លីប៊ី៖សេនាប្រមុខហាវតារបញ្ជាឲ្យកងទ័ពវាយដណ្តើមយកទីក្រុងទ្រីប៉ូលី
នៅក្នុងប្រទេសលីប៊ី សេនាប្រមុខខាលីហ្វា ហាវតារដែលជាមនុស្សខ្លាំងប្រចាំតំបន់ប៉ែកខាងកើតនៃប្រទេសលីប៊ីបានចេញបញ្ជាឲ្យកម្លាំងទ័ពរបស់ខ្លួនវាយចូលទីក្រុងទ្រីប៉ូលី។ លោកហាវតារបានចេញបញ្ជានេះពីបន្ទប់ប្រតិបត្តិការនៃមូលដ្ឋានទ័ពក្នុងទីក្រុងបេនហ្គាហ្ស៊ីនាថ្ងៃព្រហស្បតិ៍ ទី៤ មេសា។ ព្រឹត្តិការណ៍មួយនេះបានបង្ខំក្រុមប្រឹក្សាសន្តិសុខអង្គការសហប្រជាជាតិឲ្យកោះប្រជុំបន្ទាន់មួយនៅយប់ថ្ងៃសុក្រ ទី៥ មេសានេះ។
ចុះផ្សាយនៅថ្ងៃ៖
ស្តាប់ - ០២:៣៣
បន្ទាប់ពីវាយយកបានស្រុកចំនួនពីរស្ថិតប៉ែកខាងកើត និងខាងលិចទីក្រុងទ្រីប៉ូលីមក គឺទីក្រុងទ្រីប៉ូលីដែលជាគោលដៅចុងក្រោយរបស់កម្លាំងស្មោះស្ម័គ្រនឹងសេនាប្រមុខខាលីហ្វា ហាវតារ មេបញ្ជាការកងទ័ពជាតិលីប៊ី។ គួររម្លឹកថា មនុស្សខ្លាំងលីប៊ីប្រចាំតំបន់ប៉ែកខាងកើតរូបនេះមិនដែលលាក់កំបាំងនូវមហិច្ឆតា និងដំណោះស្រាយផ្លូវយោធាសម្រាប់ប្រទេសលីប៊ី ហើយធ្លាប់បានបញ្ជាក់នៅប៉ុន្មានខែចុងក្រោយពីបំណងវាយយកទីក្រុងទ្រីប៉ូលី។ នៅក្នុងសារសំឡេងមួយផ្សាយតាមបណ្តាញសង្គម Facebook នាយប់ថ្ងៃព្រហស្បតិ៍ ទី៤ មេសា សេនាប្រមុខហាវតារបានសន្យាបញ្ចៀសការប៉ះពាល់ដល់ស្ថាប័នរបស់រដ្ឋ ការស្លាប់ជនស៊ីវិល និងជនបរទេស។
ចំណែកបណ្តាញផ្សព្វផ្សាយព័ត៌មានរបស់កងទ័ពជាតិលីប៊ីបានបង្ហាញនូវរូបភាពក្បួនរថយន្តទាហាន និងកម្លាំងកងទ័ពដែលកំពុងធ្វើដំណើរនៅលើផ្លូវឆ្ពោះទៅកាន់ទីតាំងកំណត់មួយ។ ព័ត៌មានចុងក្រោយឲ្យដឹងថា កម្លាំងទ័ពរបស់សេនាប្រមុខហាវតារកំពុងបោះទីតាំងនៅក្នុងស្រុកពីរដែលមានចម្ងាយប្រមាណជា ៦០គីឡូម៉ែត្រនៅប៉ែកខាងកើត និងខាងលិចទីក្រុងទ្រីប៉ូលី។ ប្រតិបត្តិការថ្មី និងជាលើកទី១ ទៅកាន់ទីក្រុងទ្រីប៉ូលី គឺដើម្បីបោសសំអាតពួកភេរវជន និងកម្លាំងស៊ីឈ្នួល នេះជាការបញ្ជាក់របស់លោកអាម៉េដ អាល់ មីស្មារី អ្នកនាំពាក្យរបស់កងទ័ពជាតិលីប៊ី។
ប្រឈមនឹងស្ថានការណ៍ដែលមិនបានរង់ចាំមួយនេះ លោកហ្វាយេ អាល់ សារ៉ា ប្រមុខរដ្ឋាភិបាលសហភាពជាតិនៅទីក្រុងទ្រីប៉ូលីបានបរិហារលើទង្វើបង្ករឿងរបស់សេនាប្រមុខហាវតារ និងបានប្រកាសដាក់កម្លាំងទ័ពឲ្យស្ថិតក្នុងភាពអាសន្នដើម្បីប្រយុទ្ធទល់នឹងកម្លាំងរបស់សេនាប្រមុខហាវតារ។ គួរបញ្ជាក់ថា ទឹកដីលីប៊ីកំពុងពុះចែកជាពីរ នៅប៉ែកខាងកើតកំពុងកាន់កាប់ដោយសេនាប្រមុខហាវតារ និងនៅទីក្រុងទ្រីប៉ូលីកំពុងកាន់កាប់ដោយរដ្ឋាភិបាលសហភាពជាតិរបស់លោកហ្វាយេ អាល់ សារ៉ាដែលទទួលស្គាល់ដោយសហគមន៍អន្តរជាតិ។
ទីក្រុងវ៉ាស៊ីនតោន ប៉ារីស និងឡុងដ៏បានអំពាវនាវឲ្យគ្រប់ភាគីជម្លោះកាត់បន្ថយភាពតានតឹងភ្លាមៗ។ ចំណែកអគ្គលេខាធិការអង្គការសហប្រជាជាតិលោក Antonio Guterres ដែលកំពុងមានវត្តមានក្នុងទីក្រុងទ្រីប៉ូលីពេលនេះបានអំពាវនាវឲ្យគ្រប់ភាគីជម្លោះមានការអត់ធ្មត់។ នៅទីក្រុងញូយ៉កនាយប់ថ្ងៃសុក្រ ទី៥ មេសានេះ ក្រុមប្រឹក្សាសន្តិសុខអង្គការសហប្រជាជាតិកោះប្រជុំបន្ទាន់មួយតាមសំណើរបស់ប្រទេសអង់គ្លេសដើម្បីនិយាយពីស្ថានការណ៍នៅលីប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ