អង្គការកសិកម្មស្វាគមន៍វិធានការទប់ស្កាត់ការប្រមូលទិញកសិផលក្នុងតម្លៃថោក
ក្រសួងកសិកម្មកម្ពុជាបានចេញវិធានការទប់ស្កាត់ការប្រមូលទិញកសិផលពីកសិករក្នុងតម្លៃថោក។ ការទប់ស្កាត់នេះធ្វើឡើង ដើម្បីរក្សាស្ថិរភាពតម្លៃកសិផល ពិសេសថ្លៃស្រូវ ដែលតែងតែកើតឡើងក្រោយពេលប្រមូលផល។ អង្គការខាងកសិកម្មវិញបានគាំទ្រចំពោះវិធានការនេះ និងសុំឲ្យមានវិធានការបន្ថែមទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
ក្រសួងបានស្នើឲ្យអាជ្ញាធរមូលដ្ឋាន និងស្ថាប័នពាក់ព័ន្ធចាត់វិធានការទប់ស្កាត់ការប្រមូលទិញផ្តាច់មុខពីឈ្មួញនៅតាមតំបន់ ដើម្បីធ្វើការចរចាថ្លៃឲ្យបានសមស្របតាមស្ថានភាពថ្លៃជាក់ស្តែង។ ពង្រឹងសមត្ថភាពសហគមន៍កសិកម្មមូលដ្ឋានលើការប្រមូលទិញកសិផល។ ធ្វើការចរចាជាមួយសមាគមម៉ាស៊ិនស្រូវប្រចាំខេត្ត ដើម្បីប្រមូលទិញស្រូវពីប្រជាកសិករ។
ការចេញវិធានការរបស់ក្រសួងធ្វើឡើងចំពេល ដែលកសិករកំពុងតែប្រមូលផលស្រូវស្រាល ហើយពេលនេះទទួលបានទិន្នផលប្រមាណជាង៤៧សែនតោននៅឆ្នាំ២០១៦នេះ ពោលគឺមានការកើនឡើងលើសឆ្នាំមុនប្រមាណ២ម៉ឺនតោន។
លោកគាម មករាឌី អ្នកគ្រប់គ្រងកម្មវិធី ប្រតិបត្តិតាមមូលដ្ឋាននៃអង្គការសេដាកថានេះគឺជាចំណាត់ការល្អ ដោយសារតែកន្លងមកកសិករបានជួបនឹងការលំបាកដូចការចំណាយច្រើនលើការផលិត ហើយកត្តានេះធ្វើឲ្យកសិករជំពាក់បំណុលធនាគារ។ ក្រៅពីវិធានការបន្ទាបតម្លៃពីឈ្មួញនេះ លោកគាម មករាឌីបញ្ជាក់ថាក្រសួងកសិកម្មគួរតែមានវិធានការមួយចំនួនទៀត។
លោកបន្ថែមថាការចងក្រងសហគមន៍កសិករបណ្តុះបណ្តាលពួកគាត់ឲ្យមានចំណេះដឹងក្រៅពីបច្ចេកទេសដាំដុះ ដូចជាចំណេះដឹងផ្នែកទីផ្សារ ទំនាក់ទំនងផ្នែកពាណិជ្ជកម្មជាដើម។ ក្រសួងគួរតែឧបត្ថមទុនមួយចំនួនសម្រាប់ចេញខាតជំនួសកសិករ ដើម្បីធានាតម្លៃផលិតផលរបស់កសិករ ឲ្យដូចប្រទេសជិតខាង។
ចំណែកលោកមូល សារិទ្ធី អគ្គលេខាធិការនៃសហព័ន្ធស្រូវអង្ករកម្ពុជាថាការធ្លាក់ចុះថ្លៃស្រូវនៅក្នុងប្រទេសកម្ពុជា ដោយសារតែក្រោយឆ្នាំ២០១៤មក មានឈ្មួញតែមួយគឺប្រទេសវៀតណាមជាអ្នកទិញ ហើយដោយសារតែគ្មានការប្រកួតប្រជែងទើបឈ្មួញអាចកំណត់តម្លៃបានដូច្នេះ។
យ៉ាងណាមិញលោកមូល សារិទ្ធី ថាវិធានការរបស់ក្រសួងកសិកម្មនៅពេលនេះគឺជួយបានតែមួយកម្រិតតែប៉ុណ្ណោះ ហើយអ្វីដែលអាចជួយតម្លៃស្រូវក្នុងរយៈពេលវែងគឺត្រូវរកវិធីទិញស្រូវទុកទាំងរដ្ឋ និងឯកជន។ លោកសារិទ្ធី មិនទាន់មានតួលេខជាក់លាក់នៅឡើយទេ ចំពោះតម្លៃស្រូវបច្ចុប្បន្ន ប៉ុន្តែតាមការប៉ាន់ប្រមាណរបស់លោកគឺស្រូវមានតម្លៃក្រោម១០០០រៀលក្នុងមួយគីឡូក្រាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ