ពួកឧទ្ទាមតាលីបង់បើកប្រតិបត្តិការវាយប្រហារលើទីតាំងកងទ័ពអាហ្វហ្កានីស្ថាន
ពីយប់ថ្ងៃពុធទី១១ ដល់ព្រឹកថ្ងៃទី១២កក្កដា ពួកឧទ្ទាមតាលីបង់បើកប្រតិបត្តិការវាយប្រហារលើទីតាំងជាច្រើនកន្លែងរបស់កងទ័ពអាហ្វហ្កានីស្ថាន។ អ្នកនាំពាក្យក្រសួងការពារជាតិអាហ្វហ្កានីស្ថាន ប្រាប់ថា តុល្យការបឋម មានទាហាន យ៉ាងហោច ពី១០ទៅ១៥នាក់ស្លាប់ ហើយផ្ទះសម្បែងរាប់រយខ្នង ត្រូវបំផ្លាញ។ ក៏ប៉ុន្តែបើតាមមេបញ្ជាការយោធាម្នាក់ ដែលកំពុងឈរជើងនៅមូលដ្ឋាន បានប្រាប់អ្នកកាសែត AFP ថា ទាហានស្លាប់ អាចមានចំនួនដល់ជិត៤០នាក់ ហើយទាហាន១០នាក់ផ្សេងទៀត រងរបួស។
ចុះផ្សាយនៅថ្ងៃ៖ កែប្រែថ្ងៃទី៖
ពីយប់ថ្ងៃពុធទី១១ ដល់ដល់ព្រឹកព្រហស្បតិ៍ទី១២កក្កដា ពួកឧទ្ទាមតាលីបង់ ដែលសុទ្ធតែប្រដាប់ដោយអាវុធទំនើបៗ បានបើកការវាយប្រហារទៅលើទីតាំងយោធារដ្ឋាភិបាលអាហ្វហ្កានីស្ថាន យ៉ាងហោច៣កន្លែងនៅភាគខាងកើតប្រទេស។ ភាគខាងកើតប្រទេសនោះ គឺដែនដីភាគច្រើន ត្រូវពួកឧទ្ទាមកាន់កាប់។
ក្រោយកើតហេតុ អាជ្ញាធរទីក្រុងកាប៊ូល បានសម្តែងការសោកស្តាយជាខ្លាំងចំពោះការស្លាប់បាត់បង់ជីវិតមនុស្ស ហើយនិងចាត់ទុកថា ទង្វើរបស់ពួកតាលីបង់នេះជាការគ្រោះថ្នាក់ដ៏ធ្ងន់ចំពោះប្រទេសជាតិ។ ចំណែកលោក Ashraf Ghani ប្រធានាធិបតីអាហ្វហ្កានីស្ថាន ដែលកំពុងតែចូលរួមប្រជុំអង្គការអូតង់នៅព្រុចសែល បានថ្លែងបញ្ជាពីក្រៅប្រទេស ឲ្យរឹតបណ្តឹងសន្តិសុខ និងរិះរកមធ្យោបាយសុវត្តិភាពឲ្យប្រជាជនជាបន្ទាន់។ ថែមពីនេះ លោកបានស្នើសុំឲ្យសមាជិករបស់អង្គការអូតង់ ចូលរួមប្តេជ្ញាចិត្តនិងផ្តល់កម្លាំងជំនួយបន្ថែមទៀត។
នៅក្នុងកិច្ចប្រជុំរបស់អូតង់នោះ គេរំពឹងថា អង់គ្លេសអាចនឹងផ្តល់កងទ័ពជាង៤០០នាក់ទៀតទៅជួយអាហ្វហ្គានីស្ថាន។ គួររំឭកដែរថា ថ្មីៗនេះ អាមេរិកនិងអង្គការអូតង់ បានបញ្ជូនកងទ័ពចំនួន១ម៉ឺន៤ពាន់នាក់ទៅអាហ្វហ្កានីស្ថាន ដើម្បីជួយទៅបង្ហាត់បង្រៀនហ្វឹកហ្វឺនកងទ័ពអាហ្វហ្គានីស្ថាន។
ជាការកត់សម្គាល់ ការវាយប្រហាររបស់ពួកតាលីបង់ ទៅលើទាហានអាហ្វហ្កានីស្ថាន ជាថ្មីនេះ គឺបន្ទាប់ពីលោកប្រធានាធិបតីអាហ្វហ្កានីស្ថាន បិទផ្លូវចរចាទៅវិញ កាលពីចុងខែមិថុនា។ ផ្លូវចរចាសន្តិភាពដែលលោកប្រកាសបើក និងបិទទៅវិញដោយម្នាក់ឯង ព្រោះភាគីឧទ្ទាមតាលីបង់តែងតែច្រានចោល ឬធ្វើមិនដឹងមិនឮចំពោះការចរចារកសន្តិភាព។
សូមជ្រាបដែរថា ជម្លោះប្រដាប់អាវុធ រវាងក្រុមឧទ្ទាមតាលីបង់និងអាហ្វហ្កានីស្ថាន បានអូសបន្លាយ ជាង១៧ឆ្នាំមក ហើយ។ ក្នុងរយៈពេលនេះ ការបំផ្ទុះគ្រាប់បែក អំពើភេរវកម្ម និងការវាយប្រហារបាញ់សម្លាប់មនុស្ស បានកើតមាន ជាញឹកញយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ