ្ឈមណ្ឌលនុយក្លេអ៊ែរយោធារបស់អ៊ីរ៉ង់។
ទើបមួយសប្តាហ៍មុនសោះ រដ្ឋមន្ត្រីការពារជាតិអាមេរិក លោក Leon Panetta ថ្លែងថា អាមេរិកអាចធ្វើសកម្មភាពយោធាទល់នឹងអ៊ីរ៉ង់ ប្រសិនបើវិធានការផ្លូវទូតមិនអាចរាំងរាឲ្យអ៊ីរ៉ង់ឈប់បង្កើតជាអាវុធបរមាណូ។
ចំណែកលោកនាយករដ្ឋមន្ត្រីអ៊ីស្រាអែល Netanyahou នាកិច្ចចរចា នៅក្រុងវ៉ាស៊ីនតោនថ្ងៃទី៥មីនាថែមទាំងបានពញ្ញាក់ស្មារតីលោកប្រធានាធិបតីអាមេរិក Obama ថា ការគាំទ្រដល់ផែនការអ៊ីស្រាអែលវាយប្រហារថ្ងៃមុខទៅលើអ៊ីរ៉ង់គឺនឹងញ៉ាំងបណ្តាជន Juif រាប់លាននាក់ដែលរស់នៅអាមេរិកឲ្យបោះឆ្នោតឲ្យលោក Obama ពុំខាន។
ស្របនឹងការស្ទង់មតិធ្វើដោយ Reuters/ Ipsos ៖ប្រជាជនអាមេរិកភាគច្រើនដល់ទៅ ៥៦%គាំទ្រដល់ការវាយប្រហាររបស់កងទ័ពអាមេរិកទៅលើអ៊ីរ៉ង់។ ជំទាស់គឺតែ៣៩%ប៉ុណ្ណោះ។ នៅមានពលរដ្ឋអាមេរិក៦២%ទៀតពេញចិត្តនឹងការគាំទ្រពីខាងរដ្ឋាភិបាលវ៉ាស៊ីនតោនក្នុងករណីបើអ៊ីស្រាអែលវាយប្រហារមែនទៅលើអ៊ីរ៉ង់។
ចំណែករុស្ស៊ីដែលចង់បានសន្តិភាពក៏កំពុងត្រៀមលក្ខណៈសម្រាប់សង្គ្រាមនោះដែរដ្បិតតាមយោបល់ទីក្រុងម៉ូស្គូគឺពិបាកចៀសឲ្យផុត។ តាមការប្រមាណឃើញរបស់រុស្ស៊ីសង្គ្រាមនៅអ៊ីរ៉ង់នឹងបង្កឡើងជាចរន្តជនភៀសខ្លួនយ៉ាងច្រើនពីអ៊ីរ៉ង់ចូលក្នុងប្រទេសAzerbaidjan នៅជិតខាងរួចពីទីនោះគឺនឹងហូរចូលមកក្នុងប្រទេសរុស្ស៊ីតែម្តង។ ជាការកត់សម្គាល់ពីក្នុងចំណោមបណ្តាជនអ៊ីរ៉ង់ជាង៧០លាននាក់ ២០លាននាក់ មានកំណើតជាជាតិ Azerbaidjan៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ