ប្រទេសអ្នកមាន និងកំពុងអភិវឌ្ឍប្រជុំគ្នា រកថវិកា ដើម្បីលុបបំបាត់ភាពក្រីក្រ នៅឆ្នាំ ២០៣០
ទីក្រុង អាឌី អាបេបា របស់អេត្បូពី ចាប់ពីថ្ងៃចន្ទនេះ ត្រូវធ្វើម្ចាស់ផ្ទះ ទទួលបើកជំនួបកំពូលអង្គការសហប្រជាជាតិ ស្តីពីការអភិវឌ្ឍន៍។ គោលដៅនៃសន្និសីទដែលនឹងប្រព្រឹត្តទៅរហូតដល់ថ្ងៃព្រហស្បតិ៍ ទី ១៦ កក្កដា គឺរកឲ្យឃើញ កិច្ចព្រមព្រៀង ថវិកា សម្រាប់ការអភិវឌ្ឍន៍ ចីរកាល រយៈពេល ៥ឆ្នាំ (ឆ្នាំ ២០១៥ ដល់ឆ្នាំ២០៣០) ដែលជាកម្មវិធីកំណត់ឡើងដោយអង្គការសហប្រជាជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
អង្គការសហប្រជាជាតិបានគ្រោងគោលដៅអភិវឌ្ឍន៍ ចីរកាល ចំនួន ១៧ ដែលនឹងត្រូវបោះឆ្នោតអនុម័ត នៅទីក្រុងញូវយ៉ក នាខែកញ្ញាខាងមុខ។ ទិសដៅរបស់អង្គការសហប្រជាជាតិ គឺលុបបំបាត់ចោល ភាពក្រីក្រ និងគ្រោះអត់ឃ្លាន នៅក្នុងពិភពលោក ឲ្យបានពីពេលនេះ រហូតដល់ឆ្នាំ ២០៣០។ សន្និសីទរបស់អង្គការសហប្រជាជាតិស្តីពីពាណិជ្ជកម្ម និងការអភិវឌ្ឍន៍បានប៉ាន់ស្មានថា គេត្រូវការថវិកាជំនួយ ប្រមាណ ២ ៥០០ពាន់លានដុល្លារ ក្នុងមួយឆ្នាំៗ។
តើធ្វើយ៉ាងម៉េច ដើម្បីប្រមូលបានប្រាក់ជំនួយ ដ៏មហាសាលនោះ? ប្រទេសនៅខាងត្បូង និងខាងជើង នៅតែខ្វែងគំនិតគ្នា ពីរឿងប្រភពជំនួយ។ ប្រទេសអ្នកមាន ដែលធ្លាប់តែផ្តល់ជំនួយរហូតមក លែងចង់ដកលុយបន្ថែម ពីហៅប៉ៅ ជាតិ សម្រាប់ផ្តល់ជំនួយអភិវឌ្ឍន៍ ទៀតហើយ។ ប្រទេសអ្នកមាន បានទាមទារឲ្យថវិកាជំនួយ មានប្រភពចេញមកពីវិស័យឯកជន និងប្រទេសដែលកំពុងអភិវឌ្ឍវិញម្តង។ តាមមន្រ្តីរបស់កម្មវិធីអភិវឌ្ឍរបស់អង្គការសហប្រជាជាតិ ជាក់ស្តែង ប្រទេសអ្នកមានចង់ឲ្យប្រទេសដែលកំពុងមានសេដ្ឋកិច្ចទើបរីកលូតលាស់ថ្មី ដូចជា ចិន ឥណ្ឌា ប្រេស៊ីល ចូលរួមផ្តល់ជំនួយអន្តរជាតិ ឲ្យបានច្រើនជាងមុន។ ពោលគឺ ប្រទេសដែលកំពុងមានសេដ្ឋកិច្ចរីកលូតលាស់រួចទៅហើយនោះ ត្រូវប្រមែប្រមូលធនធានក្នុងស្រុក ដើម្បីលុបបំបាត់ភាពក្រីក្រក្នុងប្រទេសរបស់ខ្លួន។ ចំណែកឯ ជំនួយអន្តរជាតិរបស់ប្រទេសផ្តល់ជំនួយ គួរតែបានទៅលើប្រទេសដែលក្រីក្រ គ្មានលទ្ធភាពតែប៉ុណ្ណោះ។
យ៉ាងណាក៏ដោយ សន្និសីទលើកទី ៣ របស់អង្គការសហប្រជាជាតិ នៅតែទន្ទឹងចង់ឲ្យប្រទេសអ្នកមាន នៅតែរក្សាទឹកប្រាក់ជំនួយដូចមុនដដែល។ កន្លងមក ប្រទេសអ្នកមាន បានសន្យាចំណាយ ទឹកប្រាក់ប្រមាណ ០,៧%នៃផលិតផលក្នុងស្រុកសរុប របស់ខ្លួន សម្រាប់ផ្តល់ជំនួយដល់ការអភិវឌ្ឍន៍របស់ប្រទេសក្រីក្រ។ ប៉ុន្តែ រហូតមក មានប្រទេសអ្នកមានតិចតួចណាស់ដែលធ្វើបានតាមការសន្យា។
សន្និសីទនៅក្នុងប្រទេសអេត្យូពី ផ្តល់សំខាន់ផងដែរ ទៅលើការបង្កើតអង្គភាពពន្ធគយអន្តរជាតិ របស់អង្គការសហប្រជាជាតិ ដើម្បីប្រយុទ្ធប្រឆាំងនឹងការលួចរត់គេចពន្ធ នៅក្នុងពិភពលោក។ តាមអង្គការOxfam ដែលមានទីតាំងក្នុងប្រទេសអង់គ្លេស ការលួច មិនបង់ពន្ធ រដ្ឋ ពីសំណាក់ក្រុមហ៊ុនឯកជនធំៗបានធ្វើឲ្យប្រទេសកំពុងអភិវឌ្ឍន៍ខាតបង់ទឹកប្រាក់ប្រមាណ ១០០ពាន់លានដុល្លារ ក្នុងមួយឆ្នាំៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ