បារាំងផ្តល់ជំនួយ៨៥លានអឺរ៉ូ ដើម្បីអភិវឌ្ឍម៉ាលី ដែលកំពុងប្រឈមនឹងបញ្ហាជីហាត
លោកនាយករដ្ឋមន្ត្រីបារាំង បានទៅដល់ទីក្រុងបាម៉ាកូ ប្រទេសម៉ាលី កាលពីថ្ងៃសៅរ៍ទី ២៣កុម្ភៈ ដើម្បីពិនិត្យតាមដាន អំពីការអនុវត្តគំរោងការបោសសំអាត ចលនាភេរវកម្មនៅតំបន់សាហ៊ែល ដែលកំពុងតែគំរាមប្រទេសអាហ្វ្រិក តំបន់កណ្តាលនិងភាគខាងលិច។ ឆ្លៀតក្នុងឱកាសនោះ លោកនាយករដ្ឋមន្ត្រីបារាំង អ៊ែឌ័រ ហ្វ៊ីលីព បានសន្យាផ្តល់ជំនួយចំនួន៨៥លានអឺរ៉ូ ដើម្បីជួយអភិវឌ្ឍន៍ប្រទេសម៉ាលី។ លោកហ្វ៊ីលីព លើកឡើងថា ការរីកចំរើនសេដ្ឋកិច្ច និងសង្គមរបស់ម៉ាលី គឺជាការជ្រោមជ្រែងមួយផ្នែក ដើម្បីទប់ស្កាត់ចលនាភេរវកម្មអ៊ីស្លាមជីហាត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
លោក អ៊ែឌ័រ ហ្វ៊ីលីព បានលើកឡើងថា នៅរវាងប៉ុន្មានឆ្នាំខាងមុខនេះ ទីភ្នាក់ងារបារាំង ដើម្បីការអភិវឌ្ឍន៍ នឹងដំឡើងកញ្ចប់ថវិការបស់ខ្លួន សម្រាប់ប្រទេសម៉ាលី។ លោកបន្តថា វាជាការចាំបាច់ណាស់ ដែលត្រូវតែបើកសមរភូមិប្រយុទ្ធ ដើម្បីបោសសំអាតក្រុមជីហាតភេរវកម្ម ក៏ប៉ុន្តែទន្ទឹមនឹងនេះ វាក៏ជាការចាំបាច់ដែរ ដែលត្រូវតែអភិវឌ្ឍន៍ម៉ាលី ឲ្យមានសន្តិភាពនិងភាពរុងរឿង។
តាមប្រភពឲ្យដឹងពីក្រុមការងារ អមដំណើររបស់លោកនាយករដ្ឋមន្ត្រីបារាំង គឺបារាំង នឹងផ្តល់ជំនួយសរុបចំនួន ៨៥លានអឺរ៉ូ ឲ្យដល់ម៉ាលី។ ក្នុងនោះ មាន៥០លានអឺរ៉ូ គឺជាកម្ចី ក្នុងទិសដៅយកទៅអនុវត្តគម្រោងបណ្តាញទឹកស្អាត នៅតាមទីក្រុងធំៗចំនួន៥ នៅភាគកណ្តាលប្រទេសម៉ាលី។ ប្រជាជនម៉ាលី ប្រមាណ៥សែននាក់ នឹងបានទទួលផលពីគំរោងនេះ។ ក្រៅពីនេះ គឺមាន១០លានអឺរ៉ូ ជាជំនួយឥតសំណង ជួយដល់រតនាគារជាតិម៉ាលី ដើម្បីទុកប្រើប្រាស់ ក្នុងករណីអាសន្នណាមួយ។ ១០លានអឺរ៉ូ ទៀត សម្រាប់អភិវឌ្ឍន៍ស្ថាប័នហិរញ្ញវត្ថុសាធារណៈ ហើយចុងក្រោយគឺ១៥លានអឺរ៉ូ សម្រាប់ធ្វើគំរោងបណ្តុះបណ្តាលវិជ្ជាជីវៈ ឲ្យដល់ប្រជាជនម៉ាលី ប្រមាណ៧៥០០នាក់។
សូមបញ្ជាក់ថា ម៉ាលី គឺជាប្រទេសអាហ្វ្រិកដ៏ធំ ហើយដែលតំបន់ភាគខាងជើង ស្ថិតក្នុងតំបន់សាហ៊ែលអាហ្វ្រិក ដែលកំពុងតែប្រឈមមុខខ្លាំង ជាមួយនឹងចលនាភេរវកម្មអ៊ីស្លាមជ្រុលនិយម។ បារាំង បានដឹកនាំកងកម្លាំងសម្ព័ន្ធមិត្ត រួមសហការជាមួយប្រទេសអាហ្វ្រិកមួយចំនួន ដើម្បីទប់ស្កាត់ចលនាភេរវកម្មនេះ។ បញ្ហាសន្តិសុខ អស្ថិរភាព និងបញ្ហាសេដ្ឋកិច្ច បានធ្វើឲ្យសមត្ថភាពហិរញ្ញវត្ថុម៉ាលី ចុះអន់ថយជាខ្លាំង ចាប់តាំងពីឆ្នាំ២០១២មក។
ប្រមាណ១០ឆ្នាំចុងក្រោយនេះ បារាំង បានផ្តល់ជំនួយនិងកម្ចីសរុបទៅឲ្យម៉ាលី ប្រហែលជា៧០០លានអឺរ៉ូ តាមរយៈគំរោងអភិវឌ្ឍន៍ផ្សេងៗ។ យ៉ាងណាមិញ នៅជាយក្រុងបាម៉ាកូ កាលពីព្រឹកថ្ងៃសៅរ៍ទី២៣កុម្ភៈ លោកអ៊ែឌ័រ ហ្វ៊ីលីព បានទៅបើកសម្ភោធស្ថានីយបូមទឹកមួយ នៅមាត់ទន្លេNiger។ គម្រោងផលិតទឹកស្អាត ដែលមានតម្លៃប្រមាណ៥០០លានអឺរ៉ូ មានបារាំងចូលរួម ជាមួយម្ចាស់កម្ចីឯកជនផ្សេងទៀត នឹងចាប់ដំណើរការ ពីពាក់កណ្តាលឆ្នាំ២០១៩ទៅ។ គំរោងនេះនឹងជួយផ្គត់ផ្គង់ទឹកស្អាត ឲ្យដល់ប្រជាជនម៉ាលី នៅក្រុងបាម៉ាកូ ប្រមាណជា១លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ