អ.ស.ប.សុំឲ្យបណ្តាប្រទេសជិតខាងនីហ្សេរីយ៉ាបង្កើនការប្រយុទ្ធប្រឆាំងទល់នឹងក្រុមឧទ្ទាមបូកូ ហារ៉ាំ
ក្រុមប្រឹក្សាសន្តិសុខរបស់អសប នៅថ្ងៃព្រហស្បតិ៍ម្សិលមិញ បានស្នើសុំបណ្តាប្រទេសដែលនៅជិតខាង នីហ្សេរីយ៉ា ឲ្យបង្កើនប្រតិបត្តិការយោធានិងសហប្រតិបត្តិការជាមួយគ្នាឲ្យកាន់តែខ្លាំងក្លាថែមទៀត ដើម្បីប្រយុទ្ធប្រឆាំងទល់នឹងក្រុមអ៊ីស្លាមជ្រុលនិយមបូកូ ហារ៉ាំនៅនីហ្សេរីយ៉ា។
ចុះផ្សាយនៅថ្ងៃ៖
ស្តាប់ - ០២:១៦
នៅក្នុងសេចក្តីថ្លែងការណ៍មួយដែលត្រូវបានអនុម័តជាឯកច្ឆ័នកាលពីម្សិលមិញ ប្រទេសទាំង១៥សមាជិករបស់ អសប បានតឿនក្រើនដល់បណ្តាប្រទេសដែលនៅក្បែរប្រទេសនីហ្សេរីយ៉ា ឲ្យបង្កើនប្រតិបត្តិការនិងសហប្រតិបត្តិការយោធាថែមទៀត ដើម្បីវាយកំចាត់ក្រុមអ៊ីស្លាមជ្រុលនិយមបូកូ ហារ៉ាំឲ្យកាន់តែប្រសិទ្ធភាពនិងឆាប់រហ័សថែមទៀត។
នៅចំណុចត្រង់នេះ ក្រុមប្រឹក្សាសន្តិសុខរបស់អសប បាន”ស្វាគមន៍ចំពោះការចាត់ចែងរៀបចំជំនួបរបស់ក្រុមអ្នកជំនាញមួយនៅទីក្រុង យ៉ាអ៊ូនដេប្រទេសកាមឺរូន ដើម្បីការរៀបចំដាក់កងកម្លាំងពហុជាតិមួយ។
តាំងពីថ្ងៃព្រហស្បតិ៍ម្សិលមិញ ក្រុមអ្នកជំនាញអាហ្វ្រិកនិងលោកខាងលិចជាច្រើនសិបនាក់ បានចូលរួមនៅក្នុងជំនួបដ៏សំខាន់នេះ ដើម្បីរៀបចំការដាក់ពង្រាយកងទ័ពអាហ្វ្រិកចំនួន៧៥០០នាក់។
ក្រុមប្រឹក្សាសន្តិសុខរបស់អសប បានសម្តែងការគោរពផងដែរចំពោះជំនួយដ៏ប្រសិទ្ធិភាពនិងដ៏ឆាប់រហ័សរបស់កងទ័ពឆាតនៅក្នុងការប្រយុទ្ធប្រឆាំងទល់នឹងឧទ្ទាមបូកូ ហារ៉ាំ។ដោយកងទ័ពឆាតតាំងពីថ្ងៃអង្គារមុន បានបើកការវាយលុកក្នុងទ្រង់ទា្រយធំនៅលើទឹកដីនីហ្សេរីយ៉ាដោយឆ្លងចេញពីប្រទេសកាមឺរ៉ុននិងវាយដណ្តើមកាន់កាប់បានវិញស្រុក Gamboru ក្រោយពីបានបើកការវាយប្រហារយ៉ាងស្វិតស្វាញតទល់ជាមួយពួកអ៊ីស្លាមបូកូហារ៉ាម។
គួររំលឹកថា ក្រុមឧទ្ទាម បូកូ ហារ៉ាំ បានវាយដណ្តើមកាន់កាប់នៅលើទឹកដីនីហ្សេរីយ៉ា បានមួយភាគធំនៅប៉ែកឥសាន្តនៃប្រទេសនិងបានគំរាមកំហែងដល់បណ្តាប្រទេសដែលជាអ្នកជិតខាងនីហ្សេរីយ៉ា។
នៅក្នុងសង្គ្រាមប្រយុទ្ធប្រឆាំងទល់នឹងក្រុមឧទ្ទាមបូកូហារ៉ាម-ក្រសួងការពារជាតិបារាំង បានជូនដំណឹងកាលពីម្សិលមិញ ថាប្រទេសបារាំងបានបញ្ជូនកងយោធាខ្លួនមួយចំនួនតូចទៅកាន់ក្រុង Diffaនៅប៉ែកខាងត្បូងនីហ្ស៊ែរនិងជាប់ពំ្រដែននីហ្សេរីយ៉ា។ ការបញ្ជូនយោធាបារាំងនៅកាន់នីហ្ស៊ែរ គឺដើម្បីជួយក្នុងផ្នែកចារកិច្ចដល់បណ្តាប្រទេសអាហ្វ្រិកដែលបានចូលរួមក្នុងការសង្គ្រាមប្រឆាំងទល់នឹងក្រុមឧទ្ទាមបូកូ ហារ៉ាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ