អេហ្ស៊ីបកំទេចជុំរុំហ្វឹកហាត់ពួកជីហាត នៅលីប៊ី មួយថ្ងៃក្រោយហេតុការណ៍សម្លាប់អ្នកកាន់សាសនាគ្រិស្ត២៨នាក់
កាលពីថ្ងៃទី ២៦ឧសភា ក្រុមជនបិទមុខមួយក្រុមបានស្ទាក់ បាញ់សម្លាប់អ្នកដំណើរ ២៨នាក់ ដែលជាអ្នកកាន់សាសនាគ្រិស្ត នៅខាងត្បូងចំងាយ២០០គីឡូម៉ែត្រ ពីទីក្រុងគែរ រដ្ឋធានីអេហ្ស៊ីប។ នេះមិនមែនជាលើកទីមួយទេ ដែលក្រុមជីហាតជ្រុលនិយម បានបាញ់សម្លាប់ជាក្រុម យ៉ាងព្រៃផ្សៃ ទៅលើសហគមអ្នកកាន់សាសនាគ្រិស្តិអេហ្ស៊ីប។ ទាហានអេហ្ស៊ីប បានឆ្លើយតបវិញ ដោយការបាញ់កម្ទេចទីតាំងហ្វឹកហាត់របស់ពួកជីហាត នៅក្នុងប្រទេសលីប៊ី ដែលអេហ្ស៊ីប ចោទថាគឺជារោងចក្រ ផលិតពួកជីហាតភេរវកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
យ៉ាងហោចណាស់ ស្លាប់២៨នាក់ ដែលក្នុងនោះមួយភាគធំគឺជាកុមារ។ រថយន្តបឺស របស់សហគមជនជាតិ Coptes ដែលជាសហគម អ្នកកាន់សាសនាគ្រិស្ត ធំបំផុតនៅអេហ្ស៊ីប កំពុងធ្វើដំណើរទៅកាន់ វិហារ Saint-Samuel ក្នុងខេត្ត Minya ចំងាយប្រមាណ២០០ គីឡូម៉ែត្រ ពីរដ្ឋធានីគែរ។ ក្រុមជនមិនស្គាល់មុខ ក្នុងរថយន្ត Pick-up បីគ្រឿង បានស្ទាក់បាញ់សម្លាប់ យ៉ាងព្រៃផ្សៃបំផុត។ ហេតុការណ៍សម្លាប់អ្នកកាន់សាសនាគ្រិស្តនេះ កើតឡើងមួយថ្ងៃ មុនថ្ងៃចាប់ផ្តើមរដូវបួស តមអាហារ របស់អ្នកកាន់សាសនាអ៊ីស្លាម។
សម្តេចប៉ាប ប្រមុខសង្ឃកាតូលិក បានប្រកាសចូលរួមរំលែកទុក្ខ ហើយបានថ្កោលទោស អំពើសម្លាប់ដ៏ព្រៃផ្សៃនេះ។ ដោយឡែក វិទ្យាស្ថាន Al-Azhar ដែលជាស្ថាប័នសំខាន់បំផុតនៃសាសានអ៊ីស្លាម និកាយស៊ុនីត ប្រចាំនៅទីក្រុងគែរ ក៏បានប្រកាសថ្កោលទោស អំពើយង់ឃ្នងនេះដែរ។ ទាំងលោក ប្រធានាធិបតីអាមេរិក និងរុស្ស៊ី សុទ្ធតែបានថ្កោលទោស ហើយថាអំពើនេះ ស្តែងឲ្យឃើញអំពីភាពព្រៃផ្សៃ របស់ពួកជីហាតភេរវកម្ម។
ពិធីបុណ្យសព្វ របស់ជនរងគ្រោះ ត្រូវបានរៀបចំឡើង ប្រកបដោយទុក្ខក្រៀមក្រោះ លាយឡំជាមួយនឹងកំហឹង។ ក្រុមគ្រួសារជនរងគ្រោះ បានចោទប្រកាន់ ពីការមិនយកចិត្តទុកដាក់ ដល់សន្តិសុខរបស់សហគមអ្នកកាន់សាសនាគ្រិស្តនៅអេហ្ស៊ីប ពីសំណាក់ អាជ្ញាធររដ្ឋាភិបាល។ នេះមិនមែនជាលើកទីមួយទេ ដែលសហគមអ្នកកាន់សាសនាគ្រិស្តអេហ្ស៊ីប បានរងនូវអំពើភេវកម្ម។ កាលពីខែធ្នូ ភេរវកម្មនៅវិហារគ្រិស្តសាសនាកណ្តាលក្រុងគែរ បានសម្លាប់មនុស្ស២៩នាក់។ ហើយនៅខែមេសាថ្មីៗនេះ ភេរវកម្មពីរផ្ទួនគ្នា បានកើតមានឡើងនៅវិហារគ្រិស្តសាសនារបស់សហគមជនជាតិCoptes ដែលបានសម្លាប់មនុស្ស៤៥នាក់។
បើទោះបីការសម្លាប់ជាក្រុម យ៉ាងសាហាវ កាលពីថ្ងៃ២៦ឧសភា មិនទាន់មានក្រុមភេរវកម្មណាចេញមកទទួល ដូចកាលពីភេវកម្មលើកមុនក៏ដោយ តែអាជ្ញាធរអេហ្ស៊ីប ប្រាកដណាស់ថាវាគឺជាស្នាដៃ របស់ពួកជីហាតអង្គការរដ្ឋអ៊ីស្លាម។ ក្រុមភេរវកម្មនេះ ធ្លាប់បានប្រកាសថា ពួកវានឹងបង្កើនសកម្មភាពភេរវកម្ម សម្លាប់អ្នកកាន់សាសនាគ្រិស្តនៅអេហ្ស៊ីប។
យ៉ាងណាមិញ ទាហានអាកាសអេហ្ស៊ីប បានទំលាក់គ្រាប់បែក៨គ្រាប់ កំទេចមូលដ្ឋានហ្វឹកហាត់របស់ពួកជីហាត នៅតំបន់ Derna ប្រទេសលីប៊ី។ លោក ប្រធានាធិបតី អេហ្ស៊ីប បានបញ្ជាក់ថា អេហ្ស៊ីប ប្តេជ្ញាទំលាក់គ្រាប់ កំទេចមូលដ្ឋាន ជង្រុកពួកជីហាតភេរវកម្ម មិនថានៅលើដីអេហ្ស៊ីប រឺនៅប្រទេសក្បែរខាងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ