អធិករណ៍នៅប្រទេសស៊ីរីអាចឆេះរាលដាលគ្មានទីបញ្ចប់
គឺអំពីគ្រោះថ្នាក់នេះដែលលោកប្រធានាធិបតីរុស្ស៊ី ពូទីនបានថ្លែងក្នុងសន្និសីទកាសែតល្ងាចម្សិលមិញបូកសរុបតុល្យការនៃកិច្ចចរចារបស់គាត់ជាមួយលោក នាយករដ្ឋមន្ត្រីអ៊ីតាលី Mario Monti នៅឯបុរីរមណីយដ្ឋាន Sotchi នៅមាត់សមុទ្រខ្មៅ។
ចុះផ្សាយនៅថ្ងៃ៖
ស្តាប់ - ០២:១៥
តាមប្រសាសន៍លោកពូទីន ការផ្តួលលោកប្រធានាធិបតីស៊ីរី Bachar-al-Assad ពីអំណាច ដោយមិនមែនតាមផ្លូវរដ្ឋធម្មនុញ្ញ គឺនឹងនាំឲ្យសង្គ្រាមស៊ីវិលនៅស៊ីរី ចេះតែបន្តឆេះ រាលដាលគ្មានទីបញ្ចប់។ ក្នុងករណីផ្តួលនោះ ភាគីប្រឆាំងនិងថ្នាក់ដឹកនាំនៅស៊ីរីគ្រាន់តែប្តូរកន្លែងគ្នាប៉ុណ្ណោះ ចំណែកឯ សង្គ្រាមរវាងភាគីបដិបក្សនោះ នៅតែបន្តទៅ មិនដឹងអង្កាល់ណាអាចចប់ទេ។
ប្រមុខរដ្ឋរុស្ស៊ីសង្កត់ធ្ងន់ថា ទីក្រុងម៉ូស្គូមិនចង់ឃើញស្ថានការណ៍នៅស៊ីរី វិវឌ្ឍតាមទិសដ៏សែនបង្ហូរឈាមឡើយ។ លោកពូទីន ក៏ស្នើមកនូវផែនការជាសណ្តាប់ធ្នាប់សម្រាប់ដោះស្រាយវិបត្តិនៅស៊ីរី ក្នុងន័យថា
ទី១- គឺទាំងសងខាងត្រូវបញ្ឈប់អំពើហិង្សា។
ទី២- គេត្រូវធ្វើកិច្ចចរចានឹងគ្នារកវិធីដោះស្រាយ។
ទី៣- កំណត់គ្រឹះមូលដ្ឋានធម្មនុញ្ញ សម្រាប់អនាគតសង្គមស៊ីរី។ លុះបន្ទាប់មក ទើបធ្វើការផ្លាស់ប្តូររចនាសម្ព័ន្ធ។ បើដំណើរការផ្ទុយពីរបៀរបបនេះ គឺនឹងនាំមកនូវភាពច្របូកច្របល់។
តាមលោកពូទីន ការព្រមព្រៀងគ្នាដែលមានសម្រេចបាន ក្នុងក្រុមប្រឹក្សាសន្តិសុខអ.ស.ប. ខាងពន្យារអាណត្តិបេសកកម្មពួកអ្នកសង្កេតការរបស់អ.ស.ប. នៅប្រទេសស៊ីរី គឺសឲ្យឃើញថា មានមែន លទ្ធភាពសម្រាប់រៀបរយកិច្ចសហប្រតិបត្តិការស្ថាបនា ជុំវិញបញ្ហាស៊ីរី ហើយគាត់អំពាំវនាវឲ្យជះឥទ្ធិពល លើគ្រប់តែភាគី ដែលជាប់ក្នុងទំនាស់នៅស៊ីរី។
លោកនាយករដ្ឋមន្ត្រីអ៊ីតាលី Mario Monti ពីចំណែកខ្លួន ថ្លែងថា គាត់យល់ពិតណាស់ អំពីក្តីព្រួយបារម្ភរបស់ម៉ូស្គូ ចំពោះបំណងពួកប្រទេសខាងលិច ក្នុងគម្រោងនៃសេចក្តីសម្រេចរបស់គេ ដាក់ទៅក្រុមប្រឹក្សាសន្តិសុខ អ.ស.ប.ប្រកបដោយលទ្ធភាពយោងទៅលើមាត្រាទី៧ នៃលក្ខន្តិកៈ អ.ស.ប. ដែលអាចបើកផ្លូវឲ្យមានអន្តរាគមន៍តាមផ្លូវកម្លាំងអាវុធជាគំនាបលើទីក្រុងដាម៉ាស។
តាមលោក Mario Monti នៅពីមុខភាពប្រុងប្រយ័ត្ននេះរបស់រុស្ស៊ី ក៏មានដែរ ហានិភ័យ ដែលថា បើអ.ស.ប. មិនអនុម័តសេចក្តីសម្រេចសមស្របទេ នោះគេអាចក្តាប់លែងបានស្ថានការណ៍នៅស៊ីរី ហើយគេមុខជាពិបាកជាប់ដៃរវល់នឹងអ្វីៗដែលប្រព្រឹត្តទៅ នៅទីនោះ ក្រោយពីរដ្ឋាភិបាលលោក អាស្សាដធ្លាក់ពីអំណាចទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ