កុងហ្គោបោះឆ្នោតប្រធានាធិបតី ក្នុងអត្ថន័យជាប្រវត្តិសាស្ត្រ តែមានហានិភ័យខ្ពស់
បន្ទាប់ពីបានលើកពេលម្តងហើយម្តងទៀត និងរង់ចាំអស់ពេលជាយូរ នៅទីបំផុត ការបោះឆ្នោតជ្រើសរើសប្រធានាធិបតីថ្មី របស់សាធារណរដ្ឋប្រជាធិបតេយ្យកុងហ្គោត្រូវបានរៀបចំឡើងនៅថ្ងៃអាទិត្យទី ៣០ ធ្នូ២០១៨នេះ។ ដំណើរការបោះឆ្នោតបានចាប់ផ្តើមដោយរអាក់រអួលបំផុត។ ក្រៅអំពីក្តីព្រួយបារម្ភខ្លាំងមានផ្ទុះអំពើហិង្សា អាកាសធាតុក៏មិនអំណោយផលទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ពលរដ្ឋកុងហ្គោជិត៤០លាននាក់ត្រូវចូលរួមបោះឆ្នោតជ្រើសរើសប្រធានាធិបតីថ្មី។ ជាការបោះឆ្នោតដ៏សំខាន់ ព្រោះដោយហេតុតែប្រធានាធិបតីផុតអាណត្តិ កាន់តំណែងបន្តពីឪពុកតាំងពីឆ្នាំ២០០១មក ពុំអាចឈរឈ្មោះជាថ្មីបាន ការបោះឆ្នោតថ្ងៃនេះអាចជាឱកាសនាំសាធារណរដ្ឋប្រជាធិបតេយ្យកុងហ្គោឱ្យស្គាល់ការផ្លាស់ប្តូរមេដឹកនាំ ជាលើកទីមួយ តាមបែបប្រជាធិបតេយ្យ។
តាមធម្មតា ការបោះឆ្នោតប្រធានាធិបតី ត្រូវប្រព្រឹត្តទៅតាំងពីឆ្នាំ ២០១៦មកម្ល៉េះ ប៉ុន្តែដោយហេតុវិបត្តិហិង្សា ប្រធានាធិបតីផុតអាណត្តិបានលេសកាន់អំណាចពីរឆ្នាំបន្ថែម ទម្រាំយល់ព្រមមិនឈរឈ្មោះជាលើកទីបី ស្របតាមរដ្ឋធម្មនុញ្ញ និងរកមនុស្សជំនិតមកធ្វើអ្នកស្នងឃើញ។ ទោះបីជាត្រូវបានលើកពេលដល់ទៅបីដងក៏ដោយ ក៏ដំណើរការបោះឆ្នោតថ្ងៃនេះហាក់នៅតែពុំប្រព្រឹត្តទៅក្នុងលក្ខខណ្ឌប្រសើរសោះ។
ក្រៅអំពីបញ្ហាអាកាសធាតុ មានព្យុះភ្លៀងខ្លាំង ជាហេតុធ្វើឱ្យដំណើរការបោះឆ្នោតអាចចាប់ផ្តើមដោយរអាក់រអួលបំផុត មានការិយាល័យខ្លះ ពុំអាចបើកទ្វារបានទ្វារបានទេ ដោយខ្វះបុគ្គលិក និងគ្មានអគ្គីសនី។ លើសពីនេះទៀត អ្នកការទូត និងសង្កេតការណ៍ ព្រួយបារម្ភថានឹងអាចមានអំពើហិង្សាខ្លាំង ដូចសម័យបោះឆ្នោតឆ្នាំ២០០៦ និង២០១១ដដែល បន្ថែមពីលើអំពើហិង្សាជាតិពិន្ធុដ៏ធ្ងន់ធ្ងរដែលទើបផ្ទុះ ឡើងជាថ្មីទៀតនៅ ក្នុងប្រទេស។
បើតាមការស្ទង់មតិ របស់ក្រុមអ្នកស្រាវជ្រាវនៃសាកលវិទ្យាល័យញូវយ៉កស្តីពីកុងហ្កោ អតីតមេដឹកនាំ បក្សប្រឆាំងមានប្រជាប្រិយភាពខ្ពស់ ដោយទទួលបានសំឡេងគាំទ្រចង់បោះឆ្នោតឱ្យដល់ទៅ៤៧% ទល់នឹង១៩%ប៉ុណ្ណោះ សម្រាប់បេក្ខជនមកពីបក្សកាន់អំណាច និងដែលកូនអុករបស់ប្រធានាធិបតីផុតអាណត្តិ។
ប៉ុន្តែតើការបោះឆ្នោតប្រធានាធិបតីនេះ គួរឱ្យទុកចិត្តនិងស្មើភាពមែនដែរឬទេ ? នេះជាហើយជាអ្វីឱ្យបេក្ខជនបក្សប្រឆាំងសង្ស័យ។ គណៈកម្មការរៀបចំការបោះឆ្នោត បានសន្យាតម្លាភាព និងប្រកាសលទ្ធផលយ៉ាងយូរនៅថ្ងៃទី ៦មករា។ តែបើមានករណីតវ៉ា ប្រឆាំងនឹងលទ្ធផល នោះអំពើហិង្សាថ្មីនឹងផ្ទុះឡើងជាក់ជាពុំខាន ជាពិសេនៅភាគខាងកើតប្រទេស ទីដែលមានយុទ្ធជនប្រដាប់អាវុធសកម្មខ្លាំងស្រាប់ផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ