សហរដ្ឋអាមេរិក ក្រឡាស់ជំហរ មកគាំទ្រក្រុមយោធាជាគូប្រជែងរដ្ឋាភិបាលលីប៊ី
សហរដ្ឋអាមេរិក បានសម្រេចប្រកាន់យកជំហរគាំទ្រសេនាប្រមុខ ខាលីហ្វា ហាវតារ (Khalifa Haftar ) ដែលកំពុងបើកប្រតិបត្តិការប្រឆាំងនឹងរដ្ឋាភិបាលលីប៊ី ទទួលស្គាល់ដោយសហគមន៍អន្តរជាតិ។ នៅថ្ងៃសុក្រទី ១៩ មេសា ម្សិលមិញ សេតវិមានបានប្រកាសថា លោក ដូណាល់ ត្រាំ បានសន្ទនាតាមទូរស័ព្ទជាមួយនឹងបុរសខ្លាំងនៅភាគខាងកើតនៃប្រទេស។ នេះជាការក្រឡាស់ជំហរទាំងស្រុងរបស់អាមេរិក ព្រោះសូមបញ្ជាក់ថាសេនាប្រមុខ ហាវតា ជាគូប្រជែងនឹងរដ្ឋាភិបាលលីប៊ីដែលទទួលស្គាល់ដោយអង្គការសហប្រជាជាតិ។
ចុះផ្សាយនៅថ្ងៃ៖
គឺតាមរយៈសេចក្តីថ្លែងការណ៍ដែលសេតវិមានបានប្រកាសផ្សព្វផ្សាយ អំពីការផ្លាស់ជំហរ ក្រឡាប់ចាក់របស់លោក ដូណាល់ ត្រាំ នៅក្នុងសំណុំរឿងលីប៊ី និងបញ្ជាក់អំពីជំនួបសន្ទនា តាមទូរស័ព្ទកាលពីដើមសប្តាហ៍រវាងលោកប្រធានាធិបតី និងសេនាប្រមុខ ហាវតារ។ ការផ្លាស់ប្តូរជំហរ ដោយហេតុតែអាមេរិក មានទស្សនៈវិស័យរួមដូចលីប៊ី គឺចង់រក្សាតួនាទីដ៏សំខាន់របស់ខ្លួនក្នុងការប្រយុទ្ធប្រឆាំងនឹងភេរវនិយម និងក្នុងការរក្សាសន្តិសុខប្រភពធនធានប្រេងកាត របស់ប្រទេសលីប៊ី។
ជាងពីរសប្តាហ៍ក្រោយការបើកប្រតិបត្តិការយោធា ប្រឆាំងនឹងអាជ្ញាធរក្រុងទ្រីប៉ូលី រដ្ឋបាលអាមេរិក សម្រេចងាកទៅគាំទ្រយ៉ាងច្បាស់លាស់ ក្រុមដែលបានប្រើអាវុធវាយលើរដ្ឋាភិបាលលីប៊ីដឹកនាំដោយលោក Fayez al-Sarraj អាជ្ញាធរស្របច្បាប់តែមួយគត់ដែលទទួលស្គាល់ដោយអង្គការសហប្រជាជាតិ។ កាលពីថ្ងៃចន្ទ ជាមួយរុស្ស៊ី អាមេរិកបានបោះឆ្នោតប្រឆាំងនឹងសេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិ ស្តីអំពីបទឈប់បាញ់ ស្នើដោយអង់គ្លេស។
កាលពីប៉ុន្មានថ្ងៃមុន ! មុនការបើកយុទ្ធនាការបង្ហូរឈាមរបស់ក្រុមសេនាប្រមុខហាហ្វតារ រដ្ឋមន្ត្រីការបរទេសអាមេរិក បានអំពាវនាវឱ្យក្រុមនេះបញ្ឈប់ជាបន្ទាន់ប្រតិបត្តិការយោធា។ “យើងប្រឆាំងនឹងការវាយលុក” នេះជាសេចក្តីប្រកាសរបស់លោក ប៉ុមប៉េអូ។ តែនៅថ្ងៃនេះ លោក ដូណាល់ ត្រាំ ផ្តល់សារផ្ទុយទៅវិញ ដោយបានទូរស័ព្ទ ទៅគាំទ្រប្រតិបត្តិការយោធា របស់លោកសេនាប្រមុខ ហាវតារ ដើម្បីត្រួតត្រាលីប៊ីបានទាំងស្រុងទៅវិញ។ ប្រតិបត្តិការដែលអង្គការសហប្រជាជាតិ ចាត់ទុក ជា “រដ្ឋប្រហារ” សោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ