អង្គការសហប្រជាជាតិអំពាវនាវឱ្យទុយនីស៊ីទប់់ស្កាត់ចលនាចូលធ្វើជីហាត
ក្រុមជំនាញអង្គការសហប្រជាជាតិបានអំពាវនាវឱ្យមានការទប់ស្កាត់ចលនាយុវជនចូលធ្វើជីហាតនៅប្រទេសទុយនីស៊ី ព្រោះបើតាមការប៉ាន់ស្មាន មានយុវជនទុយនីស៊ីមិនតិចជាង ៥៥០០នាក់ទេ បានចូលទៅបម្រើអង្គការអ៊ីស្លាមជ្រុលនិយមជីហាតនៅស៊ីរីនិងនៅអ៊ីរ៉ាក់។ សេចក្តីអំពាវនាវនេះ ធ្លាក់មកជួនចំពេសដែលបណ្តាប្រទេសនៅអឺរ៉ុបជាច្រើន កំពុងប្រកូកប្រកាសហៅពលរដ្ឋរបស់ខ្លួនឱ្យចាកចេញពីប្រទេសទុយនីស៊ី ដើម្បីគេចពីគ្រោះគំរាមកំហែងភេរវកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
នៅក្នុងរបាយការណ៍របស់ក្រុមការងារអង្គការសហប្រជាជាតិ ចលនាយុវជនទុយនីស៊ីចូលទៅបម្រើជីហាតនៅបរទេស មានចំនួនច្រើនជាងបង្អស់មួយក្នុងចំណោមប្រទេសដែលពលរដ្ឋចេញទៅធ្វើជីហាតនៅបរទេស។ មានអាយុជាមធ្យមក្មេងខ្លាំង ពី ១៨-៣៥ឆ្នាំ យុវជនទុយនីស៊ីចូលជីហាតមិនប្រាកដថាជាក្មេងក្នុងគ្រួសារក្រីក្រ ថ្នាក់ទាបក្នុងសង្គមឡើយ ខ្លះធ្វើដំណើរទៅស៊ីរី ខ្លះទៅអ៊ីរ៉ាក់ និងខ្លះទៀត ទៅប្រទេសយ៉េមែន ឬលីប៊ីជិតខាង។
ក្រោយបដិវត្តឆ្នាំ២០១១មក ចលនាជីហាតបានរីកធំធាត់ខ្លាំង។ ចលនាជីហាតអ៊ីស្លាមជ្រុលនិយមដែលបានបង្កភេវកម្មសម្លាប់ជីវិតប៉ូលិស ទេសចរបរទេសអស់ ជាច្រើននាក់ និងជាច្រើនសា រហូតដល់រដ្ឋាភិបាលចេញក្រិត្យដាក់ប្រទេសក្នុងភាពអាសន្នចំនួន៣០ថ្ងៃគិតចាប់ពី ថ្ងៃទី ៤កក្កដា។
ប្រឈមមុខនឹងស្ថានភាពអស្ថិរភាព និងហានិភ័យភេរវកម្មជីហាតអ៊ីស្លាមជ្រុលនិយមដូច្នេះ បណ្តាប្រទេសធ្លាប់មានពលរដ្ឋរងគ្រោះដូចយ៉ាងអង់គ្លេសបានប្រកាសណែនាំឱ្យពលរដ្ឋរបស់ខ្លួន តាំងពីថ្ងៃព្រហស្បតិ៍មក ចាកចេញពីទុយនីស៊ី ហើយរដ្ឋាភិបាលដាណឺម៉ាក ក៏ដូចគ្នាបានចេញអនុសាសន៍នៅថ្ងៃសុក្រនេះ ឱ្យទេសចរដាណឺម៉ាកត្រលប់ចូលស្រុកតាមគ្រប់វិធី ដោយមធ្យោបាយផ្ទាល់ខ្លួន ឬតាមរយៈក្រុមទេសចរណ៍។ ដូចគ្នានេះដែរ ប្រទេសហ្វាំងឡង់ បានប្រកាសជូនដំណឹងអំពីហានិភ័យភេរវកម្មឡើងខ្ពស់ខ្លាំងនៅទុយនីស៊ី និងចេញបម្រាមនៅក្នុងវិបសៃតិ៍មិនឱ្យឱ្យពលរដ្ឋធ្វើដំណើរទៅទុយនីស៊ី។
ចំណែកបារាំងវិញ ដែលកំពុងកាត់ទោសមេក្រុមអ៊ីស្លាមជ្រុលនិយមតូចមួយឱ្យជាប់ពន្ធនាគារ៩ឆ្នាំពីបទបង្កើតចលនាពាក់ព័ន្ធនឹងសកម្មភាពភេរវនិយម មិនទាន់ឃើញមានប្តូរផ្លាស់អនុសាសន៍អ្វីទេ ក្រៅអំពីអំពាវនាវឱ្យពលរដ្ឋមានការប្រុងប្រយ័ត្ន និងកុំធ្វើដំណើរទៅកាន់តំបន់ជាប់ព្រំដែនលីប៊ី បើគ្មានការចាំបាច់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ