អាជ្ញាធរដោះលែងសកម្មជនការពារតំបន់អារ៉ែង ខណៈសង្គមស៊ីវិលថ្កោលទោស
សកម្មជនចលនាមាតាធម្មជាតិ និងយុវជន សរុបចំនួន ១0នាក់ ដែលត្រូវបានអាជ្ញាធរខេត្តកោះកុងឃាត់ខ្លួន ត្រូវបានដោះលែងហើយ នៅព្រលប់ថ្ងៃចន្ទម្សិលមិញ។ អាជ្ញាធរបានអះអាងថា ការឃាត់ខ្លួននេះ ធ្វើឡើងដើម្បីសាកសួរពីហេតុផលនៃការបិទផ្លូវចូលទៅតំបន់អារ៉ែងតែប៉ុណ្ណោះ។ ប៉ុន្តែសង្គមស៊ីវិលបានថ្កោលទោសចំពោះការឃាត់ខ្លួននេះ ព្រោះអាជ្ញាធរមិនបានប្រាប់ពីមូលហេតុ និងមិនបានបង្ហាញដីកាមុនពេលចាប់ខ្លួន។
ចុះផ្សាយនៅថ្ងៃ៖
ស្តាប់ - ០២:៣២
សកម្មជនការពារតំបន់អារ៉ែងទាំង១០នាក់ ត្រូវបានអាជ្ញាធរខេត្តកោះកុង ដោះលែងហើយ នៅយប់ថ្ងៃចន្ទ ទី១៥កញ្ញា។ នេះបើតាមលោកអ៊ិន គង់ជិត មន្ដ្រីអង្គការការពារសិទ្ធិមនុស្សលីកាដូ។ ការដោះលែងនេះ ធ្វើឡើងបន្ទាប់ពីប៉ូលីសបញ្ចប់ការសាកសួរ និងបន្ទាប់ពីអ្នកទាំង១០នាក់នោះ បានសរសេរលិខិតសុំទោសប្រគល់ជូនអាជ្ញាធរ។ បើតាមមន្ដ្រីសិទ្ធិមនុស្សដដែល អាជ្ញាធរបានអះអាងថា ការឃាត់ខ្លួននេះ ធ្វើឡើងដើម្បីសាកសួរពីហេតុផលនៃការបិទផ្លូវចូលទៅតំបន់អារ៉ែងតែប៉ុណ្ណោះ។
ដោយឡែក លោក Alex Gonzalez ស្ថាបនិកចលនាមាតាធម្មជាតិ ដែលស្ថិតនៅក្នុងចំណោមមនុស្សទាំង១០នាក់ដែលត្រូវបានចាប់ខ្លួន មានប្រសាសន៍ប្រាប់វិទ្យុបារាំងអន្ដរជាតិ នៅថ្ងៃអង្គារទី១៦កញ្ញានេះថា ចលនាមាតាធម្មជាតិមិនតក់ស្លុតចំពោះហេតុការណ៍នេះទេ។ និងថា ចលនាមាតាធម្មជាតិរបស់លោក ព្រមទាំងប្រជាសហគមន៍តំបន់អារ៉ែង នឹងនៅតែបន្តការប្រឆាំងដាច់ខាត ចំពោះគម្រោងសាងសង់ទំនប់វារីអគ្គីសនីរបស់ក្រុមហ៊ុនចិន ស៊ីណូហាយដ្រូ។
គួររំលឹកថា សកម្មជនចលនាមាតាធម្មជាតិ និងសមាជិកបណ្ដាញយុវជនកម្ពុជា សរុបចំនួន ១0នាក់ ត្រូវបានអាជ្ញាធរខេត្តកោះកុង ចាប់ខ្លួន នៅរសៀលថ្ងៃចន្ទទី១៥កញ្ញា នៅច្រាំងត្រឡាច ស្រុកថ្មបាំង ខេត្តកោះកុង បន្ទាប់ពីពួកគេ បានបិទផ្លូវមិនឲ្យតំណាងអាជ្ញាធរខេត្តកោះកុងនិងតំណាងក្រុមហ៊ុនចិនចូលទៅកាន់តំបន់អារ៉ែង។
ភ្លាមៗក្រោយការចាប់ខ្លួន បណ្ដាញយុវជនកម្ពុជា បានចេញសេចក្ដីថ្លែងការណ៍ថ្កោលទោសចំពោះទង្វើរបស់អាជ្ញាធរខេត្តកោះកុង។ បណ្ដាញយុវជនកម្ពុជា បានស្រង់សម្ដីសាក្សីនៅកន្លែងកើតហេតុដែលថា ក្រុមអាជ្ញាធរមិនបានប្រាប់ពីមូលហេតុនៃការចាប់ខ្លួនទេ ហើយក៏មិនបានបង្ហាញឯកសារផ្លូវច្បាប់មុនពេលចាប់ខ្លួនផងដែរ។ ការចាប់ខ្លួនដោយគ្មានដីកាយ៉ាងដូច្នេះ ត្រូវបានបណ្ដាញយុវជនកម្ពុជាហៅថា ជារូបភាពនៃការគម្រាមកំហែង និងបំបាក់ស្មារតី។ ហើយថា អាជ្ញាធរត្រូវដោះលែងអ្នកដែលត្រូវបានចាប់ខ្លួនទាំងអស់ ដោយគ្មានលក្ខខណ្ឌ។
សូមបញ្ជាក់ថា តំបន់អារ៉ែងក្នុងខេត្តកោះកុង ត្រូវបានរដ្ឋាភិបាលកម្ពុជា ផ្ដល់សិទ្ធិឲ្យក្រុមហ៊ុនចិន ស៊ីណូហាយដ្រូ ដើម្បីសាងសង់ទំនប់វារីអគ្គិសនី។ ចលនាមាតាធម្មជាតិ ប្រជាសហគមន៍ និងសកម្មជន បានអះអាងថា គម្រោងសាងសង់ទំនប់វារីអគ្គិសនីនេះ នឹងប៉ះពាល់ដល់ព្រៃឈើ ព្រមទាំងសត្វព្រៃប្រភេទកម្រជាច្រើន។ ក្រុមសកម្មជន ធ្លាប់ដាក់ញត្តិទៅស្ថាប័នពាក់ព័ន្ធ ព្រមទាំងតវ៉ាបិទផ្លូវជាច្រើនលើកច្រើនសា ដើម្បីស្នើឲ្យបញ្ឈប់គម្រោងនេះ ដោយទុកតំបន់នោះ ជាតំបន់ទេសចរណ៍ធម្មជាតិវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ