អាមេរិកស្វែងរកការពង្រឹងសន្តិសុខស្ថានទូតពីប៉ូលីសកម្ពុជា
ស្ថានទូតអាមេរិកបានជួបពិភាក្សាជាមួយអាជ្ញាធររបស់កម្ពុជា ដើម្បីពិភាក្សាអំពីវិធានការពង្រឹងសន្តិសុខជុំវិញស្ថានទូតអាមេរិកនៅក្នុងរាជធានីភ្នំពេញ។ ការស្វែងរកការសហការអំពីការពង្រឹងសន្តិសុខនេះ ធ្វើឡើងនៅពេលស្ថានទូតអាមេរិកមួយចំនួនត្រូវបានវាយប្រហារ និងកំទេចដោយក្រុមជនជាតិអ៊ីស្លាម ដែលផ្ទុះកំហឹងដោយសារឯកសារវីដេអូដែលប្រមាថមេសាសនាអ៊ីស្លាម។
ចុះផ្សាយនៅថ្ងៃ៖
ស្តាប់ - ០២:០៨
ការលេចធ្លាយខ្សែវីដេអូឯកសារដែលប្រមាថមេសាសនាអ៊ីស្លាម បានបង្កអោយផ្ទុះអំពើហឹង្សា មិនគួរអោយជឿពីសំណាក់ក្រុមជនអ៊ីស្លាម ទៅលើរដ្ឋាភិបាលអាមេរិក។ ឯកអគ្គរដ្ឋទូតអាមេរិកម្នាក់ និងមន្ត្រីការទូត៣នាក់ទៀតត្រូវបានសម្លាប់នៅក្នុងអំពើហឹង្សានៅក្នុងស្ថានកុងស៊ុលអាមេរិកក្នុងទីក្រុង ប៊ែនហ្កាស៊ី នៃប្រទេសលីប៊ីកាលពីសប្តាហ៍មុន។ ការតវ៉ា និងបាតុកម្មពីសំណាក់ជនមូស្លីមបានកើតឡើងជាបន្តបន្ទាប់ក្នុងប្រទេសផ្សេងទៀតជាច្រើនដែលមានស្ថានទូត និងអគ្គកុងស៊ុលអាមេរិកដូចជាអេហ្ស៊ីប ប៉ាគីស្ថាន អាហ្វហ្កានីស្ថាន លីបង់ យេមែន និងនៅអូស្ត្រាលីជាដើម។ បាតុភាពបែបនេះបានតំរូវអោយប្រធានាធិបតីលោកបារ៉ាក់ អូបាម៉ា ប្រកាសដាក់បញ្ជាអោយស្ថានទូត និងស្ថានកុងស៊ុលអាមេរិកនៅលើពិភពលោកទាំងអស់ពង្រឹងសន្តិសុខរបស់ស្ថានទូត។ ទន្ទឹមគ្នានេះ ប្រជាពលរដ្ឋអាមេរិកដែលនៅក្រៅប្រទេសក៏ត្រូវបានប្រាប់ឲ្យប្រុងប្រយ័ត្នអំពីបញ្ហាសន្តិសុខរបស់ខ្លួនផងដែរ។
នៅកម្ពុជា អ្នកនាំពាក្យស្ថានទូតអាមេរិក លោក sean McIntosh បានថ្លែងប្រាប់អ្នកកាសែតនៅថ្ងៃនេះថា ស្ថានទូតអាមេរិកបានពិភាក្សាអំពីវិធានការពង្រឹងសន្តិសុខជាមួយក្រសួងមហាផ្ទៃរួចហើយ។ អ្នកនាំពាក្យបន្តថា លោកប្រធានាធិបតីអាមេរិកបានស្នើអោយមន្ត្រីស្ថានទូតជំរុញអោយប្រទេសម្ចាស់ផ្ទះនិមួយៗដែលមានវត្តមានស្ថានទូតអាមេរិកត្រូវអនុវត្តកាតព្វកិច្ចប្រទេសម្ចាស់ផ្ទះក្នុងការការពារស្ថានទូតបរទេស។ ទាក់ទងនឹងសំណើរបស់ស្ថានទូតអាមេរិកនេះ អ្នកនាំពាក្យអគ្គស្នងការដ្ឋាននគរបាលជាតិ លោកឧត្តមសេនីយឯក គៀត ចន្ទថារិទ្ធបានអះអាងប្រាប់វិទ្យុបារាំងអន្តរជាតិនៅល្ងាចថ្ងៃពុធនេះថា មន្ត្រីស្ថានទូតអាមេរិកបានមកជួបពិភាក្សាការងារសន្តិសុខនេះជាមួយអគ្គស្នងការនគរបាលជាតិ លោក នេត សាវឿន។ ហើយថាលោកអគ្គស្នងការបានដាក់បទបញ្ជាដើម្បីពង្រឹងសន្តិសុខស្ថានទូតអាមេរិក។ អ្នកនាំពាក្យនគរបាលជាតិបានបន្តថា កម្ពុជាត្រូវគោរពអនុសញ្ញាទីក្រុងវិយេនដែលចែងតម្រូវអោយប្រទេសម្ចាស់ផ្ទះការពារសន្តិសុខស្ថានទូត និងមន្ត្រីទូតបរទេស។
គួរបញ្ជាក់ថា នៅក្បែរកម្ពុជា នៅក្នុងទីក្រុងបាងកក ប្រទេសថៃ ការតវ៉ាពីក្រុមជនមូស្លីមក៏បានកើតឡើងដែរកាលពីរសៀលថ្ងៃអង្គារម្សិលមិញ បើទោះបីជាមានភ្លៀងធ្លាក់ខ្លាំងយ៉ាងក៏ដោយ។ ការតវ៉ា បើទោះជាមិនមានចរិតហិង្សាក៏ដោយ ក៏បានបង្ខំអោយស្ថានទូតអាមេរិកបិទទ្វារមុនម៉ោងផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ