សហភាពអាហ្វ្រិកផ្តុំគ្នាប្រយុទ្ធប្រឆាំងនឹងពួកភេរជនបូកូអារ៉ាម
ចុះផ្សាយនៅថ្ងៃ៖
ស្តាប់ - ០៥:៥៣
ជំនួបកំពូលប្រចាំឆ្នាំសហភាពអាហ្វ្រិកលើកទី ២៤ ត្រូវបើកជាផ្លូវការនៅថ្ងៃសុក្រនេះ នៅប្រទេសអេត្យូពី សម្រាប់រយៈពេលពីរថ្ងៃ។ ការស្ទុះឡើងនៃចលនាភេរវនិយមអ៊ីស្លាមបូកូអារ៉ាម ជម្លោះបង្ហូរឈាមនៅស៊ូដង់ខាងត្បូង ការបោះឆ្នោតដ៏គ្រោះថ្នាក់ក្នុងបណ្តាប្រទេសអាហ្វ្រិកនៅឆ្នាំ ២០១៥ ព្រមទាំងការរាតត្បាតនៃជំងឺគ្រុនឈាម អេបូឡា កំពុងរង់ចាំប្រមុខរដ្ឋ-រដ្ឋាភិបាល និងតំណាងជាន់ខ្ពស់ប្រទេសជាច្រើនរបស់អាហ្វ្រិក។ ប៉ុន្តែ ដោយហេតុបរិបទគំរាមកំហែងភេរវកម្មពិភពលោក ការស្វែងរកដំណោះស្រាយរួមដើម្បី កម្ចាត់ពួកបូកូអារ៉ាម ទំនងជាប្រធានបទក្តៅគគុកជាងគេ ព្រោះពួកអ៊ីស្លាមនិយមជ្រុលនេះកំពុងបង្កើនការវាយប្រហារខ្លាំងនៅភាគខាងជើងប្រទេសនីហ្សេរីយា និងនៅប្រទេសកាមឺរូនជិតខាង។
ពួកបូកូអារ៉ាម ដែលមានកម្លាំងស្ទុះឡើងជារហូត បានបង្កឱ្យមានមនុស្សស្លាប់ជាង១៣០០០នាក់ គិតចាប់ពីឆ្នាំ២០០៩មក។ ហើយពេលនេះ សកម្មភាពភេរវកម្មនិងការវាយប្រហារប្រដាប់ កំពុងតែវាតទី រាលពីភាគខាងជើងប្រទេសនីហ្សេរីយ៉ា ទៅដល់តំបន់វាលទំនាបទន្លេឆាដ តាមបណ្តោយព្រំដែនជាមួយឆាត និងកាមឺរូន។ ដូច្នេះហើយបានជាលោកស្រីប្រធានគណៈកម្មការសហភាពអាហ្វ្រិក ចង់សហភាពបង្កើតឱ្យបានកាន់តែឆាប់កងពលអន្តរជាតិ ព្រោះ បូកូអារ៉ាម ជាការគំរាមកំហែងរបស់តំបន់អាហ្វ្រិកទាំងមូលឱ្យរងអស្ថិរភាព និងផលវិបាកមនុស្សធម៌ និងជាការគំរាមកំហែងថ្នាក់ពិភពលោកទាំងមូល ដែលត្រូវប្រយុទ្ធរួមគ្នាថ្នាក់ពិភពលោក ដោយមានអាហ្វ្រិកជានាំមុខ។
សហភាពអាហ្វ្រិក គាំទ្រការប្រមូលកម្លាំងទ័ព៧៥០០នាក់
សហភាពអាហ្វ្រិកចង់ប្រមូលផ្តុំគ្នា រួចបញ្ចេញសកម្មភាពរួម។ ល្ងាចមិញ ក្រុមប្រឹក្សាដើម្បីសន្តិភាពនិងដើម្បីសន្តិសុខរបស់សហភាព បានព្រមព្រៀងបង្កើតឱ្យមានកម្លាំងកងទ័ពប្រចាំតំបន់ ចំនួន៧៥០០នាក់ ជាកងពលពិសេសសម្រាប់ប្រយុទ្ធប្រឆាំងនឹងពួកបូកូអារ៉ាម។
ប្រទេសជាសមាជិកសហភាពមានភារៈផ្តល់កម្លាំងទ័ព ក្នុងក្របខ័ណ្ឌសហប្រតិបត្តិការយោធាអន្តរជាតិ(ប្រទេសក្នុងអាហ្វ្រិក) ដែលប្រមុខរដ្ឋនិងរដ្ឋាភិបាល ទាំង១៥មានវត្តមានក្នុងជំនួបកំពូលលើកទី២៤នេះត្រូវផ្តល់សេចក្តីសម្រេចចិត្ត។
កម្មវត្ថុចំបងមួយទៀត គឺសហភាព ចង់បានការគាំទ្រពីអង្គការសហប្រជាជាតិ។ នៅខែក្រោយសហភាពអាហ្វ្រិក នឹងឡើង ជាផ្លូវការទៅកាន់ក្រុមប្រឹក្សាសន្តិសុខអង្គការសហប្រជាជាតិ ដើម្បីស្នើសុំជំនួយហិរញ្ញវត្ថុ និងផ្តល់មធ្យោបាយដល់កងកម្លាំងតំបន់ទាំង៧៥០០នាក់ សម្រាប់ទប់ទល់ប្រយុទ្ធប្រឆាំងនឹងពួកបូកូអារ៉ាម។ ក្នុងដំណាក់កាលដំបូង បេសកកម្មរបស់កងទ័ពអន្តរជាតិអាហ្វ្រិកនេះ មានរយៈពេលមួយឆ្នាំ និងមានទិសដៅចេញប្រយុទ្ធទប់ស្កាត់ដំណើររីកសាយភាយរបស់ពួកភេរវជនបូកូអារ៉ាម -របស់ពួកភេរវជនផ្សេងទៀត និងកម្ចាត់វត្តមានរបស់ក្រុមភេរវនិយម។
សហភាពអាហ្វ្រិកគ្មានឥទ្ធិពល
ឆន្ទៈនិងការអំពាវនាវរកឯកភាពអាហ្វ្រិកដើម្បីប្រយុទ្ធប្រឆាំងនឹងពួកភេរវជនបូកូអារ៉ាម បានលាន់ឮខ្លាំង គ្មានប្រៀបទេពេលនេះ ប៉ុន្តែមើលទៅដូចជាមិនងាយសម្រេចបានទេ។
នីហ្សេរីយ៉ា ជាប្រភពដើមរបស់បូកូអារ៉ាម ជាប្រទេសរងគ្រោះផ្ទាល់ជាងគេ តែនៅពេលមានជំនួបប្រជុំតំបន់នៃបណ្តាប្រទេសក្នុងវាលទំនាបទន្លេឆាដលើប្រធានបទភេរវនិយមនេះ នីហ្សេរីយ៉ា បញ្ជូនត្រឹមតំណាងជាន់ទាប។ ពេលមានកិច្ចពិភាក្សាក្រុមប្រឹក្សារដ្ឋមន្ត្រីសហភាពអាហ្វ្រិកមុនជំនួបកំពូល រដ្ឋមន្ត្រីនីហ្សេរីយ៉ាអវត្តមាន។ ហើយនៅថ្ងៃនេះ ថ្ងៃបើកជាផ្លូវការជំនួបកំពូលប្រចាំឆ្នាំ ប្រធានាធិបតីនីហ្សេរីយ៉ា ក៏មិនមកចូលរួមទៀត ដោយយកលេសថារវល់ឃោសនាបោះឆ្នោត។ ការបោះឆ្នោតប្រធានាធិបតីនៅខែកុម្ភៈ ខាងមុខដែលនីហ្សេរីយាអាចនឹងមានប្រធានាធិបតីថ្មី បន្តពីលោកGoodluck Jonathan។ អញ្ចឹងហើយបានជាប្រទេសជិតខាងមានពាក្យ ចោទប្រកាន់ថានីហ្សេរីយ៉ា មិនខ្វល់ទប់ស្កាត់ពួកបូកូអារ៉ាម។
ចំណែកឯការប្រមូលកម្លាំងទ័ពវិញ ការបង្កើតកម្លាំងអន្តរប្រទេស បីពាន់នាក់ កាលពីចុងឆ្នាំ២០១៤ ត្រឹមក្រុមបីបួនប្រទេសជុំវិញតំបន់វាលទំនាបឆាដ (នីហ្សេរីយ៉ា ឆាដ កាមឺរូន នីហ្សេ និងបេណាំង) មិនទាន់អាចបញ្ចេញសកម្មភាពបានស្រួលបួលផង ព្រោះ នីហ្សេរីយ៉ាមិនត្រូវជាមួយអ្នកជិតខាងខ្លួន។ ឆាដនិងកាមឺរូនប្រឹងការពារខ្លួនជាមួយគ្នាតែពីរនាក់។ ប្រធានាធិបតី កាមឺរូន ក៏មិនមកចូលរួមក្នុងជំនួបប្រចាំឆ្នាំនេះដែរ។
បើនិយាយជារួម ជាលក្ខណៈទូទៅវិញ សហភាពអាហ្វ្រិកនេះជាប់ឈ្មោះមិនល្អ គ្មានអំណាច គ្មានទឹកមាត់ទេ។ មានតែសេចក្តីថ្លែងការណ៍តែមិនដែលមានអ្វីចេញជាសកម្មភាព ឬជាការអនុវត្តន៍ឡើយ មិនថាក្នុងដំណោះស្រាយនយោបាយ សិទ្ធិមនុស្ស ឬសន្តិសុខនេះទេ។ លើសពីនេះទៅទៀត សហភាពអាហ្វ្រិកនឹងត្រូវមានប្រធានផ្លាស់វេនថ្មី ដែលលើកនេះគឺជារូប មេដឹកនាំផ្តាច់ការ រ៉ូប៊ែរ ម៉ូហ្កាបេ (Robert Mogabet) អាយុ៩០ឆ្នាំ កាន់អំណាចតាំងពីប្រទេសហ្ស៊ីមបាវេ បានឯករាជ្យនៅឆ្នាំ១៩៨០មក និងជាប់ចោទបានប្រព្រឹត្តអំពើហិង្សាដើម្បីឈ្នះបោះឆ្នោត។ ជាប់ទណ្ឌកម្មអឺរ៉ុប អាមេរិក ប្រឆាំងនឹងបស្ខឹមប្រទេស ឥលូវក្លាយជាមេដឹកនាំសហភាពលើឆាកអន្តរជាតិ តើឱ្យអាហ្វ្រិកសង្ឃឹមអ្វី?!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ