ប្រជាជនសហគមន៍ព្រៃឡង់ដើរចូលក្នុងព្រៃដើម្បីត្រួតពិនិត្យការកាប់ព្រៃឈើអនាធិបតេយ្យ
តំណាងសហគមន៍ព្រៃឡង់ជាច្រើនរយនាក់បានធ្វើដំណើរពីខេត្ត៤ផ្សេងៗគ្នាចូលក្នុងតំបន់ព្រៃឡង់ ដើម្បីត្រួតពិនិត្យការកាប់ព្រៃឈើខុសច្បាប់។ ព្រៃឡង់មានទំហំ៤០ម៉ឺនហិកតាគ្របដណ្តប់ខេត្ត៤ គឺខេត្តកំពង់ធំ ក្រចេះ ស្ទឹងត្រែងនិងព្រះវិហារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
ធ្វើដំណើរពីខេត្ត៤ផ្សេងគ្នាដោយថ្មើរជើង តំណាងសហគមន៍ព្រៃឡង់ជាច្រើនរយនាក់នឹងជួបជុំគ្នានៅចំណុចដំណាក់មាន ក្នុងតំបន់ព្រៃឡង់ខេត្តកំពង់ធំនៅថ្ងៃចន្ទស្អែក។
លោក ជឹម សាវុធ តំណាងមជ្ឈមណ្ឌលសិទ្ធិមនុស្សកម្ពុជា បានបញ្ជាក់ប្រាប់នៅថ្ងៃអាទិត្យនេះថា តំណាងសហគមន៍ព្រៃឡង់ចំនួន១០០នាក់បានធ្វើដំណើរថ្មើរជើងពីខេត្តព្រះវិហារតាំងពីថ្ងៃទី២ខែវិច្ឆិកាមកកាន់ខេត្តកំពង់ធំ។ តំណាងសហគមន៍ពីខេត្តផ្សេងទៀតដូចជា ខេត្តក្រចេះ ស្ទឹងត្រែង កំពង់ធំ សរុបទាំងអស់ប្រមាណជាជាង៤០០នាក់ផ្សេងទៀតបានមកដល់ជិតចំណុចជួបជុំគ្នានៅថ្ងៃស្អែកហើយ។
គោលបំណងនៃការដើរចូលព្រៃឡង់នៅពេលនេះ គឺដើម្បីទប់ស្កាត់ការកាប់បំផ្លាញព្រៃឈើនៅក្នុងតំបន់ព្រៃឡង់។ ព្រៃឡង់មានទំហំ៤០ម៉ឺនហិកតា និងផ្តល់ផលជាច្រើនដល់សហគមន៍ជនជាតិភាគតិចដូចជាវល្លិ និងជ័រទឹកជាដើម។
លោក សុភាព តំណាងសហគមន៍ព្រៃឡង់ពីខេត្តកំពង់ធំ ដែលដើរជិតដល់ចំណុចជួបជុំគ្នានៅកណ្តាលព្រៃបាននិយាយប្រាប់តាមទូរស័ព្ទមកថា ការដើរចូលព្រៃនៅពេលនេះ គឺដោយសារមានការកាប់បំផ្លាញព្រៃឈើច្រើនពេក។ ព្រៃឈើទាំងនេះជាប្រភពធនធានធម្មជាតិរបស់សហគមន៍។
លោក ជឹម សាវុធ តំណាងមជ្ឈមណ្ឌលសិទ្ធិមនុស្សកម្ពុជាដែលបានតាមដានដំណើរការកាប់ព្រៃរបស់សហគមន៍បានបញ្ជាក់ប្រាប់តាមទូរស័ព្ទមកថា មានការកាប់បំផ្លាញព្រៃឡង់យ៉ាងអនាធិបតេយ្យនៅពេលនេះ។ អ៊ីចឹងហើយ ទើបតំណាងសហគមន៍នាំគ្នាចូលព្រៃដើម្បីទប់ស្កាត់ទង្វើខុសច្បាប់នេះ។
ទាក់ទងទៅនឹងការចោទប្រកាន់ការកាប់បំផ្លាញព្រៃឡង់នេះ លោក ជាម យៀប មន្រ្តីជាន់ខ្ពស់គណបក្សប្រជាជនកម្ពុជា និងជាតំណាងរាស្រ្តគណបក្សកាន់អំណាចបាននិយាយប្រាប់នៅថ្ងៃអាទិត្យនេះថា លោកមិនទាន់ទទួលបានព័ត៌មាននេះទេ។ ប៉ុន្តែទោះជាយ៉ាងណាក៏ដោយ លោកសូមអំពាវនាវដល់រដ្ឋាភិបាល ជាពិសេសក្រសួងកសិកម្មអោយតាមដាន និងយកចិត្តទុកដាក់លើបញ្ហានេះ។ តំណាងរាស្រ្តរូបនេះបានបញ្ជាក់ជំហរថា លោកមិនគាំទ្រការកាប់បំផ្លាញព្រៃឈើទេ។
បើយោងតាមកម្មវិធី តំណាងសហគមន៍ប្រមាណជា៥០០នាក់នឹងជួបជុំគ្នានៅថ្ងៃស្អែកនៅចំណុចដំណាក់មាន តំបន់ព្រៃឡង់ ក្នុងខេត្តកំពង់ធំ។ ប្រជាជនទាំងនេះសម្រេចចិត្តស្នាក់នៅក្នុងព្រៃដ៏ស្កឹមស្កៃមួយនេះរយៈពេលសប្តាហ៍ ដើម្បីត្រួតពិនិត្យការកាប់ព្រៃឈើខុសច្បាប់។ នៅថ្ងៃទី១៣ខែវិច្ឆិកាខាងមុខនេះ ពួកគេនឹងចាកចេញពីព្រៃឡង់ ដើម្បីឆ្ពោះទៅកាន់ស្រុកសណ្តាន់ខេត្តកំពង់ធំ ទីដែលពួកគេនឹងរៀបចំវេទិកាសាធារណៈមួយនិយាយពីបញ្ហាកាប់បំផ្លាញព្រៃឡង់នៅថ្ងៃទី១៤ខែវិច្ឆិកា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ