ប្រមុខយោធាស៊ូដង់ ប្រកាសបញ្ចប់សករាជរបស់លោក Omar El Bechir
ស៊ូដង់កំពុងស្ថិតស្ថានភាពច្របូកច្របល់ ក្រោមក្រសែភ្នែកតាមដានពីសំណាក់សហគមន៍អន្តរជាតិ។ ប្រធានាធិបតីស៊ូដង់ លោកអូម៉ារ អេលបាស្ហៀរ Omar el Béchir ដែលកាន់អំណាចតាំងពីឆ្នាំ១៩៨៩មក បានលាលែងចេញពីតំណែង។ ការពិគ្រោះយោបល់រៀបចំក្រុមប្រឹក្សាដឹកនាំប្រទេសឆ្លងអន្តរកាល ទំនងកំពុងចាប់ផ្តើម។ នេះបើតាមសេចក្តីថ្លែងការណ៍របស់រដ្ឋមន្ត្រីក្រសួងការពារជាតិ ដោយអះអាងទៀតថា ក្រុមប្រឹក្សាយោធា ត្រូវទទួលបន្ទុកដឹកនាំប្រទេសជំនួសរយៈពេលពីរឆ្នាំ។
ចុះផ្សាយនៅថ្ងៃ៖ កែប្រែថ្ងៃទី៖
ទូរទស្សន៍ជាតិស៊ូដង់បានប្រកាសតាំងពីព្រឹកថ្ងៃព្រហស្បតិ៍មកថា យោធាត្រៀមចេញ “សេចក្តីថ្លែងការណ៍ដ៏សំខាន់មួយ” ហើយកងកម្លាំងយោធា ទាំងកងៗ ក៏បានមកកាន់កាប់ទីតាំង សំខាន់ៗ និងជាយុទ្ធសាស្ត្រនៃរដ្ឋធានី ខាទុំ។ ទីស្នាក់ការចលនាអ៊ីស្លាមជ្រុលនិយមរបស់លោកបាស្ហៀរ ក៏ត្រូវបានយោធាចូលកាន់កាប់ដែរ។ នេះបើតាមប្រភពអ្នកសារព័ត៌មានReuters។ ក្នុងពេលជាមួយគ្នានោះ ពលរដ្ឋរាប់សិបនាក់ និងកាន់តែច្រើនឡើងៗ បានបន្តគ្នាបន្តប្រមូលផ្តុំគ្នា នៅតាមដងផ្លូវ ពិសេសនៅមុខទីស្នាក់ការក្រសួងការពារជាតិ ដែលពួកគេបានមកបោះជំរំតាំងទី តាំងពីអាទិត្យមុនមក។
ចំណែកប្រធានាធិបតីស៊ូដង់ លោក អូម៉ារ អេលបាស្ហៀរ ដែលកាន់អំណាចតាំងពីឆ្នាំ១៩៨៩មក ត្រូវបានដកតំណែងហើយនិងកំពុងត្រូវបានគេយកទៅឃុំឃាំងនៅក្នុងកន្លែងមានសុវត្ថិភាពមួយ។ ការងារដឹកនាំប្រទេសឆ្លងអន្តរកាល ត្រូវស្ថិតនៅក្រោមបន្ទុករបស់ក្រុមប្រឹក្សាយោធា រយៈពេលពីរឆ្នាំ។ នេះបើតាមសេចក្តីប្រកាសរបស់រដ្ឋមន្ត្រីក្រសួងការពារជាតិ លោក Awad Ahmed Benawf។
សូមបញ្ជាក់ថា ស្ថានការណ៍ប្រទេសបានធ្លាក់ដល់កំរិតថ្ងៃនេះ កើតចេញពីកម្លាំងរបស់ប្រជាពលរដ្ឋស៊ូដង់ ដែលបាននាំគ្នាក្រោកឈរធ្វើបាតុកម្ម ជាបន្តបន្ទាប់ តាំងពីថ្ងៃទី ១៩ធ្នូមក ដើម្បីបរិហារ ការឡើងថ្លៃទំនិញនិងឱនភាព។ បាតុកម្មក៏បានប្រែទម្រង់បន្តិចម្តងៗ ក្លាយជាបាតុកម្មប្រឆាំងនឹងនយោបាយដឹកនាំរបស់លោក អូម៉ារ អេលបាស្ហៀរ ។ បាតុកម្មបានស្គាល់របត់ថ្មី ដោយកាលពីចុងសប្តាហ៍មុនដោយក្រុមយោធាបានចូលធ្វើអន្តរាគមន៍ការពារបាតុករ និងមានការប៉ះទង្គិចជាមួយក្រុមភ្នាក់ងារចារកិច្ច និងសន្តិសុខរបស់រដ្ឋាភិបាល រហូតមានស្លាប់១១នាក់ ក្នុងនោះ៦នាក់ជាយោធា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ