អាមេរិកដកបុគ្គលិកខ្លួនចេញពីកុងស៊ុលក្រុង Lahore នៅប៉ាគីស្ថាន
នៅថ្ងៃសុក្រនេះ ក្រសួងការបរទេសអាមេរិកបានប្រកាសថា បានដកបុគ្គលិកការងារខ្លួននានា ចេញពីកុងស៊ុលក្រុង Lahore នៅភាគខាងកើតប៉ាគីស្ថាន។ ក្រុងវ៉ាស៊ីនតោនបានប្រាប់ថា បានទទួលព័ត៌មានទាក់ទងការគំរាមកំហែងកុងស៊ុលខ្លួននៅក្រុង ឡាហr។ ដោយឡែក អាមេរិកដកតែបុគ្គលិកបំរើការងារដែលមិនសូវសំខាន់ប៉ុណ្ណោះ។ ការដកបុគ្គលិកការងារនេះ ធ្វើឡើងនៅពេលដែលប៉ាគីស្ថាន កំពុងប្រារព្ធពិធីបិទបញ្ចប់បុណ្យសាសនារ៉ាម៉ាដង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៩
នៅថ្ងៃព្រហស្បតិ៍ម្សិលមិញ ក្រសួងការបរទេសអាមេរិកបានបញ្ជាអោយបុគ្គលិកការងារដែលមិនសូវសំខាន់នានារបស់ខ្លួន អោយចាកចេញពីកុងស៊ុល នៅក្រុងឡាហរ ស្ថិតនៅភាគខាងកើតប្រទេសប៉ាគីស្ថាន។ ការដកបុគ្គលិកនេះ ធ្វើឡើងបន្ទាប់ពីអាមេរិកបានទទួលព័ត៌មានជាក់លាក់ផ្សេងៗទាក់ទងការគំរាមកំហែងកុងស៊ុលក្រុងឡាហរ ។
អាមេរិកក៏បានក្រើនរំលឹកប្រជាជនខ្លួនមិនអោយធ្វើដំណើរទៅប៉ាគីស្ថានផងដែរ ប្រសិនគ្មានករណីចាំបាច់។ ប៉ាគីស្ថានជាប្រទេសសំបូរដោយអំពើភេរវកម្ម ហើយក៏ជាជរំនៃក្រុមឧទ្ទាមក្នុងស្រុកនិងក្រៅស្រុក ព្រមទាំងក្រុមប្រដាប់អាវុធអ៊ីស្លាមដែលការពារនយោបាយក្រុមអាល់កៃដាផងដែរ។ ប៉ុន្មានថ្ងៃមកនេះ ស្ថានទូតនិងកុងស៊ុលអាមេរិកជាង២០កន្លែងផ្សេងទៀត នៅមជ្ឈិមបូព៌ា និងអាហ្វ្រិក បានបិទទ្វារ ដើម្បីការពារសុវត្ថិភាពសន្តិសុខពីគំរោងអំពើភេរវកម្មក្រុមអាល់កៃដា។
ការដកបុគ្គលិកអាមេរិក នៅកុងស៊ុលក្រុងឡាហរ ធ្វើឡើងនៅពេលដែលប៉ាគីស្ថាន កំពុងរៀបចំពិធីបិទបញ្ចប់បុណ្យសាសនារ៉ាម៉ាដង់។ នៅរដ្ឋធានីអ៊ីស្លាមម៉ាបាដ និងបណ្តាក្រុងដទៃទៀត ប៉ូលិសបានពង្រឹងសន្តិសុខខ្ពស់ ដើម្បីចៀសវាងអំពើភេរវកម្មដែលអាចកើតឡើង នៅចុងសប្តាហ៍នេះ។ កាលពីម្សិលមិញ ក្រុមតាលីបង់បានបង្កអំពើភេរវកម្មបំផ្ទុះគ្រាប់បែកក្នុងពិធីបុណ្យសពប៉ូលិសមួយរូប បណ្តាលអោយមានមនុស្សស្លាប់៣០នាក់។ ហើយនៅថ្ងៃសុក្រនេះ ជនប្រដាប់អាវុធនានា បានបាញ់រះលើរថយន្តអ្នកនយោបាយមួយរូប បណ្តាលអោយស្លាប់មនុស្ស៩នាក់។
នៅថ្ងៃបញ្ចប់បុណ្យរ៉ាម៉ាដង់នេះ អាមេរិកបានបិទទ្វារ ស្ថានទូតនិងកុងស៊ុលខ្លួននានានៅប៉ាគីស្ថាន ហើយនឹងបើកទ្វារវិញ នៅថ្ងៃចន្ទ។ ដោយឡែក កុងស៊ុលក្រុងឡាហរ ប្រហែលជាអាចបន្តបិទទ្វារនៅសប្តាហ៍ក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ