អង្គការរដ្ឋអ៊ីស្លាម បង្កសង្គ្រាមបែបថ្មី ដែលផ្តល់ផលដល់ពួកជ្រុលនិយមតូចៗ
ចុះផ្សាយនៅថ្ងៃ៖
ស្តាប់ - ០៦:៤១
ទង់ជាតិពាក់កណ្តាលទង់ ! បារាំងកំពុងកាន់ទុក្ខថ្នាក់ជាតិចាប់ពីថ្ងៃសុក្រទី ២៦កញ្ញា សម្រាប់រយៈពេលបីថ្ងៃ ដើម្បីឧទ្ទិសដល់វិញ្ញាណក្ខន្ធសពលោក អ៊ែរវេ ហ្កួរដែល ធ្វើឃាតដោយពួកជីហាតអាល់ហ្សេរីស្និទ្ធនឹងអង្គការរដ្ឋអ៊ីស្លាម។ ឃាតកម្មដែលបានរុញច្រានបារាំង ឱ្យមានឆន្ទៈកាន់តែដាច់ខាតក្នុងការប្រយុទ្ធប្រឆាំងនឹងក្រុមជីហាតនៃអង្គការរដ្ឋអ៊ីស្លាម និងធ្វើឱ្យសម្ព័ន្ធមិត្តកាន់មានសាមគ្គីភាពគ្នាខ្លាំងឡើង។ អង់គ្លេសក៏ទំនងជានឹងបញ្ជូនកម្លាំងទៅក្នុងសម្ព័ន្ធអន្តរជាតិដើម្បីកម្ទេចពួកជីហាតនៅអ៊ីរ៉ាក់ និងស៊ីរី។ ជាដំណាក់ថ្មីនៃសង្គ្រាមពិភពលោកប្រឆាំងនឹងពួកជីហាតឬ ? តែការស្ទុះឡើងនៃអង្គការរដ្ឋអ៊ីស្លាមបាននិងកំពុងធ្វើឱ្យពួកអ៊ីស្លាមជ្រុលនិយមតូចៗខ្វារកយ៉ាងខ្លាំង។
ថ្វីបើការគំរាមកំហែងភេរវនិយមមានកំរិតខ្ពស់ បារាំងបានចាត់វិធានការពិសេស ពង្រឹងសន្តិសុខតាមទីសាធារណៈនិងប្រជុំជនមានមនុស្សម្នាច្រើន ដោយដាក់ពង្រាយកម្លាំងយោធាមែនប៉ុន្តែ បារាំងនៅតែបន្តវាយប្រហារលើទីតាំងពួកជីហាតនៅអ៊ីរ៉ាក់ដដែល។ គឺមិនបញ្ឈប់ត្រឹមណេះទេ !
បារាំងមិនធ្វើអន្តរាគមន៍នៅស៊ីរី
ហេតុអ្វីមិនបង្ហួសដល់ស៊ីរី ? មានហេតុផលច្រើន ៖ ក្នុងករណីអ៊ីរ៉ាក់ រដ្ឋាភិបាលក្រុងបាកដាដជាអ្នកស្នើសុំអន្តរាគមន៍អន្តរជាតិមុន ឯស៊ីរីគ្មានសុំទេ។ ម្យ៉ាងទៀត បារាំងមានជំហរប្រឆាំងនឹងរបបក្រុងដាម៉ាស របស់លោក បាស្ហា អាល់អាសាដ តាំងពីដំបូងមក។ បារាំងធ្លាប់បានស្នើសុំអន្តរជាតិវាយប្រហារទម្លាក់របបនេះទៀតផង។ សម្រាប់បារាំង គឺជាការបែកចែកការងារគ្នា បារាំងបានទៅជួយវាយនៅអ៊ីរ៉ាក់ហើយ ទុកភារកិច្ចវាយស៊ីរីឱ្យទៅអាមេរិក។ នៅល្ងាចមិញបារាំងបញ្ជាក់ជំហរជាថ្មីថានឹងបន្តជួយក្រុមប្រឆាំងនៅស៊ីរី ដែលក្រុមនេះក៏កំពុងប្រយុទ្ធប្រឆាំងនឹងពួកជីហាតដែរ។ សេចក្តីសម្រេចដែលអនុញ្ញាតឱ្យបារាំងរក្សាជំហរដើម គឺកម្ទេចពួកជីហាតនៃរដ្ឋអ៊ីស្លាម និងជួយស៊ីរី ដោយមិនចាំបាច់ត្រូវសហការជាមួយរបបកាន់អំណាចស៊ីរីបច្ចុប្បន្ន។
សង្គ្រាមគ្មានថ្ងៃបញ្ចប់ ?!
សង្គ្រាមប្រឆាំងនឹងពួកជីហាតនៃអង្គការរដ្ឋអ៊ីស្លាមនេះ មានទ្រង់ទ្រាយនិងទំហំពិសេស មិនធ្លាប់មានក្នុងប្រវត្តិសាស្ត្រឡើយ។ ជាសង្គ្រាម ដែលពិភពលោកទាំងមូលត្រូវចូលចំណែក ព្រោះវាអាចរីកសាយភាយពេញពិភពលោក តាមរយៈការផ្សព្វផ្សាយមនោគមន៍វិជ្ជាជីហាត។ ពួកជីហាតអ៊ីស្លាមជ្រុលនិយមនេះ ដែលបានប្រកាសតាំងខ្លួនជារដ្ឋមួយ មានទឹកដីដណ្តើមបានដោយប្រើចុងអាវុធ មិនដូចរដ្ឋដទៃលើលោកទេ។ អង្គការនេះ ក៏មិនមែនជាបណ្តាញ តែជាក្រុមអង្គការភេរវកម្មដែលមានកេតនភណ្ឌ ដូចជាហិរញ្ញវត្ថុ និងយោធា ច្រើនជាងប្រទេសតូចៗខ្លះផង។ ភាពខុសគ្នាមួយទៀត គឺក្រុមជីហាតនៃអង្គការរដ្ឋអ៊ីស្លាម មិនប្រើអាវុធស្របច្បាប់ស្រាប់ធ្វើសង្គ្រាមទេ ប្រើតែវិធីវាយប្រហារភេរវកម្មដែលជាឯកទេសរបស់ពួកគេ។ ដូច្នេះពេលនេះបញ្ហាមិនមែនស្ថិតនៅលើប្រភេទនៃសង្គ្រាមទេ អ្វីដែលពិភពលោកគួរព្រួយបារម្ភគឺតើសង្គ្រាមនេះនឹងអូសបន្លាយរហូតដល់ពេលណា ? ពួកនេះអាចធន់នឹងការវាយប្រហារផ្លូវកាសរហូតដល់ពេលណា ?
អាប៊ូសាយយ៉ាហ្វទទួលផលពីអង្គការរដ្ឋអ៊ីស្លាម
ក្នុងខណៈដែលពិភពលោកទាំងមូលកំពុងផ្តុំកម្លាំងកម្ទេចពួកជីហាតនៅអ៊ីរ៉ាក់ និងស៊ីរី ស្រាប់តែមានធ្លាយកម្លាំងជ្រុលនិយមជីហាតនៅអាល់ហ្សេរីចេញមុខសម្លាប់ជនជាតិបារាំង ដើម្បីបុព្វហេតុអង្គការរដ្ឋអ៊ីស្លាម។ បន្ទាប់មកទៀត ពួកអ៊ីស្លាមជ្រុលនិយមនៅ ហ្វីលីពីនក៏បានប្រកាសគំរាមដូចគ្នាចង់សម្លាប់ជនជាតិអាល្លឺម៉ង់ពីរនាក់ ជាចំណាប់ខ្មាំងតាំងពីខែមេសាមក ប្រសិនបើអាល្លឺម៉ង់មិនព្រមដកខ្លួនចេញពីក្រុមសម្ព័ន្ធអន្តរជាតិ។ ការគំរាមកំហែងដែលមិនបានបណ្តាលឱ្យអាល្លឺម៉ង់ប្តូរចិត្ត ឯចំណែករដ្ឋាភិបាលក្រុងម៉ានីល ក៏បដិសេធមិនបើកការចរចាដោះដូរចំណាប់ខ្មាំងជាមួយនឹងក្រុមភេរវនិយម អាប៊ូសាយយ៉ាហ្វដែរ។
ក្រុមអាប៊ូសាយយ៉ាហ្វ ដែលមានសាមគ្គីភាពជាមួយនឹងអង្គការរដ្ឋអ៊ីស្លាម ស្ម័គ្រចិត្តគាំទ្រចលនានេះ កំពុងតែចង់បង្ហាញពីអំណាចទាក់ទាញយុទ្ធជនអ៊ីស្លាមជ្រុលនិយមបាននៅតំបន់អាស៊ី។ ប្រភពសន្តិសុខ និងអ្នកវិភាគបានប៉ាន់ប្រមាណថា មានបណ្តាជនឥណ្ឌូណេស៊ី ម៉ាឡេស៊ី ដែលសុទ្ធសឹងជាប្រទេសមានពលរដ្ឋភាគច្រើនកាន់សាសនាអ៊ីស្លាមនោះ ព្រមទាំងពលរដ្ឋហ្វីលីពីន ជាច្រើនរយនាក់ បានទៅបម្រើជីហាតនៅអ៊ីរ៉ាក់និងស៊ីរី (និងប្រមាណជាងមួយពាន់នាក់បើរាប់ថ្នាក់តំបន់អាស៊ី)។
អាប៊ូសាយយ៉ាហ្វ ដែលគេបានស្គាល់តាំងពីឆ្នាំ២០០០មក ធ្លាប់បានប្រកាសខ្លួនថាជាបណ្តាញមួយរបស់អង្គការភេរវនិយមអាល់កៃដា រកស៊ីតែចាប់ខ្លួនជនបរទេសជំរិតយកលុយ ល្បីខ្លាំងខាងមានជំនាញខាងប្រើវិធីហិង្សា។ អាប៊ូសាយយ៉ាហ្វ ក្នុងទសវត្សចុងក្រោយនេះ ជាចលនារួមតូច ជួបនឹងបរាជ័យផ្នែកប្រយុទ្ធជាបន្តបន្ទាប់ មានការគាំទ្រថយចុះជាលំដាប់។ ប៉ុន្តែពេលនេះជាឱកាសដ៏ប្រពៃ សម្រាប់បណ្តែតខ្លួនឡើងវិញ ដោយការសម្រេចបញ្ចូលខ្លួនក្នុងអង្គការរដ្ឋអ៊ីស្លាម មានម៉ាក មានចំណុចបង្អែក មាន « អង្គការរដ្ឋអ៊ីស្លាម » គោល សម្រាប់បំផុះបំផុល អូសទាញកម្លាំង។
អាប៊ូសាយយ៉ាហ្វ និងអង្គការរដ្ឋអ៊ីស្លាម ទំនងជាគ្មានទំនាក់ទំនងផ្ទាល់នឹងគ្នាទេ។ ប៉ុន្តែ កម្លាំងយុទ្ធជនដែលបានចុះទៅបម្រើជីហាតនៅស៊ីរីនិងអ៊ីរ៉ាក់ប្រកបដោយជោគជ័យ បានភ្ជាប់ក្រុមអ៊ីស្លាមជ្រុលនិយមនៅហ្វីលីពីនឱ្យមានទំនាក់ទំនងជាមួយអង្គការរដ្ឋអ៊ីស្លាម និងក្លាយជា ការពង្រឹងចលនារបស់ខ្លួនដែលកំពុងធ្លាក់ចុះ។ ប្រកាសគាំទ្រជីហាតរដ្ឋអ៊ីស្លាម គឺដូចជាជួយអាប៊ូសាយយ៉ាហ្វខ្លួនឯង ឱ្យមានបង្អែក មានឈ្មោះលាន់ឮឡើងវិញ និងជាវិធីដ៏មានប្រសិទ្ធភាពសម្រាប់ប្រមូលការគាំទ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ