ប្រធានាធិបតី ម៉ូសំប៊ិក៖ ព្យុះសង្ឃរា អ៊ីដាយ អាចសម្លាប់មនុស្សជាង១ពាន់នាក់
នៅម៉ូសំប៊ិក ៥ថ្ងៃក្រោយ រងបំផ្លាញ ដោយខ្យល់ព្យុះ សង្ឃរា អ៊ីដាយ ក្រុមជួយសង្រ្គោះ នៅបន្តរុករក ជួយប្រជាជនរាប់ពាន់នាក់ ដែលកំពុងរត់ជ្រកលើដំបូលផ្ទះ ឬដើមឈើ ដើម្បី គេចចេញពីគ្រោះទឹកជំនន់។ តាមតួលេខរបស់អាជ្ញាធរម៉ូសំប៊ិក ព្យុះកំណាចអ៊ីដាយបានសម្លាប់មនុស្សយ៉ាងតិច ១៨០នាក់ ប៉ុន្តែ ប្រធានាធិបតីរបស់ម៉ូសំប៊ិកបានព្រមានរួចហើយពីការកើនឡើង នៃចំនួនអ្នកស្លាប់ ដល់ទៅ ជាង ១ពាន់នាក់ នៅក្នុងគ្រោះមហន្តរាយ លើកនេះ។
ចុះផ្សាយនៅថ្ងៃ៖
ស្តាប់ - ០១:៥៥
នៅពេលដែលប្រទេសជិតខាង ស៊ីមបាវ៉េ កំពុងធ្វើបុណ្យសពឲ្យជនរងគ្រោះ ដែលស្លាប់ដោយសារខ្យល់ព្យុះកំណាច អ៊ីដាយ ម៉ូសំប៊ិក ឯណោះវិញដែលនៅជាប់ផ្ទាល់នឹងមហាសមុទ្រ ឥណ្ឌា កំពុងជួយសង្រ្គោះមនុស្សដែលរត់ជ្រក លើដើមឈើ និងដំបូលផ្ទះ។
នៅថ្ងៃចន្ទ ប្រធានាធិបតី ម៉ូសំប៊ិក ដែលបានធ្វើដំណើរតាមឧទ្ធម្ភាគចក្រ ពិនិត្យមើលតំបន់ភាគកណ្តាលរបស់ប្រទេស បានអះអាងថា ចំនួនមនុស្សស្លាប់ នៅក្នុងគ្រោះមហន្តរាយ ដោយសារខ្យល់ព្យុះអ៊ីដាយ អាចច្រើនជាង១ពាន់នាក់។ នេះបើសិនគេមើលទៅលើស្ថានភាពតំបន់ដែលជន់លិច ដោយសារ ទឹកជំនន់ ទឹកភ្លៀង។
រហូតដល់ថ្ងៃចន្ទ សកម្មភាពជួយសង្រ្គោះ និងស្វះស្វែងរកមនុស្សដែលបាត់ខ្លួន ប្រព្រឹត្តទៅដោយយឺតយ៉ាវ ដោយសារតែខ្វះ ឧទ្ធម្ភាគចក្រ ទូក ហើយនិងហេដ្ឋារចនាសម្ព័ន្ធ ដែលដាច់បំផ្លាញ ជន់លិច ដោយសារព្យុះកំបុតត្បូង។ នៅម៉ូស៊ំប៊ិក ក៏ដូចស៊ីមបាវ៉េ ស្ពាន ផ្លូវថ្នល់ត្រូវបានបំផ្លាញដោយសារទឹកជំនន់ ចំណែក ទីក្រុងទី២របស់ម៉ូសំប៊ិកដែលរងបំផ្លាញស្ទើរទាំងស្រុង ដោយសារខ្យល់ព្យុះ អ៊ីដាយ គ្មានភ្លើងអគ្គិសនីប្រើប្រាស់ ៥ថ្ងៃមកហើយ។
នៅពេលដែលសកម្មភាពជួយសង្រ្គោះជីវិតមនុស្ស មានកំណត់ ប្រធានាធិបតី ម៉ូសំប៊ិកបានអំពាវនាវផងដែរឲ្យប្រជាជនដែលរស់នៅក្បែរទន្លេ ចាកចេញពីផ្ទះសម្បែង ដើម្បី គេចចេញពីគ្រោះបាក់ទំនប់ ដែលលែងមានសមត្ថភាពទប់ជាប់ទឹកជំនន់ តទៅទៀត។
ប្រឈមមុខនឹងគ្រោះមហន្តរាយ ដែលអាចជាផលវិបាកនៃការប្រែប្រួលអាកាសធាតុ អង្គការការពារសិទ្ធិមនុស្សAmnesty International នៅថ្ងៃអង្គារនេះ បានអំពាវនាវដល់សហគមអន្តរជាតិឲ្យជួយប្រជាជននៅ តំបន់អាហ្វ្រិក ហើយនិងចាត់វិធានការជាក់ស្តែងដើម្បីឆ្លើយតបនឹងការប្រែប្រួលអាកាសធាតុ។ រដ្ឋាភិបាលអង់គ្លេស នៅថ្ងៃនេះ បានប្រកាសផ្តល់ប្រាក់ជំនួយ ៦លានlivres ស្មើនឹង៧លានអឺរ៉ូ សម្រាប់ជំនួយមនុស្សធម៌ នៅក្នុងតំបន់ដែលរងគ្រោះដោយសារខ្យល់ព្យុះកំណាច អ៊ីដាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ