លោកស៊្ហីនហ្សូ អាបេប្រកាសគម្រោងរំលាយសភា នៅមួយថ្ងៃក្រោយតួលេខបង្ហាញសេដ្ឋកិច្ចជប៉ុនដើរថយក្រោយ
ចុះផ្សាយនៅថ្ងៃ៖
ស្តាប់ - ០៧:០៧
នៅក្នុងសន្និសីទកាសែត នៅថ្ងៃអង្គារទី ១៨ វិច្ឆិកា នាយករដ្ឋមន្រ្តីជប៉ុនបានប្រកាសគម្រោងរំលាយសភា និងរៀបចំការបោះឆ្នោតមុនពេលកំណត់មួយ។ កាលពីថ្ងៃចន្ទ តួលេខបង្ហាញថា សេដ្ឋកិច្ចជប៉ុនដើរថយក្រោយ (គេមិននឹកស្មានដល់)បន្ទាប់ពីផលិតផលក្នុងស្រុកសរុបរបស់ជប៉ុនបានធ្លាក់ចុះ បន្តបន្ទាប់គ្នា ក្នុងរយៈពេលពីត្រីមាស។ នាយករដ្ឋមន្រ្តី ជប៉ុន លោកស្ហ៊ីនហ្សូ អាបេបានប្រកាសផងដែរថា លោកនឹងពន្យារពេល សម្រាប់ការដំឡើងពន្ធលើការលក់ទំនិញ និងសេវាកម្ម ឬហៅថា TVA។ តាមច្បាប់ ឆ្នាំ ២០១៣ ពន្ធលើការលក់ទំនិញ និងសេវាកម្ម ឬ TVA ដែលបច្ចុប្បន្ន មានអត្រា ៨ភាគរយ គ្រោងនឹងត្រូវដំឡើងដល់១០ភាគរយ នៅខែតុលាឆ្នាំ ២០១៥។
តាំងពីចូលកាន់តំណែងជានាយករដ្ឋមន្រ្តីជប៉ុន លោកស៊្ហីនហ្សូ អាបេ ដឹងថា មិនយូរ មិនឆាប់ លោកនឹងត្រូវរំលាយសភា ដើម្បីរៀបចំការបោះឆ្នោតមុនកាលកំណត់។ នៅមួយថ្ងៃក្រោយតួលេខបង្ហាញថា សេដ្ឋកិច្ចជប៉ុនដើរថយក្រោយ ដែលជាដំណឹងមិនល្អសម្រាប់ជប៉ុននោះ លោកនាយករដ្ឋមន្រ្តីជប៉ុនមិនបានរង់ចាំ ដល់ឆ្នាំ ២០១៧ ដើម្បីរៀបចំការបោះឆ្នោតជាតិ ដើម្បីជ្រើសរើសរដ្ឋាភិបាលថ្មីនោះទេ។ លោកមិនបានរង់ចាំឲ្យប្រជាប្រិយភាពរបស់លោកធា្លក់ចុះ រហូតដល់ថ្ងៃបោះឆ្នោតសាជាថ្មី ក្នុងរយៈពេល២ឆ្នាំទៀតនោះទេ។ បើសិនលោក នៅក្រាញកាន់អំណាច ក្នុងពេលដែលសេដ្ឋកិច្ចកំពុងដាំក្បាលចុះយ៉ាងដូច្នេះ លោក និងគណបក្សរបស់លោក នឹងត្រូវប្រជាជនរិះគន់ ងើបមុខមិនរួច និងមិនអាចសង្ឃឹមឈ្នះឆ្នោតនាពេលអនាគតទេ។
លោកអាបេបានឡើងកាន់តំណែងជានាយករដ្ឋមន្រ្តីជប៉ុន បានតែ២ឆ្នាំ ប៉ុណ្ណោះ ក៏ប៉ុន្តែ លោកបានជ្រើសរើសយកកាលៈទេសៈដែលសេដ្ឋកិច្ចជប៉ុនកំពុងធ្លាក់ចុះនេះ ដើម្បីរំលាយសភា និងរៀបចំការបោះឆ្នោតមុនកាលកំណត់។ តាមអ្នកជំនាញ លោកអាបេហ៊ានធ្វើដូច្នេះ ព្រោះលោកមានជំនឿទុកចិត្តថា លោកនឹងមិនចាញ់ទេ នៅក្នុងការបោះឆ្នោតមុនកាលកំណត់។ ទីមួយ លោកមើលឃើញថា គណបក្សប្រឆាំងដែលនៅតែបន្តបែកបាក់ គ្មានប្រជាប្រិយភាពនៅក្នុងចំណោមប្រជាជន តាំងពីឆ្នាំ ២០១២ មិនអាចទទួលសំឡេងឆ្នោតច្រើនបានទេ។ បើសិនអាចទៅរួច លោកអាចបាត់បង់សំឡេងតែប៉ុន្មានកៅអីប៉ុណ្ណោះ ប៉ុន្តែ វានឹងមិនធ្វើឲ្យលោកបាត់បង់សំឡេងភាគច្រើន នៅសភានោះទេ។
ទីពីរ បើសិនជាលោកឈ្នះ នៅក្នុងការបោះឆ្នោតមុនកាលកំណត់ នាខែធ្នូខាងមុខ លោកអាបេសង្ឃឹមមានទឹកមាត់ប្រៃ។ ដោយសំអាងថា ប្រជាជននៅតែគាំទ្រនយោបាយរបស់លោក លោកអាបេនឹងអាចបន្តនយោបាយសេដ្ឋកិច្ចរបស់លោក ជាពិសេស គឺបង្កើនការចំណាយរបស់ប្រជាជនក្នុងស្រុក។ លើសពីនោះ លោកអាបេនៅចង់ដាក់ឲ្យដំណើរការឡើងវិញ រោងចក្រនុយក្លេអ៊ែរ ដែលត្រូវផ្អាក តាំងពីមានស៊ូណាមី នៅជប៉ុន។ តាមលោកអាបេ ដោយសារតែគ្មានរោងចក្រនុយក្លេអ៊ែរ ជប៉ុនបានចំណាយខ្ពស់សម្រាប់ទិញ នាំចូលប្រេងពីប្រទេសខាងក្រៅ។
លោកស្ហ៊ីនហ្សូ អាបេ បានប្រកាសលើកពេល ១៨ខែ ដើម្បីដំឡើងពន្ធលើការលក់ទំនិញ ឬសេវាកម្ម ដែលតាមច្បាប់ ត្រូវធ្វើនៅខែ តុលា ឆ្នាំ២០១៣
គោលដៅធំនៃការដំឡើងពន្ធលើការលក់ទំនិញ និងសេវាកម្ម TVA គឺដើម្បីកាត់បន្ថយប្រាក់បំណុលរដ្ឋ។ នៅពេលប្រកាសដំឡើងពន្ធលើTVA លោកអាបេត្រូវបានគេមើលឃើញថា ជានាយករដ្ឋមន្រ្តីជប៉ុនដែលក្លាហានជាងគេ ព្រោះថា គ្មាននាយករដ្ឋមន្រ្តីជប៉ុនណាហ៊ានដំឡើងពន្ធលើTVA ទេ ចាប់តាំងពីឆ្នាំ ១៩៩៧មក។ នាយករដ្ឋមន្រ្តីមុនៗ ធ្លាប់បានដំឡើងTVA ពី ៣ទៅ ៥ភាគរយប៉ុណ្ណោះ ប៉ុន្តែ ក៏ត្រូវអប្រជាប្រិយភាព និងបរាជ័យ នៅក្នុងការបោះឆ្នោតជាតិ។
ប៉ុន្តែ នៅក្នុងអាណត្តិរបស់ខ្លួន លោកអាបេ ហ៊ានដំឡើងពន្ធលើTVA ដល់ ៨ភាគរយ គិតចាប់តាំងពីខែមេសារហូតមក។ រដ្ឋាភិបាលសង្ឃឹមថា នឹងអាចឲ្យប្រមូលបាន៨១ពាន់លានដុល្លារ ដោយសារការដំឡើងពន្ធលើTVA។ ទឹកប្រាក់នេះតិចបើប្រៀបធៀបនឹងចំណាយរបស់រដ្ឋដែលមានដល់ទៅជាង ៥០០ពាន់លានដុល្លារ ក្នុងមួយឆ្នាំៗ។ ប៉ុន្តែ ទឹកប្រាក់ប្រមូលពន្ធTVA អាចឲ្យគេយកទៅទប់ទល់ កាត់បន្ថយបំណុលសាធារណៈផង និងដើម្បីជំរុញផ្នែកសេដ្ឋកិច្ចផង។
លោកអាបេធ្លាប់មានជំនឿថា នយោបាយសេដ្ឋកិច្ចរបស់លោកនឹងបានទទួលជោគជ័យ។ លោកបានបង្កើនចំណាយសាធារណៈ ជំរុញការវិនិយោគ ដើម្បីធ្វើឲ្យប្រាក់ចំណូលរបស់ប្រជាជនជប៉ុនកើនឡើង។ ប្រាក់ចំណូលកើនឡើង នោះប្រជាជនជប៉ុនក៏នឹងហ៊ានចាយច្រើនដើម្បីទិញប្រើប្រាស់ផលិតផល។ បើសិនជាប្រជាជនចំណាយច្រើនទៅលើការទិញផលិតផល នោះសេដ្ឋកិច្ចជប៉ុនក៏នឹងកើនឡើងប្រសើរដែរ។
ប៉ុន្តែ សេណារីយ៉ូសុទិដ្ឋិនិយមរបស់លោកអាបេមានត្រឹមតែជាងមួយឆ្នាំដំបូងប៉ុណ្ណោះ។ ការទិញប្រើប្រាស់របស់ប្រជាជនបានធ្លាក់ចុះ ជាបន្តបន្ទាប់ ជាពិសេស ចាប់តំាងពីរដ្ឋាភិបាលដំឡើងTVA ចុងក្រោយ ដល់៨ភាគរយ កាលពីខែមេសា។ ៦០ភាគរយនៃសេដ្ឋកិច្ចជប៉ុនពឹងអាស្រ័យលើការទិញប្រើប្រាស់របស់ប្រជាជនជប៉ុន។ បើសិនជាប្រជាជនបន្ថយការចំណាយលើការទិញប្រើប្រាស់ នោះសេដ្ឋកិច្ចជប៉ុននឹងធ្លាក់ចុះ ដោយគ្មានការសង្ស័យ។ នៅពេលនេះ រដ្ឋាភិបាលជប៉ុនគ្មានហេតុផលអ្វីដែលត្រូវចង់ដំឡើងពន្ធលើTVAទៀតទេ។ ក្នុងកាលៈទេសៈនេះ គេមិននិយាយពីការដំឡើងពន្ធលើTVA ឬនយោបាយកាត់បន្ថយបំណុលសាធារណៈទេ ប៉ុន្តែ គេត្រូវដោះស្រាយបញ្ហា ចំពោះមុខ នោះគឺធ្វើយ៉ាងម៉េចស្រោចស្រង់សេដ្ឋកិច្ចជប៉ុនដែលកំពុងដើរថយក្រោយ។
តាមតួលេខបង្ហាញកាលពីថ្ងៃចន្ទ ទី ១៧វិច្ឆិកា ផលិតផលក្នុងស្រុកសរុបPIB របស់ជប៉ុនថយចុះ នៅក្នុងពីរត្រីមាស ជាប់ៗគ្នា រហូតធ្វើឲ្យគេចាត់ទុកថា សេដ្ឋកិច្ចជប៉ុនដើរថយក្រោយ រឿងមួយស្មានមិនដល់។
បន្ទាប់ពីប្រកាសគម្រោងរំលាយសភា និងរៀបចំការបោះឆ្នោតមុនកាលកំណត់ លោកនាយករដ្ឋមន្រ្តីជប៉ុនគ្រោងផងដែរនឹងបន្តជំរុញការប្រើប្រាស់ របស់មេផ្ទះជប៉ុន ដែលជាសរសរទ្រូងនៃសេដ្ឋកិច្ចជប៉ុន។ គេរំពឹងថា រដ្ឋាភិបាលនឹងបញ្ចេញកញ្ចប់ថវិកាជិត ២០ពាន់លានអឺរ៉ូដើម្បីជំរុញការចំណាយរបស់ប្រជាជនជប៉ុន។
លោកអាបេបានអះអាងដែរថា លោកបានជំរុញឲ្យមន្រ្តីអ្នកជំនាញសេដ្ឋកិច្ចរបស់លោកគិតគូរធ្វើយ៉ាងម៉េចដើម្បីឲ្យទំនិញនាំចូលមានតម្លៃថោក ដើម្បីលើកទឹកចិត្តអ្នកទិញប្រើប្រាស់។ សូមបញ្ជាក់ថា ដោយសារតែនយោបាយសេដ្ឋកិច្ចAbenomique ពោលគឺការបញ្ចេញសាច់ប្រាក់ច្រើនក្នុងទីផ្សារ លុយរបស់ជប៉ុន បានធ្លាក់ចុះថ្លៃ។ ការនាំចេញរបស់ក្រុមហ៊ុនជប៉ុនបានជួបឧបសគ្គ នៅពេលដែលទំនិញបរទេសនាំចូលមកពីក្រៅ មានតម្លៃខ្ពស់សម្រាប់ប្រជាជនជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ