ទាហាននីហ្សេរីយ៉ា រំដោះបានចំណាប់ខ្មាំងរបស់ពួកបូកូហារ៉ាមបានជិត៥០០នាក់
កងកម្លាំងនីហ្សេរីយ៉ា បានធ្វើការវាយបកលើក្រុមបូកូហារ៉ាម ដោយបានរំដោះអ្នកភូមិដែលពួកនេះបានចាប់យកទៅ ជាមនុស្សស្រី និងក្មេងស្រីៗ ចំនួន៣០០នាក់ កាលពីថ្ងៃអង្គារទី ២៨មេសា។ បន្ថែមពីនេះ កាលថ្ងៃព្រហស្បតិ៍ទី ៣០មេសា នេះដែរ ទាហាននីហ្សេរីយ៉ា បានរំដោះបានស្រ្តីអ្នកទោសរបស់ក្រុមបូកូហារ៉ាម បានចំនួន ១៦០នាក់បន្ថែមទៀត ដែលនេះធ្វើឲ្យមានការអបអរ ដោយសារស្ត្រី និងកុមារទាំងនោះ ត្រូវបានក្រុមបូកូហារ៉ាម បង្ឃាំងទុកជាទាសករបំរើពួកវា ជាច្រើនខែ ច្រើនឆ្នាំមកហើយ។
ចុះផ្សាយនៅថ្ងៃ៖
ស្តាប់ - ០២:២៨
អ្នកនាំពាក្យយោធានីហ្សេរីយ៉ា បានផ្តល់ព័ត៌មានថា ក្រុមកំលាំងខ្លួន បានធ្វើការវាយកម្ទេចជំរុំរបស់ក្រុមឧទ្ទាមបូកូហារ៉ាម នៅក្នុងព្រៃ សំប៊ីសា ភាគឥសានប្រទេសនីហ្សេរីយ៉ា កាលពីថ្ងៃអង្គារទី ២៨ មេសា។ ការបំបែកសំបុកមួយផ្នែករបស់ក្រុមបូកូហារ៉ាម បានអនុញ្ញាតិឲ្យទាហាន នីហ្សេរីយ៉ា រំដោះបានក្មេងស្រី និងស្រីទាំងអស់ ៣០០នាក់។ នៅថ្ងៃព្រហស្បតិ៍ ម្សិលមិញនេះទៀត ទាហាននីហ្សេរីយា បានរំដោះបានអ្នកទោសដែលពួកបូកូហារ៉ាមចាប់ទៅ ចំនួន១៦០នាក់ទៀត ដែលសុទ្ធសឹងជាស្រ្តីនិងក្មេងៗ។ ប៉ុន្តែ គេមិនទាន់ដឹងច្បាស់ ថា ក្នុងចំណោមមនុស្សទាំងជិត៥០០នាក់នេះ មានក្មេងស្រីសិស្សសាលា ដែលពួកបូកូហារ៉ាមបានចាប់យកទៅចំនួន ២១៩នាក់ កាលពី មេសា ឆ្នាំទៅ ដែររឺអត់ទេ។
ទោះបីជាយ៉ាងណា ចំនួនមនុស្សដែលរំដោះបាននេះ វានៅតិចតួចណាស់ បើប្រៀបធៀបទៅនឹងចំនួនអ្នកភូមិ ដែលពួកបូកូហារ៉ាម បានចាប់បង្ឃាំងទុក។ សូមបញ្ជាក់ថា ក្រុមបូកូហារ៉ាម ជាក្រុមអ៊ីស្លាមជ្រុលនិយម នៅភាគខាងជើងនីហ្សេរីយ៉ា។ ក្រុមនេះ ជាក្រុមសាហាវព្រៃផ្សៃជាទីបំផុត ដោយបានកាប់សម្លាប់ប្រជាជនស្លូតត្រង់ទាំងភូមិៗ។ ជាក់ស្តែងកាលពីសប្តាហ៍មុន អាជ្ញាធរនីហ្សេរីយ៉ាបានប្រទះឃើញសាកសពអ្នកភូមិជាច្រើនរយនាក់ ស្លាប់ក្នុងភូមិដាច់ស្រយ៉ាលមួយ ដែលនេះ ពិតជាស្នាដៃរបស់ក្រុមអ៊ីស្លាមបូកូហារ៉ាម។
ជារឿយៗ ពួកបូកូហារ៉ាម តែងតែចាប់កេណ្ឌប្រជាជនទាំងភូមិៗ ចូលទៅក្នុងព្រៃដើម្បីបំរើពួកវា។ ក្មេងស្រីៗ និងមនុស្សស្រីពេញវ័យ ត្រូវបានពួកនេះ ចាប់បង្ខំឲ្យធ្វើជាទាសករផ្លូវភេទ និងរស់នៅក្នុងសភាព អនោចអធម៌ជាទីបំផុត។ បើគិតចាប់ពីឆ្នាំ ២០១៤មក មានមនុស្សស្រី ២០០០នាក់ ហើយ ដែលត្រូវបានពួកបូកូហារ៉ាម ចាប់យកទៅ។ ចំណែក ក្មេងប្រុសៗ ត្រូវបានពួកនេះយកទៅបង្វិកហាត់ ហើយឲ្យទៅប្រយុទ្ធនៅសមរភូមិមុខ ជារនាំងការពារពួកវា ក្នុងពេលមានការប្រយុទ្ធគ្នា ជាមួយកងកម្លាំងនីហ្សេរីយ៉ា។
លោក Gordon Brown អតីតនាយករដ្ឋមន្រ្តីអង់គ្លេស ដែលបច្ចុប្បន្ន ជាអ្នកតំណាងអង្គការសហប្រជាជាតិ ផ្នែកការអប់រំ ហើយដែលកំពុងចុះបេសកកម្មនៅនីហ្សេរីយ៉ាផ្ទាល់ បានថ្លែងអបអរចំពោះការរំដោះស្រ្តីនិងកុមារ ជិត៥រយនាក់ ពីក្រញ៉ាំរបស់ពួកបូកូហារ៉ាម។ ប៉ុន្តែលោក បានបន្ថែមថា យើងក៏កុំអាលអរជ្រុលពេកដែរ ព្រោះថាយើងមានកាតព្វកិច្ចរំដោះមនុស្សទាំងអស់មកវិញ ហើយត្រូវបង្រ្កាបក្រុមបូកូហារ៉ាមឲ្យបាន។
គួរបញ្ជាក់ផងដែរថា ជម្លោះរវាងក្រុមឧទ្ទាមអ៊ីស្លាមបូកូហារ៉ាម និងកងកំលាំងរដ្ឋាភិបាលនីហ្សេរីយ៉ា បានសម្លាប់ជីវិតមនុស្សអស់ ១៥ម៉ឺននាក់ហើយ ក្នុងរយៈពេល៦ឆ្នាំកន្លងមកនេះ។ កងទ័ពនីហ្សេរីយ៉ា ទោះបីមានការសហការពី ប្រទេសឆាដ និងប្រទេសកាមេរូន ហាក់នៅមិនទាន់មានប្រៀប លើក្រុមនេះទេ។ ជាក់ស្តែងការវាយប្រយុទ្ធគ្នា កាលពីថ្ងៃ សៅរ៍កន្លងទៅ ដែលទាហាននីហ្សេរីយ៉ា មានស្លាប់ ៤៦នាក់ ហើយប្រជាជនស្លូតត្រង់ស្លាប់២៨នាក់ ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ