វិបត្តិនយោបាយកាន់តែលង់ជ្រៅនៅប្រទេសហ្កំប៊ី
ប្រទេសមួយចំនួននៃសហគមន៍សេដ្ឋកិច្ចអាហ្វ្រិកខាងលិច ហៅកាត់ ថា Cedeaoបានប្រកាសនៅថ្ងៃព្រហស្បតិ៍នេះ ថា គេបានត្រៀមខ្លួនរួចហើយ ដើម្បីធ្វើអន្តរាគមយោធា ទៅក្នុងប្រទេសហ្កំប៊ី បើសិន ប្រធានាធិបតីអស់អាណត្តិរបស់ប្រទេសនេះ នៅតែក្រាញ មិនព្រមចុះចេញពីអំណាច។
ចុះផ្សាយនៅថ្ងៃ៖
នៅហ្កំប៊ី ឱសានវាទទាមទារឲ្យលោកប្រធានាធិបតីYahya Jammeh ដើរចេញពីអំណាចដោយសន្តិវិធី ត្រូវចប់ នៅថ្ងៃព្រហស្បតិ៍។ ថ្ងៃដែលប្រធានាធិបតីឈ្នះឆ្នោតថ្មី ត្រូវស្បថចូលកាន់តំណែងនៅ ហ្កំប៊ី។ បណ្តាប្រទេសសមាជិកសហគមន៍សេដ្ឋកិច្ចអាហ្វ្រិកខាងលិច Cedeao បានប្រកាសហើយថា គេនឹងប្រើកម្លាំងយោធា អន្តរាគមក្នុងវិបត្តិនយោបាយ ហ្កំប៊ី ប្រសិនបើលោកYahya Jammeh នៅតែមិនព្រមចុះចេញពីតំណែង។
ហ្កំប៊ី ដែលធ្លាប់ស្ថិតនៅក្រោមអាណានិគមរបស់អង់គ្លេស និងមានប្រជាជនរស់នៅ ២លាននាក់ កំពុងស្គាល់វិបត្តិនយោបាយធ្ងន់ធ្ងរ ដោយសារតែប្រធានាធិបតីអស់អាណត្តិបដិសេធមិនប្រគល់អំណាចទៅឲ្យប្រធានាធិបតីឈ្នះឆ្នោត។
បណ្តាប្រទេសសមាជិកនីសហគមន៍ Cedeao បានលូកដៃអន្តរាគមន៍ ដោយបានបើកការចរចា មិនបានសម្រេច អស់ជាង១ខែ។ នៅក្នុងសេចក្តីថ្លែងការណ៍របស់ខ្លួន សហគមន៍សេដ្ឋកិច្ចអាហ្រ្វិក Cedeaoបានប្រកាសហើយថា ចាប់ពីថ្ងៃនេះទៅ គេទទួលស្គាល់តែលោកAdama Barrow ជាប្រធានាធិបតីស្របច្បាប់របស់ហ្កំប៊ី។ នៅសប្តាហ៍នេះ នីហ្សេរីយ៉ាដែលកំពុងដឹកនាំ Cedeao បានបញ្ជូនទ័ពអាកាសរបស់ខ្លួន ទៅប្រចាំក្នុងប្រទេសសេណេហ្កាល់ ដែល បានពង្រាយរួចហើយ ដែរ កងទ័ពរបស់ខ្លួន នៅតាមព្រំដែនជាមួយប្រទេសហ្កំប៊ី។ កងទ័ព សេណេហ្កាល់ បានព្រមានទុកមុនថា គេនឹងសម្រុកចូលក្នុងទឹកដីហ្កំប៊ី នៅយប់ថ្ងៃព្រហស្បតិ៍នេះ ក្នុងករណីដែលប្រធានាធិបតីYahya Jammeh នៅតែបដិសេធ មិនព្រមប្រគល់អំណាចទៅឲ្យប្រធានាធិបតីឈ្នះឆ្នោត លោកAdama Barrow។
Adama Barrow ដែលឈ្នះឆ្នោតប្រធានាធិបតីហ្កំប៊ី កាលពីខែធ្នូ ត្រូវស្បថចូលកាន់តំណែង នៅថ្ងៃព្រហស្បតិ៍នេះ។ ប៉ុន្តែ ដោយសារតែលោកប្រធានាធិបតីYahya Jammeh បដិសេធមិនចុះចេញពីអំណាច ពិធីស្បថចូលកាន់តំណែងដែលត្រូវរៀបចំនៅទីក្រុងBanjul នៅថ្ងៃនេះ ត្រូវរំលាយទៅវិញ។ តាមប្រភពមន្រ្តីស្និទ្ធនឹងប្រធានាធិបតីឈ្នះឆ្នោត លោក Adama Barrow ទំនងស្បថចូលកាន់តំណែង នៅស្ថានទូតហ្កំប៊ី ក្នុងប្រទេសសេណេហ្កាល់ ជាទីដែលលោកកំពុងភៀសខ្លួន ជ្រកកោន តាំងពីថ្ងៃទី ១៥មករា។
ដឹកនាំប្រទេសហ្កំប៊ី ជាង២០ ចាប់តាំងពីរដ្ឋប្រហារឆ្នាំ ១៩៩៤ លោកYahya Jammeh បានបដិសេធមិនប្រគល់អំណាចទៅឲ្យប្រធានាធិបតីឈ្នះឆ្នោត ក្នុងហេតុផលថា មានភាពមិនប្រក្រតី នៅក្នុងការបោះឆ្នោត។ នៅថ្ងៃអង្គារ លោកប្រកាសដាក់ប្រទេសក្នុងស្ថានភាពប្រកាសអាសន្ន។ កងទ័ពហ្កំប៊ី នៅថ្ងៃពុធ បដិសេធមិនលូកដៃ អន្តរាគម ក្នុងវិបត្តិនយោបាយ និងសន្យាបើកដៃ ឲ្យទាហានសេណេហ្កាល់ចូលមកដេញលោកYahya Jammeh ចេញពីតំណែង។ ក្រៅពីបាត់ការគាំទ្រពីកងទ័ព លោកYahya Jammeh នៅបានបាត់បង់អនុប្រធានាធិបតី និងរដ្ឋមន្រ្តីសំខាន់ៗរបស់រដ្ឋាភិបាល ដែលបានលាលែងចេញពីតំណែង ជាបន្តបន្ទាប់ នៅថ្ងៃព្រហស្បតិ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ