សៀរ៉ាឡេអូន សូត្រធម៌និងតមអាហារមួយអាទិត្យ ដើម្បីប្រយុទ្ធប្រឆាំងនឹងជំងឺអេបូឡា
ប្រធានាធិបតីសៀរ៉ាឡេអូន លោក អ៊ែរណេស បេ កូរ៉ូម៉ា (Ernest Bai Koroma) បានអំពាវនាវនៅថ្ងៃព្រហស្បតិ៍នេះ នាឱកាសថ្លែងសារជូនពរឆ្នាំថ្មី ទៅកាន់ពលរដ្ឋ ឱ្យនាំគ្នាតាំងចិត្ត សូត្រធម៌ និងតមអាហារ ដើម្បីប្រយុទ្ធប្រឆាំងនឹងជំងឺអេបូឡា។ អេបូឡា ដែលបានរាតត្បាតខ្លាំងជាងគេនៅក្នុងប្រទេសសៀរ៉ាឡេអូននេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
“ដោយមានការព្រមព្រៀងពីប្រមុខសាសនា ការសូត្រ និងតមអាហារ ព្រមទាំងពិធីផ្សេងៗទៀត នឹងត្រូវចាប់ផ្តើមចាប់ពីថ្ងៃព្រហស្បតិ៍នេះ សម្រាប់រយៈពេល៧ថ្ងៃ”។ នេះជាប្រសាសន៍របស់ប្រធានាធិបតីសៀរ៉ាឡេអូន នៅក្នុងសុន្ទរកថាឆ្នាំថ្មី ដែលស្នើសុំឱ្យពលរដ្ឋគ្រប់រូបធ្វើអំពើល្អ អត់អោនទោសគ្នា កុំរើសអើងប្រកាន់សាសនា។ សៀរ៉ាឡេអូន ជាប្រទេសមានប្រជាជន៦០%កាន់សាសនាអ៊ីស្លាម ១០%គ្រិស្តសាសនា និង៣០%ជាអ្នកមានជំនឿលើព្រលឹង ប៉ុន្តែដូចជាបណ្តាប្រទេសជាច្រើនផ្សេងទៀត នៅទ្វីបអាហ្វ្រិក ប្រជាជនចូលរួមក្នុងគ្រប់ពិធីបុណ្យ ដោយគ្មានប្រកាន់សាសនា។
ជាមួយនឹងសេចក្តីប្រកាស ប្រធានាធិបតីបានបង្ហើបឱ្យដឹងអំពីផែនការរបស់ក្រសួងអប់រំ ដែលនឹងត្រូវរៀបចំចាត់វិធានការបើកសាលារៀនឡើងវិញ តាមដែរអាចធ្វើបាន។ សាលារៀន នៅសៀរ៉ាឡេអូន ត្រូវបានបិទទ្វារតាំងពីចុងខែកក្កដាមក បន្ទាប់ពីមានការដាក់ប្រទេសក្នុងស្ថានភាពអាសន្ន។
លោកប្រធានាធិបតី បានបន្ទោសអ្នកដែលចង់យកចំណេញពីការរាតត្បាតនៃជំងឺអេបូឡា ប៉ុន្តែមិនបានលើកឡើង ដោយចំ ករណីភ្នាក់ងារសុខភាពក្នុងមន្ទីរពេទ្យសាធារណៈធ្វើកូដកម្មទាមទារដំឡើងប្រាក់ខែ ដោយគ្មានកាលកំណត់ឈប់ទេ។
ក្នុងខណៈដែលប្រធានាធិបតីអំពាវនាវឱ្យចូលរួមប្រយុទ្ធប្រឆាំងនឹងជំងឺអេបូឡា ការរាតត្បាតហាក់ដូចជាកំពុងលេចឡើងនៅភាគខាងកើតប្រទេស។ អ្នកទទួលខុសត្រូវផ្ទាល់នៅតាមតំបន់ បានគូសបញ្ជាក់ថា បានរកឃើញមានករណីអេបូឡាថ្មីៗជាច្រើនទៀត នៅតាមទីប្រជុំបីកន្លែង នៅភាគខាងកើតប្រទេស។
ដើម្បី ទប់ស្កាត់ការរាតត្បាត អាជ្ញាធរនៅភាគខាងលិចប្រទេសបានបើកយុទ្ធនាការដ៏ធំមួយរាប់ពីផ្ទះមួយទៅផ្ទះមួយ ចាប់ពីថ្ងៃទី ១៧ធ្នូ រហូតដល់ដំណាច់ឆ្នាំ ប៉ុន្តែគេនៅពុំទាន់បានទទួលរបាយការណ៍អ្វីនៅឡើយទេ។ នៅភាគខាងជើង ប្រជាជនត្រូវបង្ឃាំងទុក មិនឱ្យចេញពីផ្ទះបួនថ្ងៃ។
ក្នុងរយៈពេលតែមួយឆ្នាំ អេបូឡា បានផ្តាច់ជីវិតមនុស្សអស់ ៧៨៩០នាក់ ក្នុងចំណោមមានផ្ទុកមេរោគ ជាង២០១៧០នាក់ នៅក្នុងប្រទេសបីដែលរងគ្រោះខ្លាំងជាងគេ គឺ ហ្គីណេ លីបេរីយ៉ា និងសៀរ៉ាឡេអូន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ