ឧត្តមស្នងការដ្ឋានជនភៀសខ្លួនអន្តរជាតិកំពុងបារម្ភពីជោគវាសនារបស់ជនអន្តោប្រវេសន៍នៅលីប៊ី
នៅក្នុងប្រទេសលីប៊ី ការប្រយុទ្ធគ្នាកំពុងបន្តមានរវាងកម្លាំងរបស់សេនាប្រមុខខាលីហ្វា ហាវតារដែលជាមនុស្សខ្លាំងប្រចាំតំបន់ប៉ែកខាងកើត និងកម្លាំងទ័ពរបស់នាយករដ្ឋមន្រ្តីលោកហ្វាយេ អាល់ សារ៉ាក្នុងទីក្រុងទ្រីប៉ូលី។ គួររម្លឹកថា កម្លាំងទ័ពរបស់ឧត្តមសេនីយហាវតារបានបើកការវាយប្រហារលើទីក្រុងទ្រីប៉ូលីតាំងពីថ្ងៃទី៤ មេសា។ តាមតួលេខផ្តល់ដោយអង្គការសុខភាពពិភពលោក ការប្រយុទ្ធគ្នាបានបណ្តាលឲ្យមានមនុស្សស្លាប់ ១២១នាក់ និងរបួសជិត ៦០០នាក់ផ្សេងទៀត។ ខណៈនេះ និងអ្វីដែលឧត្តមស្នងការដ្ឋានអង្គការសហប្រជាជាតិទទួលបន្ទុកជនភៀសខ្លួន HCR កំពុងបារម្ភខ្លាំង គឺជោគវាសនារបស់ជនអន្តោប្រវេសន៍នៅតាមជំរុំដែលស្ថិតក្នុងតំបន់ជម្លោះ។ នៅក្នុងន័យនេះ លោកតារិក អាហ្កាស់ អ្នកទទួលបន្ទុកផ្នែកទំនាក់ទំនងរបស់ HCR បានស្នើឲ្យមានការដោះលែងជនអន្តោប្រវេសន៍ទាំងនោះចេញពីជំរំឃុំឃាំង រួចយកពួកគេទៅដាក់នៅកន្លែងផ្សេងឲ្យឆ្ងាយពីតំបន់ជម្លោះ។
ចុះផ្សាយនៅថ្ងៃ៖
ស្តាប់ - ០១:៣៧
« នៅក្នុងទីក្រុងទ្រីប៉ូលី មានជនភៀសខ្លួនជាង ៣ ០០០នាក់កំពុងរស់នៅក្នុងជំរំឃុំឃាំង ហើយនៅតំបន់ប៉ែកខាងត្បូង មានជំរំឃុំឃាំងយ៉ាងតិចចំនួន ៣ដែលស្ថិតក្បែរតំបន់ជម្លោះ និងដែលក្រុមជនភៀសខ្លួននៅក្នុងជំរំទាំងនេះមិនអាចចាកចេញបានទេ។ អ៊ីចឹងហើយបានជា HCR បានស្នើ និងអំពាវនាវឲ្យមានការដោះលែង និងជម្លៀសពួកគេឲ្យបានឆាប់បំផុត ព្រោះរដ្ឋអំណាចលីប៊ីមិនអាចធានាពីសន្តិសុខ និងសុវត្ថិភាពរបស់ជនភៀសខ្លួនទាំងនោះបានទេ។
កាលពីថ្ងៃអង្គារ ទី៩ មេសាកន្លងទៅ ក្រុមបុគ្គលិករបស់ HCR បានរំដោះជនភៀសខ្លួនចំនួន ១៥០នាក់ពីជំរំឃុំឃាំងទៅដាក់ក្នុងជំរំរបស់ HCR ក្នុងទីក្រុងទ្រីប៉ូលី។ នៅក្នុងជំរំគ្រប់គ្រងដោយ HCR យើងអាចធានាពីសន្តិសុខ និងសុវត្ថិភាពរបស់ពួកគេ តែនៅសល់ជនភៀសខ្លួនដល់ទៅជាង ១ ៤០០នាក់ទៀតដែលកំពុងរស់នៅក្នុងជំរំប៉ែកខាងត្បូងស្ថិតក្បែរតំបន់ជម្លោះ។
ម្យ៉ាងទៀត និងគួរឲ្យស្តាយ រដ្ឋអំណាចលីប៊ីមិនយល់ព្រមឲ្យមានការដោះលែង និងផ្ទេរជនភៀសខ្លួន ជនអន្តោប្រវេសន៍ពីជំរំក្បែរតំបន់ជម្លោះទៅដាក់នៅជំរំផ្សេងដែលមានសន្តិសុខល្អជាង។ អ៊ីចឹងហើយបានជាថ្មីម្តងទៀត យើងសូមអំពាវនាវឲ្យមានការដោះលែងពួកគេដើម្បីឲ្យពួកគេអាចធ្វើដំណើរទៅជ្រកកោណកន្លែងផ្សេងគេចពីតំបន់ដែលកំពុងប្រឈមនឹងជម្លោះប្រដាប់អាវុធ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ