នាយករដ្ឋមន្ត្រីឥណ្ឌាទៅអាហ្វ្រិក ដើម្បីពង្រឹងទីផ្សារសេដ្ឋកិច្ចប្រជែងជាមួយចិន
ចុះផ្សាយនៅថ្ងៃ៖
នាយករដ្ឋមន្ត្រីឥណ្ឌា លោក ណារិន្ទ្រ ម៉ូឌី កំពុងតែធ្វើទស្សនកិច្ចនៅក្នុងទ្វីបអាហ្វ្រិក នៅថ្ងៃទី៦ កក្កដានេះ។ នេះគឺជាដំណើរទស្សនកិច្ច ដែលមានខ្លឹមសារនយោបាយ និងសេដ្ឋកិច្ច សម្រាប់ឥណ្ឌា ក៏ដូចជាសម្រាប់ទ្វីបអាហ្វ្រិក។ ឥណ្ឌា ប្រទេសដែលមានសេដ្ឋកិច្ចកំពុងលេចធ្លោខ្លាំង នាពេលនេះ កំពុងត្រូវការទីផ្សារ វត្ថុធាតុដើម ដែលខ្លួនត្រូវការដើម្បីតម្រូវការផលិត។ ថ្វីត្បិតតែវត្តមានរបស់ឥណ្ឌា បានមកដល់យឺតពេលបន្តិចក្រោយចិន តែទ្វីបអាហ្វ្រិកដ៏សែនធំនេះ នៅមិនទាន់ចង្អៀតសម្រាប់ឥណ្ឌាទេ។
តាមការគ្រោងទុក លោកនាយករដ្ឋមន្ត្រីឥណ្ឌានឹងអញ្ជើញទៅប្រទេស ម៉ូហ្សំប៊ិក មុនគេ ដែលសម្រាប់ប្រទេសនេះ គឺអស់រយៈពេល៣៤ឆ្នាំហើយ មិនដែលមានមេដឹកនាំឥណ្ឌាណាមកធ្វើទស្សនកិច្ចទេ។ បន្ទាប់មកទៀត លោកណារិន្ទ្រម៉ូឌី នឹងអញ្ជើញទៅប្រទេសអាហ្វ្រិកខាងត្បូង ប្រទេសតង់ហ្សានី និងប្រទេសកេនយ៉ា។
លោកណារិន្ទ្រម៉ូឌី ទៅទ្វីបអាហ្វ្រិក តែមិនមែនទៅប្រទេសដែលមានចលាចលនយោបាយ រឺក៏ប្រទេសដែលមានសង្រ្គាមទេ។ យើងឃើញថាក្នុងចំណោមប្រទេសទាំងបួននេះ គឺសុទ្ធសឹងជាប្រទេសនៅភាគខាងកើតនិងខាងត្បូងនៃទ្វីបអាហ្វ្រិក ហើយជាប្រទេសដែលមានស្ថិរភាពនយោបាយល្អជាងគេ នៅអាហ្វ្រិក។
បន្តបេសកកម្ម បន្ទាប់ពីជំនួបកំពូលឥណ្ឌា-អាហ្វ្រិក៖
ដំណើរទស្សនកិច្ចនេះ គឺវាធ្វើឡើង បន្ទាប់ពីលោកណារិ ន្ទ្រម៉ូឌី បានមានគំនិតរៀបចំ ជំនួបកំពូលពិសេសមួយ រវាងឥណ្ឌានិងអាហ្វ្រិក កាលពីខែតុលាឆ្នាំ២០១៥។ ជំនួបកំពូលនេះ គឺជាជោគជ័យសម្បើមណាស់ សម្រាប់នយោបាយការទូត ក៏ដូចជាសេដ្ឋកិច្ចរបស់លោក ណារិន្ទ្រ ម៉ូឌី ហើយប្រទេសអាហ្រ្វិកមួយចំនួនធំ បានត្រលប់ទៅផ្ទះវិញដោយពាំនាំទៅជាមួយ នូវការសន្យាជាច្រើនរបស់ឥណ្ឌា ដូចជាជំនួយឥតសំណង និង កម្ចីឥណ្ឌទាន ក្នុងការប្រាក់ទាបជាច្រើនពាន់លានដុល្លារ ទៀតផង។
កាលពីជំនួបកំពូលខែតុលា លោកនាយករដ្ឋមន្ត្រីឥណ្ឌា បានប្រកាសថា នឹងផ្តល់ប្រាក់កម្ចីឥណ្ឌទាន ដល់ប្រទេសទ្វីបអាហ្វ្រិក ពីនេះ៥ឆ្នាំទៅមុខ ក្នុងទឹកប្រាក់១០ពាន់លានដុល្លារ។ ហើយឥណ្ឌា សន្យាផ្តល់អាហារូបករណ៍ចំនួន ៥ម៉ឺនកន្លែង ដល់និស្សិតអាហ្វ្រិក ដើម្បីមកបន្តការសិក្សាក្នុងសកលវិទ្យាល័យរបស់ឥណ្ឌា។
ដូច្នេះ លោកម៉ូឌី ទៅធ្វើទស្សនកិច្ច នៅតាមប្រទេសអាហ្វ្រិកទាំងបួន នាពេលនេះ គឺគ្មានអ្វីក្រៅពីដើម្បីបញ្ជាក់ពីការសន្យា ព្រមទាំងរឹតចំណងសហប្រតិបត្តិការ ដែលវាជាគោលដៅធំរបស់នយោបាយសេដ្ឋកិច្ចឥណ្ឌា។
ប្រជែងជាមួយចិន ដើម្បីយកទីផ្សារនៅអាហ្វ្រិក៖
ជាការពិត ទស្សនកិច្ចនេះ គឺជាការប្រឹងប្រែងផ្នែកការទូតរបស់ឥណ្ឌាខ្លាំងណាស់ ដើម្បីបន្តបង្ហាញវត្តមានរបស់ឥណ្ឌា នៅទ្វីបអាហ្វ្រិក ជាពិសេសដើម្បីប្រកួតប្រជែងជាមួយនឹងចិន ដែលបានទៅដល់មុន ហើយបានបូមយកទីផ្សារយ៉ាងក្រាស់ក្រែល។
ទាំងឥណ្ឌាទាំងចិន សុទ្ធសឹងជាប្រទេសកំពុងអភិវឌ្ឍន៍ និងដែលមានទំងន់សេដ្ឋកិច្ចធ្ងន់ណាស់ នៅលើទីផ្សារអន្តរជាតិ។ ដូច្នេះប្រទេសទាំងពីរ ត្រូវការស្វែងរកនិរន្តរភាព នៃវត្ថុធាតុដើម ដែលខ្លួនត្រូវការដើម្បីផលិតផលរបស់ខ្លួន។ ហើយវត្ថុធាតុដើម សំខាន់បំផុតសម្រាប់ឥណ្ឌា គឺរ៉ែកម្រនានា ដែលគេត្រូវការដើម្បីផលិតជាគ្រឿងផ្សំនៃឧបករណ៍អេឡិចត្រូនិក ដូចជាទូរស័ព្ទ ទូរទស្សន៍ រឺកុំព្យូទ័រជាដើម។ ផលិតផលទាំងអស់នេះ គឺជាចំណុចខ្លាំងរបស់សេដ្ឋកិច្ចឥណ្ឌា។ ក្រៅពីចង់បានវត្ថុធាតុដើមពីអាហ្វ្រិក ឥណ្ឌាក៏ត្រូវការលក់ផលិតផលរបស់ខ្លួន នៅក្នុងទីផ្សាររបស់អាហ្វ្រិកដែរ។
បើយើងនិយាយពីការដោះដូរពាណិជ្ជកម្ម ព្រមទាំងទុនវិនិយោគសរុបរវាងឥណ្ឌា និងអាហ្វ្រិក យើងសង្កេតឃើញថាវាបានកើនឡើងខ្លាំង គឺ មាន៣ពាន់លានដុល្លារ នៅរវាងឆ្នាំ២០០០ បានកើនរហូតដល់៧០ពាន់លានដុល្លារ នៅឆ្នាំ២០១៥។ តែបើយើងប្រៀបធៀបជាមួយនឹងចិន គឺថាឥណ្ឌានៅចាញ់ចិនឆ្ងាយ ព្រោះទំនាក់ទំនងពាណិជ្ជកម្មរវាងចិន និងអាហ្វ្រិក គឺមានដល់ទៅ២១០ពាន់លានដុល្លារ ឯណោះក្នុងឆ្នាំ២០១៥។
តែយ៉ាងណាក៏ដោយ ឥណ្ឌាកំពុងតែពង្រីកខ្លួន កាន់តែធំនៅអាហ្រ្វិក ហើយមានប្រៀបជាងចិន ជាពិសេសក្នុងវិស័យផលិតថាមពល និងការជំរុញឲ្យមានសហគ្រិនឯកជនឥណ្ឌា តាមរយៈប្រជាជនឥណ្ឌា ប្រមាណជា១លាន៣សែននាក់ ដែលរស់នៅក្នុងទ្វីបអាហ្វ្រិក។ ជាឧទាហរណ៍ ជាមួយនឹងប្រទេសអាហ្វ្រិកខាងត្បូង ឥណ្ឌាគឺជាដៃគូសេដ្ឋកិច្ចទី៦ ហើយនៅ២០១៦នេះ ការដោះដូរពាណិជ្ជកម្មរវាងប្រទេសទាំងពីរបានកើនដល់ ៥៣០០លានដុល្លារ។ យ៉ាងណាមិញ លោក Amar Sinha អ្នកទទួលបន្ទុកកិច្ចការសេដ្ឋកិច្ច នៃក្រសួងការបរទេសឥណ្ឌា បានបញ្ជាក់ថា ទ្វីបអាហ្វ្រិកត្រូវការការអភិវឌ្ឍន៍ហេដ្ឋារចនាសម្ព័ន្ធ ជាចំបង។ ហើយទ្វីបអាហ្វ្រិកធំណាស់ ដូច្នេះ កន្លែងនៅមិនទាន់ចង្អៀតទេ ប្រទេសណាក៏អាចទៅបោះទុនរកស៊ីបានដែរ។
ចង់ខ្ចីកម្លាំងអាហ្រ្វិក ដើម្បីសម្រេចយុទ្ធសាស្ត្រភូមិសាស្ត្រនយោបាយ៖
ធម្មតាយុទ្ធសាស្ត្រសេដ្ឋិកិច្ច គឺតែងតែដើរស្របជាមួយនឹងយុទ្ធសាស្ត្រការទូត រឺភូមិសាស្ត្រនយោបាយ។ ឥណ្ឌា ដឹងថាខ្លួនមានទំងន់កម្រិតណា នៅលើឆាកអន្តរជាតិ។ ទម្ងន់នេះ គឺបានដោយសារប្រជាជនជាងមួយកោដនាក់របស់ខ្លួន។ តាមការព្យាករណ៍ ប្រជាជនឥណ្ឌា អាចនឹងកើនឡើងលើសចិន ក្នុងពេលដ៏ឆាប់ខាងមុខនេះ ដោយសារនៅឥណ្ឌា គេពុំមានច្បាប់ហាមឃាត់ មិនឲ្យមានកូនលើសពីមួយដូចនៅចិនទេ។
បរិបទភូមិសាស្ត្រនយោបាយពិភពលោក អស់រយៈពេលកន្លះសតវត្សមកនេះ គឺវានៅដដែល ដែលជាទូទៅគឺស្ថិតក្រោមឥទ្ធិពល និងការចង់បានរបស់មហាអំណាចធំៗទាំង៥ នៅក្នុងក្រុមប្រឹក្សាសន្តិសុខអង្គការសហប្រជាជាតិ។ មហាអំណាចទាំង៥នោះគឺនរណា គឺមានតែអាមេរិក ចិន រុស្ស៊ី បារាំង និងអង់គ្លេស នេះឯង។
អ្វីដែលជាចេតនារបស់ឥណ្ឌានៅពេលនេះ គឺចង់ផ្លាស់ប្តូរទម្លាប់ចាស់ នៃបរិបទភូមិសាស្ត្រនយោបាយពិភពលោក ព្រោះអ្វីៗលែងដូចមុនហើយ។ ឥណ្ឌាចង់ចាប់ដៃជាមួយអាហ្វ្រិក ពោលគឺចង់បានការគាំទ្រពីអាហ្រ្វិក ព្រោះប្រជាជនអាហ្វ្រិក និងឥណ្ឌា បើបូកចូលគ្នាគឺស្មើ នឹង១ភាគ៣ នៃប្រជាជនទូទាំងសកលលោក។ តែផ្ទុយទៅវិញ ឥណ្ឌានិងអាហ្វ្រិក គ្មានសម្លេងអី នៅក្នុងក្រុមប្រឹក្សាសន្តិសុខ នៃអង្គការសហប្រជាជាតិទេ។ អ្នកសម្រេច អ្នកមានសិទ្ធិវ៉េតូ គឺមានតែសមាជិកអចិន្ត្រៃយ៍ទាំង៥ដដែល។
គឺក្នុងន័យនេះហើយ ទើបឥណ្ឌាចង់អូស ប្រទេសអាហ្វ្រិកខាងត្បូង ដែលជាប្រទេសខ្លាំងជាងគេនៅអាហ្វ្រិក ឲ្យមកតស៊ូតវ៉ាជាមួយខ្លួន ដើម្បីធ្វើកំណែទម្រង់នៅក្នុងអង្គការសហប្រជាជាតិ។ មហិច្ឆិតាឥណ្ឌា គឺចង់បានកៅអីជាសមាជិកអចិន្ត្រៃយ៍ នៃក្រុមប្រឹក្សាសន្តិសុខ នឹងគេម្នាក់ដែរ។ បើចិនអាចជាសមាជិកអចិន្ត្រៃយ៍បាន រឿងអីឥណ្ឌាមិនអាចធ្វើបាន? វាដូចជាអយុត្តិធម៌ពេក។
តែយ៉ាងណា នេះគឺជាមហិច្ឆិតារបស់ឥណ្ឌា។ បានផលយ៉ាងណា យើងមិនទាន់ដឹងទេ។ តើប្រទេសមហាអំណាចទាំង៥ ព្រមបើកផ្លូវទទួលឥណ្ឌាដែររឺទេ? មិនប្រាដកទេ។ ហើយមួយទៀត មិនប្រាកដថា ប្រទេសអាហ្វ្រិកទាំងអស់ គាំទ្រឥណ្ឌាដែរ ក្នុងបញ្ហានេះ។ ជាក់ស្តែងកាលពីឆ្នាំ២០០៦ ពេលដែលឥណ្ឌាដាក់បេក្ខភាពជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខ ជាមួយជប៉ុន គឺប្រទេសអាហ្វ្រិកភាគច្រើន បានបោះឆ្នោតឲ្យជប៉ុនជាប់ទៅវិញ។ ក៏ប៉ុន្តៃអ្វីដែលយើងដឹងនៅពេលនេះ គឺថាឥណ្ឌាមិនទាន់បោះបង់កិច្ចប្រឹងប្រែងរបស់ខ្លួនទេ។ ជំនួបកំពូលឥណ្ឌា អាហ្វ្រិក នឹងបើកធ្វើម្តងទៀតនៅឆ្នាំ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ