នៅកេនយ៉ា ប្រទេសកំណើតរបស់ឪពុក លោកអូបាម៉ានឹងនិយាយពីបញ្ហាភេរវកម្ម និងសេដ្ឋកិច្ច
ប្រធានាធិបតីអាមេរិក លោកបារ៉ាក់ អូបាម៉ា បានធ្វើដំណើរទៅដល់ប្រទេសកេនយ៉ា ហើយ កាលពីយប់ថ្ងៃសុក្រម្សិលមិញ។ នៅព្រលានយន្តហោះ ក្នុងក្រុងណៃរ៉ូប៊ី ក្រៅតែពីទទួលគារវកិច្ច ដោយប្រធានាធិបតីកេនយ៉ា លោកអូបាម៉ាបានទទួលផងដែរ ការស្វាគមន៍ក៏កក់ក្តៅពីក្រុមគ្រួសាររបស់ឪពុកជាតិកេនយ៉ា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
លោកអូបាម៉ា ជាប្រធានាធិបតីអាមេរិក ទីមួយ ដែលធ្វើដំណើរទស្សនកិច្ចក្នុងប្រទេសកេនយ៉ា។ សន្តិសុខ នៅក្នុងរដ្ឋធានី ណៃរ៉ូប៊ី ត្រូវបានពង្រឹងខ្លាំង ជាមួយនឹងការពង្រាយប៉ូលិស ការពារ ប្រមាណ ១ម៉ឺន នាក់។ នៅក្នុងរយៈពេល២ថ្ងៃ នៃទស្សនកិច្ចរបស់ប្រធានាធិបតីអាមេរិក រដ្ឋធានី ណៃរ៉ូប៊ីទាំងមូល ត្រូវបានបិទ មិនឲ្យធ្វើចរាចរណ៍ ចំណែកលំហអាកាសកេនយ៉ា ត្រូវបិទមួយរយៈ នៅថ្ងៃ សុក្រ ដើម្បីទុកទទួលតែយន្តហោះរបស់ប្រមុខដឹកនាំកំពូលរបស់អាមេរិក។
នៅប៉ុន្មានម៉ោង ក្រោយ ទៅដល់ទឹកដីកេនយ៉ា លោកអូបាម៉ាបានសរសេរសារTwetters ដែលថា លោកមានមោទនភាពយ៉ាងខ្លាំង ដែលបានក្លាយជាប្រធានាធិបតីអាមេរិកទី១ ដែលធ្វើទស្សនកិច្ចនៅកេនយ៉ា។ លោកអូបាម៉ា ដែលមានឪពុកជាតិកេនយ៉ា និងម្តាយ អាមេរិកាំង បាននិយាយថា “ខ្ញុំសប្បាយចិត្តណាស់ដែលបានជួបជុំគ្រួសារ និងនិយាយពីបញ្ហាអនាគតជាមួយយុវជនកេនយ៉ា”។
តាមគម្រោង នៅថ្ងៃសៅរ៍ បន្ទាប់ពីដឹកនាំវេទិកាពិភាក្សាជាមួយក្រុមសហគ្រិន នៅកេនយ៉ា លោក ប្រធានាធិបតីអាមេរិកត្រូវជួបលោកប្រធានាធិបតី កេនយ៉ា ដើម្បីនិយាយពីបញ្ហាប្រយុទ្ធ ប្រឆាំងនឹងក្រុមភេរវនិយម។ អាមេរិកជាដៃគូ ដ៏សំខាន់ ផ្នែកសន្តិសុខរបស់កេនយ៉ា ដោយបានបញ្ជូនទាហាន ទៅចូលរួមនៅក្នុងកងកម្លាំងសហភាពអាហ្រ្វិក ដើម្បីប្រយុទ្ធប្រឆាំងនឹងក្រុម ភេរវនិយម នៅសូម៉ាលី។ គឺយន្តហោះដ្រូនរបស់អាមេរិកដែលបានបាញ់សម្លាប់មេកំពូលរបស់ក្រុមអ៊ីស្លាមជ្រុលនិយម ស្ហេបាប់ បណ្តាញអាល់កៃដា នៅអាហ្វ្រិក។ កេនយ៉ា បច្ចុប្បន្ន កំពុងក្លាយជាផ្ទាំងស៊ីប វាយប្រហាររបស់ក្រុម ស្ហេបាប់។ កាលពីឆ្នាំ ២០១៣ ក្រុមស្ហេបាប់នេះ បានវាយប្រហារទៅលើមជ្ឈមណ្ឌលពាណិជ្ជកម្ម ក្នុងក្រុងណៃរ៉ូប៊ី ដោយបានសម្លាប់មនុស្ស៦៧នាក់។ ថ្មីៗនេះទៀត ក្រុមនេះ បានសម្លាប់រង្គាលនិស្សិតសកលវិទ្យាល័យ កេនយ៉ា ចំនួន ១៤៨នាក់។ ស្ថានទូតអាមេរិក ប្រចាំក្រុងណៃរ៉ូប៊ី ផ្ទាល់ក៏ធ្លាប់ទទួលរងការវាយប្រហារភេរវកម្មពីក្រុមអាល់កៃដា នៅឆ្នាំ ១៩៩៨ ដែលកាលណោះ បានសម្លាប់ មនុស្ស សរុប ២២៤ នាក់។
តាំងពីចូលកាន់តំណែងជាប្រធានាធិបតីអាមេរិក នៅឆ្នាំ ២០០៩ លោកបារ៉ាក់ អូបាម៉ាធ្លាប់ បានធ្វើ ដំណើរទស្សនកិច្ចទៅតំបន់អាហ្វ្រិកម្តង ប៉ុន្តែ លើកលែង កេនយ៉ា ដែលជាប្រទេសកំណើតរបស់ឪពុកលោក។ កន្លងមក ទស្សនកិច្ចរបស់លោកអូបាម៉ា ទៅកេនយ៉ាត្រូវរារាំង ដោយសារតែ ប្រធានាធិបតីបច្ចុប្បន្នរបស់កេនយ៉ា គឺលោកកេនយ៉ាតា ត្រូវរងចោទប្រកាន់ពីតុលាការព្រហ្មទណ្ឌ អន្តរជាតិ CPI ក្នុងរឿងអំពើហិង្សាសម្លាប់មនុស្ស ក្រោយការបោះឆ្នោត នៅដើមឆ្នាំ ២០០៨។ ការដែលលោកអូបាម៉ាអាចធ្វើដំណើរទៅកេនយ៉ាបាននៅពេលនេះ ក៏ដោយសារតែតុលាការCPI បានសម្រេច ទម្លាក់ចោល បទចោទប្រកាន់ ប្រធានាធិបតីកេនយ៉ា ក្នុងហេតុផល គ្មានភស្តុតាងគ្រប់គ្រាន់សម្រាប់ដាក់បន្ទុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ