នៅអេហ្ស៊ីប បាតុកម្មប្រឆាំងប្រធានាធិបតីលោកអាល់ស៊ីស៊ីកក្រើកកាន់តែខ្លាំង
នៅក្នុងប្រទេសអេហ្ស៊ីប ទោះបីមានបំរាមហាមមិនឲ្យធ្វើបាតុកម្មក៏ដោយក៏មានមនុស្សជាច្រើនរយនាក់បានចុះផ្លូវធ្វើបាតុកម្មប្រឆាំងប្រធានាធិបតីលោកអាល់ស៊ីស៊ីនាចុងសប្តាហ៍កន្លងទៅ។ យប់ថ្ងៃសៅរ៍ឆ្លងចូលថ្ងៃអាទិត្យ ទី២២ កញ្ញាជាថ្ងៃទី២ ដែលបាតុកម្មប្រឆាំងមនុស្សខ្លាំងលោកអាល់ស៊ីស៊ីបានបង្កឲ្យមានការប្រឈមមុខដាក់គ្នារវាងក្រុមបាតុករ និងកម្លាំងប៉ូលិស។ កម្លាំងប៉ូលិសដែលមិនញញើតប្រើគ្រាប់បែកផ្សែងបង្ហូរទឹកភ្នែក និងបាញ់គ្រាប់កំាំភ្លើងពិតដើម្បីបង្ក្រាបលើក្រុមបាតុករដែលទាមទារឲ្យលោកអាល់ស៊ីស៊ីចុះចេញពីតំណែង។ គួររម្លឹកថាក្នុងរយៈពេលប៉ុន្មានឆ្នាំចុងក្រោយនេះ បាតុកម្មប្រឆាំងនឹងរដ្ឋាភិបាលនៅអេហ្ស៊ីបជារឿងមួយកម្រឃើញកើតមានណាស់។
ចុះផ្សាយនៅថ្ងៃ៖
ស្តាប់ - ០២:៣៩
ពីទីក្រុងគែរឆ្លងចូលទីក្រុងអាឡិចសង់ឌ្រី ម៉ាហាឡា និងរហូតដល់ទីក្រុងស៊ុយអេ ពិសេសទីលាននិមិត្តរូបតារៀរ សម្រែករបស់ក្រុមបាតុករមានតែមួយគត់ « អាលស៊ីស៊ីអើយចុះចេញទៅ ប្រជាជនចង់ទម្លាក់របបដឹកនាំ »។ ពេញមួយចុងសប្តាហ៍កន្លងទៅ មានបាតុករជាច្រើនរយនាក់បាននាំគ្នាចុះផ្លូវធ្វើបាតុកម្មប្រឆាំងប្រធានាធិបតីលោកអាល់ស៊ីស៊ី និងបរិហារពីអំពើពុករលួយ។ តែក្បួនបាតុកម្មត្រូវបានកម្លាំងប៉ូលិសវាយបង្រ្កាបយ៉ាងហិង្សាដោយប្រើតាំងពីគ្រាប់បែកផ្សែងបង្ហូរទឹកភ្នែក គ្រាប់កាំភ្លើងជ័រ និងរហូតដល់បាញ់គ្រាប់ភ្លើងពិត។ តាមសាក្សីជាច្រើន មានមនុស្សរងរបួសធ្ងន់ ស្រាលជាច្រើននាក់នៅក្នុងការវាយបង្រ្កាបនោះ។
« អស់រយៈពេលជាច្រើនឆ្នាំ ពោលតាំងពីលោកអាល់ស៊ីស៊ីឡើងកាន់អំណាច គេមិនដែលហិតក្លិនគ្រាប់បែកផ្សែងបង្ហូរទឹកភ្នែក។ តែនៅពេលដែលគេបានហិតក្លិនវានាំគេនឹងឃើញអនុស្សាវរីយ៍ក្នុងពេលផ្ទុះបដិវត្តអារ៉ាប់នៅអេហ្ស៊ីបដែលបានទម្លាក់ប្រធានាធិបតីលោកមូបារ៉ាក់ និងនាំឲ្យគេនឹកឃើញជាថ្មីថា គេអាចទម្លាក់របបដឹកនាំមួយបាន » នេះជាចំណាប់អារម្មណ៍របស់សាក្សីម្នាក់ដែលមិនព្រមបញ្ចេញឈ្មោះ។ គួរបញ្ជាក់ថា តាំងពីក្រោយរដ្ឋប្រហារយោធាទម្លាក់ប្រធានាធិបតីជាប់ឆ្នោតលោកម័រស៊ីក្នុងឆ្នាំ ២០១៣ និងតាំងពីមេរដ្ឋប្រហារលោកអាល់ស៊ីស៊ីចូលកាន់អំណាចមក បាតុកម្មប្រឆាំងរដ្ឋាភិបាលជារឿងកម្រមានណាស់។
តាមពិតទៅ បាតុកម្មប្រឆាំងរដ្ឋាភិបាលពេលនេះបានកើតមានពីការអំពាវនាវតាមបណ្តាញសង្គមរបស់អ្នកជំនួញអេហ្ស៊ីបម្នាក់ឈ្មោះម៉ូហាម៉េដ អាលីដែលរស់នៅក្នុងប្រទេសអេស្ប៉ាញ។ នៅក្នុងខ្សែអាត់វីដេអូថ្មីផ្សព្វផ្សាយលើបណ្តាញសង្គម លោកម៉ូហាម៉េដ អាលីបានអំពាវនាវដល់ពលរដ្ឋអេហ្ស៊ីបនៅទូទាំងប្រទេសឲ្យចូលរួមមហាបាតុកម្មជាថ្មីនៅថ្ងៃសុក្រ ទី២៧ កញ្ញាចុងសប្តាហ៍នេះ។ បន្ទាប់មក លោកអាលីក៏បានស្នើដល់រដ្ឋអំណចឲ្យដោះលែងបាតុករទាំងអស់ដែលបានចាប់ខ្លួនកាលពីថ្ងៃសុក្រ ទី២០ កញ្ញា។
តាមក្រុមសមាគមអ្នកការពារសិទ្ធមនុស្ស មានបាតុករជាច្រើនរយនាក់ត្រូវបានចាប់ខ្លួននៅក្នុងក្បួនបាតុកម្មរយៈពេល ២ថ្ងៃចុងក្រោយ។ ខណៈនេះ រដ្ឋអំណាចបានដាក់ពង្រាយកម្លាំងទ័ព និងប៉ូលិសនៅតាមទីក្រុងសំខាន់ដើម្បីបង្ការទុកនឹងបាតុកម្មថ្មីទៀតនាពេលខាងមុខ។ ទន្ទឹមគ្នានេះ រដ្ឋាភិបាលបានបញ្ចេញប្រតិកម្មបរិហារនឹងការអំពាវនាវឲ្យមានបាតុកម្មជាថ្មីរបស់លោក ម៉ូហាម៉េដ អាលី។ ចំណែកមធ្យោបាយឃោសនាមហាជនអេហ្ស៊ីបបានលើកឡើងពីឃុបឃិតពីបរទេសដើម្បីបង្កអស្ថិរភាពនៅក្នុងប្រទេសអេហ្ស៊ីប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ