លីប៊ី៖កម្លាំងរដ្ឋាភិបាលកំពុងវាយសម្រុកដណ្តើមទីក្រុងសៀតពីអង្គការរដ្ឋអ៊ីស្លាម
នៅក្នុងប្រទេសលីប៊ី កម្លាំងរដ្ឋាភិបាលកំពុងបោះជំហានឈានទៅដណ្តើមយកទីក្រុងសៀតពីកណ្តាប់ដៃអង្គការរដ្ឋអ៊ីស្លាមមកវិញ។ បន្ទាប់ពីបើកការវាយប្រយុទ្ធក្រោមទ្រង់ទ្រាយធំនាថ្ងៃព្រហស្បតិ៍ ទី៩ និងថ្ងៃសុក្រ ទី១០ មិថុនាមក ទ័ពរដ្ឋាភិបាលបានផ្តើមចូលក្នុងដែនដីទីក្រុងសៀត និងសង្ឃឹមចូលកាន់កាប់ទាំងស្រុងនាប៉ុន្មានថ្ងៃខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
សៀតជាទីក្រុងកំពុងផែមួយដ៏សំខាន់របស់លីប៊ីដែលមានចម្ងាយប្រមាណជា ៤៥០គីឡូម៉ែត្រស្ថិតប៉ែកខាងកើតទីក្រុងទ្រីប៉ូលី។ ដូច្នេះសម្រាប់អង្គការរដ្ឋអ៊ីស្លាម ការបាត់បង់ដែនដីសៀតនៅលីប៊ី ជាការបាត់បង់មួយបន្ថែមទៀតធំណាស់ បន្ទាប់ពីបានបាត់បង់ដែនដីមួយចំនួននៅក្នុងទឹកដីស៊ីរី និងអ៊ីរ៉ាក់នារយៈពេលចុងក្រោយនេះ។ ប្រេសិតពិសេសរបស់លោកប្រធានាធិបតីអាមេរិកអូបាម៉ាបានប្រាប់ឲ្យដឹងថា បន្ទាប់ពីបានបើកការវាយប្រហារផ្លូវគោក ផ្លូវទឹក និងផ្លូវអាកាសយ៉ាងគំហុកនារយៈពេលចុងក្រោយមក ទ័ពរដ្ឋាភិបាលបង្រួបបង្រួមជាតិលីប៊ីកំពុងធ្វើដំណើររុលទៅមុខយ៉ាងលឿនចូលក្នុងទីក្រុងសៀត។
ព័ត៌មាននេះក៏ត្រូវបានបញ្ជាក់បន្ថែមដោយអ្នកនាំពាក្យកងទ័ពលីប៊ីលោកម៉ូហាម៉ាដ ហ្គាសេរី។ យោងតាមលោកម៉ូហាម៉ាដ ប្រតិបត្តិការសឹកកំពុងបន្ត តែមិនយូរប៉ុន្មានទេ ដោយលោកសង្ឃឹមថា នឹងដណ្តើមកាន់កាប់ទីក្រុងសៀតទាំងស្រុងពីកណ្តាប់ដៃអង្គការរដ្ឋអ៊ីស្លាមនាប៉ុន្មានថ្ងៃខាងមុខ។ អាមេរិក តាមរយៈអ្នកនំាពាក្យក្រសួងការពារជាតិលោក Peter Cook បានសាទរចំពោះស្ថានការណ៍វិវឌ្ឍន៍នៅក្នុងប្រទេសលីប៊ី និងថា អាមេរិកកំពុងតាមដានស្ថានការណ៍នៅលីប៊ីយ៉ាងយកចិត្តទុកដាក់ជាទីបំផុត។ ក៏ប៉ុន្តែ ដោយអវត្តមានអ្នកកាសែត និងកង្វះប្រភពព័ត៌មាននៅលើសមរភូមិ គេមិនអាចដឹងពីស្ថានការណ៍យោធាពិតនៅលើសមរភូមិ។
ម្យ៉ាងទៀត គេក៏មិនមានតួលេខពិតប្រាកដស្តីពីចំនួនយុទ្ធជនអង្គការរដ្ឋអ៊ីស្លាមក្នុងទីក្រុងសៀត និងចំនួនប្រជាជនលីប៊ីដែលកំពុងរស់នៅទីនោះ។ បើយោងតាមប្រភពបរទេសមួយចំនួនឲ្យដឹងថា ចំនួនយុទ្ធជនអង្គការរដ្ឋអ៊ីស្លាមសកម្មនៅលីប៊ីមានប្រមាណជា ៥ ០០០នាក់។ យ៉ាងណាក៏ដោយ ក្រុមអ្នកវិភាគបានយល់ឃើញថា បរាជ័យរបស់អង្គការរដ្ឋអ៊ីស្លាមនៅក្នុងទីក្រុងសៀតមិនមែនជាការបិទបញ្ចប់វត្តមានរបស់អង្គការភេរវនិយមមួយនេះនៅក្នុងទឹកដីលីប៊ីទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ