ប្រធានាធិបតីអាល់ហ្សេរីឈប់ឈរឈ្មោះ សម្រាប់អាណត្តិទី ៥ ប៉ុន្តែ ប្រជាជននៅតែមិនទុកចិត្ត
ចុះផ្សាយនៅថ្ងៃ៖
ស្តាប់ - ០៥:៣៨
នៅប្រទេសអាល់ហ្សេរី នៅមួយថ្ងៃក្រោយត្រលប់ចូលប្រទេស ដែលរញ្ជួយដោយមហាបាតុកម្មប្រឆាំងនឹងខ្លួន លោកប្រធានាធិបតីអាល់ហ្សេរី អាប់ឌែលឡាហ្ស៊ីស ប៊ូតេផ្លីកា កាលពីថ្ងៃចន្ទទី ១១មីនា បានប្រកាស ដកខ្លួន លែងឈរឈ្មោះ សម្រាប់អាណត្តិទី៥ ប៉ុន្តែជាមួយគ្នានោះ លោកក៏បានប្រកាសលើកពេលបោះឆ្នោត ដែលត្រូវប្រព្រឹត្តទៅនៅថ្ងៃទី១៨មេសាខាងមុខនេះដែរ។ ការប្រកាសលែងឈរឈ្មោះសម្រាប់អាណត្តិថ្មី របស់លោកប្រធានាធិបតី ប៊ូតេផ្លីកា មិនបានធ្វើឲ្យចលនាប្រឆាំងនឹងលោកចុះថយនោះទេ។ ប្រជាជនអាល់ហ្សេរី គ្រប់ជាន់ថ្នាក់ ភាគច្រើនជាយុវជនបានប្រកូកប្រកាសរួចហើយ ឲ្យមានមហាបាតុកម្មថ្មី នៅថ្ងៃសុក្រសប្តាហ៍នេះ ដើម្បីប្រឆាំងនឹងរបបរបស់លោកប្រធានាធិបតីប៊ូតេផ្លីកា។
នៅអាល់ហ្សេរី លោកប្រធានាធិបតីអាប់ឌែលឡាហ្ស៊ីស ប៊ូតេផ្លីកា ដែលកំពុងរងការរិះគន់ និងមហាបាតុកម្មប្រឆាំង នៅក្នុងប្រទេស ប៉ុន្មានសប្តាហ៍មកហើយនោះ បានប្រកាសនៅថ្ងៃចន្ទម្សិលមិញថា លោកនឹងមិនឈរឈ្មោះ សម្រាប់បន្តអាណត្តិទី៥នោះទេ។ នេះជាដំណឹងល្អព្រោះថា វាចំណុចទាមទាររបស់ប្រជាជនអាល់ហ្សេរី ដែលបានធ្វើបាតុកម្មតាំងពីចុងខែកុម្ភៈមក។
នៅរដ្ឋធានីអាល់ហ្សេ កាលពីយប់ម៉ិញ ប្រជាជនត្រេកអរ ស្រែកជ័យឃោសពេញផ្លូវ នៅពេលលឺសេចក្តីប្រកាសរបស់ប្រធានាធិបតី ប៊ូតេផ្លីកា ដែលថា លោកនឹងមិនឈរឈ្មោះ សម្រាប់អាណត្តិថ្មីនោះទេ។
តាំងពីថ្ងៃទី ២២កុម្ភៈ ប្រជាជនអាល់ហ្សេរីនាំគ្នាធ្វើបាតុកម្មក្នុងទ្រង់ទ្រាយធំ ក៏ដោយសារតែពួកគេប្រឆាំង នឹងបេក្ខភាពប្រធានាធិបតី របស់លោកអាប់ឌែលឡាហ្ស៊ីស ប៊ូតេផ្លីកា ដែលចង់ឈរឈ្មោះ សម្រាប់អាណត្តិទី៥។ ថ្វីបើបានលោក ប៊ូតេផ្លីកាបានឈ្នះឆ្នោត ធ្វើជាប្រធានាធិបតី ៤អាណត្តិមកហើយ ប៉ុន្តែ សម្រាប់ ប្រជាជនអាល់ហ្សេរី លោកប៊ូតេផ្លីកា លែងមានសមត្ថភាព លទ្ធភាពដឹកនាំប្រទេសដូចមុនទៀតហើយ។ លោកប្រធានាធិបតី អាល់ហ្សេរី ដែលមានវ័យ ៨២ឆ្នាំ មានសុខភាពទ្រុឌទ្រោម ចាប់តាំងពីលោកបានធ្លាក់ខ្លួនឈឺ ដាច់សរសៃឈាមខួរក្បាល កាលពីឆ្នាំ ២០១៣។ ចាប់តាំងពីឆ្នាំ ២០១៤ លោកអង្គុយតែក្នុងរទេះរុញ និងលែងបង្ហាញមុខជាសាធារណៈ អស់ប៉ុន្មានឆ្នាំមកហើយ។
ប្រជាជននៅតែមិនទុកចិត្ត
ជាមួយនឹងសេចក្តីប្រកាសលែងឈរឈ្មោះ សម្រាប់បន្តអាណត្តិទី៥របស់លោកប្រធានាធិបតី ប៊ូតេផ្លីកា ប្រជាជនអាល់ហ្សេរី ត្រេកអរលាយជាមួយនឹងក្តីបារម្ភ ហើយនិងការមិនទុកចិត្ត ព្រោះថា លោកប៊ូតេផ្លីកា ថ្វីបើឈប់លែងឈរឈ្មោះ ជាបេក្ខជនប្រធានាធិបតីសម្រាប់អាណត្តិទី៥មែន ប៉ុន្តែ ជាមួយគ្នានោះ លោកក៏បានប្រកាសលើកពេលថ្ងៃបោះឆ្នោត ដោយគ្មានកាលកំណត់ដែរ។ គឺនៅត្រង់ចំណុចនេះហើយ ដែលធ្វើឲ្យប្រជាជនអាល់ហ្សេរី មិនទុកចិត្ត។
លោកប៊ូតេផ្លីកាប្រកាសថា លោកគ្មានបំណងឈរឈ្មោះ សម្រាប់អាណត្តិថ្មីនោះទេ ប៉ុន្តែ ជាមួយគ្នានេះ លោកក៏លុបចោល មិនឲ្យមានការបោះឆ្នោតប្រធានាធិបតី ដែលត្រូវប្រព្រឹត្តទៅ នៅខែក្រោយនេះដែរ។ លើសពីនោះទេ ដោយសារតែថ្ងៃបោះឆ្នោតត្រូវលើកពេលដោយគ្មានកាលកំណត់ លោកប៊ូតេផ្លីកា បាននិយាយថា លោកនឹងបន្តដឹកនាំប្រទេស រហូត នោះបើទោះបីជាអាណត្តិរបស់លោកត្រូវចប់នៅថ្ងៃ ទី ២៨មេសាក៏ដោយ ពោលគឺ រហូតដល់ប្រទេសមានប្រធានាធិបតីថ្មី។ តើនេះ មានន័យថា យ៉ាងម៉េច? សម្រាប់ ប្រជាជនអាល់ហ្សេរី ផ្ទាល់ នេះជាគំនិតបោកបញ្ឆោត ប្រជាជន ហើយនិងលេស ល្បិចកលមួយទៀត របស់លោកប៊ូតេផ្លីកា ដើម្បី កាន់អំណាច យូរតទៅទៀត។ បើគេប្រឆាំងមិនឲ្យលោកឈរឈ្មោះ សម្រាប់អាណត្តិទី ៥ នោះគឺមានតែលោកពន្យារ អាណត្តិទី ៤ ឲ្យវែង តទៅទៀត ដោយមិនចាំបាច់ឲ្យមានការបោះឆ្នោតធ្វើអ្វីនោះទេ។
ជ្រើសរើសរដ្ឋមន្រ្តីការពារជាតិឲ្យធ្វើជានាយករដ្ឋមន្រ្តីថ្មី
នៅក្នុងសេចក្តីថ្លែងការណ៍របស់លោកប្រធានាធិបតី ប៊ូតេផ្លីកាដែលគេអានតាមទូរទស្សន៍រដ្ឋ កាលពីថ្ងៃចន្ទ ទី ១១ មីនា លោកប្រធានាធិបតីអាល់ហ្សេរី មិនបានលើកហេតុផល រដ្ឋធម្មនុញ្ញ ឬច្បាប់អ្វីមកបញ្ជាក់ ដើម្បីមកសំអាង ពីការលើកថ្ងៃបោះឆ្នោតនោះទេ។ ផ្ទុយទៅវិញ លោកគ្រាន់តែអះអាងថា លោកធ្វើនេះ គឺដើម្បីឆ្លើយតបទៅនឹងការទាមទាររបស់ប្រជាជនអាល់ហ្សេរី ដែលចង់មានការផ្ទេរ ការដាក់ដឹកនាំប្រទេសទៅឲ្យមនុស្សជំនាន់ថ្មី។ លោកប៊ូតេហ្វ្លេកាបានលើកឡើងពីការផ្ទេរអំណាចដោយរលូន ការធ្វើកំណែទម្រង់ តាមរយៈការរៀបចំសន្និសីទជាតិមួយ ឲ្យបានមុនដាច់ឆ្នាំនេះ។ តាម លោកប៊ូតេផ្លីកា នៅក្នុងសន្និសីទជាតិ ដែលនឹងដឹកនាំដោយអ្នកតំណាងសង្គមស៊ីវិល គេនឹងរៀបចំឲ្យមានកំណែទម្រង់ រដ្ឋធម្មនុញ្ញ ហើយគឺនៅក្នុងពេលរៀបចំសន្និសីទជាតិ នោះឯង ដែលគេនឹងកំណត់ថ្ងៃបោះឆ្នោតថ្មី។
ក្នុងពេលរង់ចាំ លោកប៊ូតេផ្លីកានឹងនៅតែបន្តកាន់តំណែងប្រធានាធិបតីអាល់ហ្សេរីដដែល។ អ្នកវិភាគនយោបាយ ហើយនិងអ្នកច្បាប់អាល់ហ្សេរី វាយតម្លៃថា ដោយប្រកាសលុបចោលថ្ងៃបោះឆ្នោត ដោយគ្មានហេតុផលវិបត្តិនយោបាយអ្វីសោះ លោកប៊ូតេផ្លីកាកំពុងតែ រំលោភច្បាប់។ ម្យ៉ាងទៀត លោកប្រធានាធិបតី កំពុងតែរំលោភរដ្ឋធម្មនុញ្ញ ដោយបានប្រកាសបង្កើតតំណែងឧបនាយករដ្ឋមន្រ្តី កាលពីថ្ងៃចន្ទ។ នៅថ្ងៃម្សិលមិញ ដើម្បី សម្រាលកំហឹង ចលនាប្រឆាំងខ្លួន លោកប្រធានាធិបតី ប៊ូតេផ្លីកា បានប្រកាសរំលាយរដ្ឋាភិបាលបច្ចុប្បន្ន ដោយបានជ្រើសតាំង រដ្ឋមន្រ្តីការពារជាតិ លោក Noureddine Bedoui ឲ្យជំនួសនាយករដ្ឋមន្រ្តី ដ៏ចម្រូងចម្រូស លោក Ahmed Ouyahia និងបានជាជ្រើសរើសរដ្ឋមន្រ្តីការបរទេសឲ្យធ្វើជាឧបនាយករដ្ឋមន្រ្តី ដែលជាតំណែងត្រូវគេលុបចោល តាំងពីឆ្នាំ ២០១២មក។ សម្រាប់ ប្រជាជនអាល់ហ្សេរី ដោយប្រកាសលើកពេលបោះឆ្នោត លោកប៊ូតេផ្លីកា កំពុងឆ្លៀតកេងចង់ចំណេញពេល១ឆ្នាំទៀត ដើម្បី ដាក់បងប្អូន បក្សពួករបស់ខ្លួន សម្រាប់តំណែងគន្លឹះ សំខាន់ និងដើម្បីចាក់គ្រឹះនៅកាន់អំណាច យូរតទៅទៀត នៅអាល់ហ្សេរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ