កេនយ៉ាអំពាវនាវឲ្យគេឈប់ជួញដូរភ្លុកដំរីទាំងស្រុង
គោលដៅដើម្បីការពារនៅក្នុងជំនួបកំពូលអាហ្វ្រិកមួយនៅទីក្រុង Nanyuki ក្នុងប្រទេសកេនយ៉ាលោក Uhuru Kenyatta ប្រធានាធិបតីកេនយ៉ានៅថ្ងៃសុក្រនេះ បានអំពាវនាវឲ្យមានការហាមទាំងស្រុងជំនួញភ្លុកដំរី។ ការអំពាវនាវរបស់លោកប្រធានាធិបតីកេនយ៉ានេះ គឺម្យ៉ាងចង់រក្សាការពារភាពធម្មជាតិនៃសត្វដំរីព្រៃផងនិងម្យ៉ាងទៀតការពារថែរក្សាកុំឱ្យវាផុតពូជ ដោយសារតែពួកជនល្មើសតាមប្រមាញ់ដើម្បីយកភ្លុកទៅធ្វើជំនួញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
“បាត់បង់សត្វដំរីព្រៃ គឺជាការបាត់បង់កេរ្ត៍មរតកដ៏សំខាន់មួយផ្នែករបស់យើងរាល់រូបដែលជាប្រជាជនអាហ្វ្រិក។ ដូច្នេះ ប្រជាជនអាហ្វ្រិក ត្រូវតែមានមនៈសិការខ្ពង់ខ្ពស់ ក្នុងការជួយទ្រទ្រង់ការពារថែរក្សា សម្បត្តិទ្រព្យធម្មជាតិរបស់ខ្លួន ដោយមិនអនុញ្ញាតឲ្យមានការបំផ្លិចបំផ្លាញសម្បត្តិធម្មជាតិនេះតទៅថ្ងៃមុខទៀតទេ”-នេះហើយជាប្រសាសន៍របស់ប្រធានាធិបតីកេនយ៉ា លោក Kenyatta នៅពេលបើកជំនួបកំពូលនៅក្រុង Nanyuki ភាគកណ្តាលប្រទេសកេនយ៉ា។
ចូលរូមក្នុងជំនួបកំពូលនេះ មានប្រធានាធិបតីប្រទេស កេនយ៉ា អ៊ូហ្កង់ដា ហ្កាបុង ក៏ព្រមទាំងក្រុមអង្គការក្រៅរដ្ឋាភិបាលមួយចំនួនធំផងដែរ។ ជំនួបកំពូលនេះ ត្រូវបានធ្វើឡើងនៅមុនពេល នៃការដុតរំលាយចោលកន្លែងស្តុកទុកភ្លុកដំរីដ៏ធំសម្បើមអស្ចារ្យមួយនៅថ្ងៃសៅរ៍ស្អែកនេះ។ ភ្លុកដំរីព្រៃដែលនឹងត្រូវដុតបំផ្លាញចោលនៅថ្ងៃស្អែកនេះ មានទម្ងន់១០៥តោន ឬស្មើនឹងចំនួន៥%នៃការស្តុកភ្លុកដំរីនៅលើលោក។
លោក Kenyatta បានថ្លែងសុំឲ្យប្រជាជនអាហ្វ្រិកទាំងអស់នៅលើលោក កុំឲ្យនៅព្រងើយកន្តើយនៅចំពោះមុខនៃការរលាយសាបសូន្យនៃពូជសត្វដំរីនៅតំបន់អាហ្វ្រិក”។
លោកប្រធានាធិបតីកេនយ៉ា បាននិយាយធានាដែរថា”នៅឱកាសកិច្ចប្រជុំនាលើកក្រោយស្តីពីអនុសញ្ញាពាណិជ្ជកម្មអន្តរជាតិ សត្វព្រៃនិងរុក្ខជាតិព្រៃនៅខែកញ្ញាខាងមុខនៅក្នុង ទីក្រុង Johannesburg ប្រទេសអាហ្វ្រិកខាងត្បូង លោកនឹងអំពាវនាវសុំឲ្យមានការហាមឃាត់ទាំងស្រុង ការជួញដូរភ្លុកដំរីព្រៃ”។
ជារៀងរាល់ឆ្នាំ សត្វដំរី ប្រមាណជា៣ម៉ឺនត្រូវបានពួកប្រមាញ់ បាញ់សម្លាប់ដើម្បីកាត់យកភ្លុក។ ផលវិបាកមានកំរិតដ៏ធ្ងន់ធ្ងរ បូកផ្សំទាំងការស្លាប់តាមធម្មជាតិរបស់ដំរីផងនិងដំរីដែលត្រូវស្លាប់ដោយស្នាដៃពួកប្រមាញ់ផង ចំនួនសត្វដំរីស្លាប់ បានកើនលើសអត្រាបន្តពូជនៃប្រភេទសត្វនេះ។ ម្យ៉ាងទៀតតាមការប្រមាណរបស់អ្នកជំនាញ ការរស់រានមានជីវិតរបស់សត្វដំរីព្រៃនៅអាហ្វ្រិក ប្រហែលជានឹងអាចនឹងរលាយបាត់បង់នៅក្នុងរយៈពេលពីមួយជំនាន់ទៅពីរជំនាន់ទៀតប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ