ប្រទេសដៃគូរបស់អាមេរិកងាកទៅសហការជាមួយសត្រូវ
នៅក្នុងកិច្ចប្រជុំត្រីភាគី កាលពីថ្ងៃសៅរ៍ ទី ២៥ មិថុនា ដែលរៀបចំក្រៅសន្និសីទអន្តរជាតិប្រឆាំងនឹងអំពើភេរវកម្ម ប្រធានាធិបតីអាហ្វហ្កានិស្ថាន បាគីស្ថាន និងអៀរ៉ង់បានសន្យាសហការគ្នា ដើម្បីប្រយុទ្ធប្រឆាំងនឹងអំពើភេរវកម្ម និងចលនាបះបោរប្រដាប់អាវុធ នៅក្នុងតំបន់។ នៅថ្ងៃសៅរ៍ ដែរ អំពើភេរវកម្មបំផ្ទុះរថយន្តពីរគ្រឿង នៅមុខមន្ទីរពេទ្យ ដែលស្ថិតនៅ ៧០គីឡូម៉ែត្រពីទីក្រុងកាប៊ូល បានសម្លាប់មនុស្សយ៉ាងតិច ៦០នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:១១
មេដឹកនាំរបស់ប្រទេស ទាំងបីកំពុងបារម្ភ ដែលឃើញពួកបះបោរកាន់តែពង្រឹងកម្លាំង កាន់តែខ្លាំង និងធ្វើ សកម្មភាពបង្កភេរវកម្ម កាន់តែច្រើន នៅក្នុងប្រទេសរបស់ពួកគេ។ ប្រធានាធិបតីអៀរ៉ង់បានប្រាប់ទៅប្រទេសជិតខាងទាំងពីររបស់ខ្លួនថា អៀរ៉ង់រងភេរវកម្មដែលសម្លាប់មនុស្សជាង ១ម៉ឺន ៦ពាន់ នាក់ចាប់តាំងពីឆ្នាំ ១៩៧៩។ អាហ្វហ្កានិស្ថានវិញមានប្រជាជនស៊ិវិល ជិត ៣ម៉ឺននាក់ ចំណែកប៉ាគីស្ថានមានជនរងគ្រោះ ៣ម៉ឺន ៥ពាន់នាក់ ដែលស្លាប់ នៅក្នុងអំពើភេរវកម្ម។ បើតាមអៀរ៉ង់ ប្រទេសជិតខាងទាំងបី ត្រូវព្រួតដៃគ្នា ដើម្បីកសាងសន្តិសុខ នៅក្នុងតំបន់ ឡើងវិញ។ ប្រទេសទាំងបី បានសន្យារៀបចំកិច្ចប្រជុំរបស់រដ្ឋមន្រ្តីសន្តិសុខ កិច្ចការបរទេស និងសេដ្ឋកិច្ចរបស់ខ្លួន នៅក្នុងទីក្រុងអ៊ីស្លាម៉ាបាត នៅចុងឆ្នាំនេះ។
នៅក្នុងសេចក្តីថ្លែងការណ៍រួម ប្រធានាធិបតីរបស់ប្រទេសទាំងបី ក៏បានសន្យាធ្វើការរួមគ្នាដើម្បីប្រយុទ្ធប្រឆាំងនឹងពួកបះបោរ និងពួកភេរវជន នៅក្នុងតំបន់ និងបដិសេធមិនឲ្យមានអន្តរាគមន៍របស់ទ័ពបរទេស នៅក្នុងប្រទេសរបស់ពួកគេ។
កន្លងមក ប្រធានាធិបតីអៀរ៉ង់តែងតែចោទពួកលោកខាងលិច ជាពិសេសអាមេរិកតែម្តង ថា យកលេសអំពើភេរវកម្ម ដើម្បីចូលទៅតាំងមូលដ្ឋានទ័ពរបស់ខ្លួន នៅក្នុងប្រទេសអាហ្វហ្កានិស្ថាន។ លោកMahmoud Ahmandinejad តែងចោទថា គឺពួកអាមេរិកដែលបានផ្តល់ជំនួយហិរញ្ញវត្ថុដល់ពួកបណ្តាញភេរវជនអាល់កៃដា និងពួកបះបោរSunnitesដែល លាក់ខ្លួន នៅតាមព្រំដែនប៉ាគីស្ថាន និងអៀរ៉ង់ ដើម្បីវាយប្រហារលើរដ្ឋាភិបាលអៀរ៉ង់។
ប្រធានាធិបតីអៀរ៉ង់ដូច្នេះ ប្រធានាធិបតីអាហ្វហ្កានិស្ថាន លោកAmid Kazai បានបញ្ជាក់បា្រប់ទៅដៃគូថ្មីរបស់ខ្លួនថា ប្រជាជនអាហ្វហ្កានិស្ថានតែងតែប្រឆាំងនឹងវត្តមានទ័ពបរទេស នៅអាហ្វហ្កានិស្ថាន។
គឺនៅតែ បីថ្ងៃក្រោយ ការប្រកាសរបស់ដកទ័ពអាមេរិក ចេញពីអាហ្វហ្កានិស្ថាន ដែលអាហ្វហ្កានិស្ថានបែរជាចាប់យកអៀរ៉ង់ មកធ្វើជាដៃគូថ្មី។ អាហ្វហ្កានិស្ថាន ចង់បញ្ជាក់ថា បើគ្មានអាមេរិក អាហ្វហ្កានិស្ថាន ក៏នឹងនៅមានអៀរ៉ង់មួយដែរ។ គឺអៀរ៉ង់នេះឯង ដែលអាមេរិកចាត់ទុកជាគ្រោះថ្នាក់ និងចោទថា ជាអ្នកផ្តល់លុយជួយពួកសកម្មប្រយុទ្ធអ៊ីស្លាមដើម្បីបង្កភេរវកម្ម ប្រឆាំងនឹងអាមេរិក។
ចំណែកប៉ាគីស្ថានវិញ ក្នុងការប្រយុទ្ធប្រឆាំងនឹងអំពើភេរនិយម ប៉ាគីស្ថានជាដៃគូស្និទ្ធនឹងអាមេរិក ប៉ុន្តែ ចាប់តាំងពីកងកុម្មង់ដូរអាមេរិកបាញ់សម្លាប់ បិន ឡាដិន នៅក្នុងទឹកដីប៉ាគីស្ថាន ហើយទីភ្នាក់ងារស៊ើបអង្កេតអាមេរិកបានចោទជាបន្តបន្ទាប់ថា មន្ត្រីទាហានជាន់ខ្ពស់ប៉ាគីស្ថានមានទំនាក់ទំនងជាមួយ ពួកអាល់កៃដា រដ្ឋាភិបាលប៉ាគីស្ថាន និងសេតវិមានអាមេរិកលែងសូវទុកចិត្តគ្នាដូចមុន។
ព្រឹទ្ធសភាអាមេរិកធ្លាប់បានប្រាប់រដ្ឋបាលលោកអូបាម៉ា ឲ្យគិតគូរពីជំនួយអាមេរិកដល់ប៉ាគីស្ថាន ព្រោះថា ទីមួយ បិន ឡាដិន មេបណ្តាញភេរវនិយមអាល់កៃដា ត្រូវគេបាញ់សម្លាប់រួចហើយ។ មួយវិញទៀត អាមេរិកបានមើលឃើញថា ប៉ាគីស្ថាន ជួយលាក់ពួកអ៊ីស្លាមជ្រុលនិយមផង និងធ្វើជាមកសហការជាមួយអាមេរិក ក្នុង ការប្រយុទ្ធនឹងពួកភេរវជនផង។ ថ្មីៗនេះ អាមេរិកបានចោទ ថា សកម្មជនអ៊ីស្លាមជ្រុលនិមមួយក្រុម ធ្វើការជាមួយពួកអាល់កៃដា និងមានទំនាក់ទំនងជាមួយបណ្តាញភ្នាក់ងារសំងាត់របស់យោធាប៉ាគីស្ថាន។
ប៉ាគីស្ថានវិញ ធ្លាប់បានរិះគន់អាមេរិក ដែលបានបើកប្រតិបត្តិការទ័ពសម្លាប់បិន ឡាដិន ដោយមិនឲ្យអាជ្ញាធរប៉ាគីស្ថានដឹងមុន។ ដោយសារតែការអាក់អន់ចិត្ត នេះហើយ ដែលធ្វើឲ្យប៉ាគីស្ថានសម្រេចងាកមកសហការជាមួយអៀរ៉ង់ ដើម្បីប្រយុទ្ធប្រឆាំងនឹងពួកភេរវជននិយម វិញ បើទោះបីជាប៉ាគីស្ថានដឹងថា អៀរ៉ង់ជាសត្រូវរបស់អាមេរិក ក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ