គុយបា៖ អាមេរិកបន្ថែមទណ្ឌកម្មសេដ្ឋកិច្ច និងបើកផ្លូវ ឲ្យអាចប្តឹងក្រុមហ៊ុនបរទេស
លោកដូណាល់ ត្រាំ បានសម្រេចបន្ថែមទណ្ឌកម្មសេដ្ឋកិច្ច ទៅលើប្រទេសគុយបា ដោយបានរិតបន្តឹង ការធ្វើដំណើរចេញចូលជាមួយគុយបា ព្រមទាំងរឹតបន្តឹង ការផ្ទេរសាច់ប្រាក់ដុល្លារ ដោយផ្ទាល់ទៅគុយបា។ មិនត្រឹមតែប៉ុណ្ណោះ លោកប្រធានាធិបតីអាមេរិក បានសម្រេចបើកផ្លូវ ឲ្យគេអាចប្តឹងក្រុមហ៊ុនបរទេសទាំងអស់ ដែលរកស៊ីជាមួយគុយបា។ វិធានការនេះ ត្រូវបានសហភាពអឺរ៉ុប និងកាណាដា បរិហារថាជាវិធានការ អត្មានិយម ហើយវាបំពាន នឹងច្បាប់អន្តរជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
អ្នកនាំពាក្យសេតវិមានអាមេរិក បានប្រកាសឲ្យដឹងកាលពីថ្ងៃពុធ ទី១៧មេសាថា សហរដ្ឋអាមេរិក និងធ្វើការរឹតបន្តឹង រាល់ការធ្វើដំណើរចេញចូលទៅប្រទេសគុយបា ដែលមិនមានលក្ខណៈជាការទៅជួបជុំសួរសុខទុក្ខគ្រួសារ។ ចំណែកការផ្ទេរសាច់ប្រាក់ដុល្លារ ចេញពីអាមេរិក គឺម្នាក់អាចផ្ទេរបានត្រឹមតែ ១០០០ដុល្លារ ប៉ុណ្ណោះ រៀងរាល់៣ខែម្តង។
អ្នកនាំពាក្យសេតវិមានអះអាងថា វិធានការនេះ នឹងកាត់បន្ថយលំហូរប្រាក់ដុល្លារ កុំឲ្យចូលទៅក្នុងហោរប៉ៅ របស់ពួកមេដឹកនាំកុម្មុយនីស្តិគុយបា។ ក្រៅពីវិធានការទណ្ឌកម្មលើគុយបា រដ្ឋបាលអាមេរិក ក៏បានដាក់បន្ថែមទណ្ឌកម្មហិរញ្ញវត្ថុ ទៅលើប្រទេសវ៉េណេស៊ុយអេឡា និងនីការ៉ាហ្កា។ អ្នកនាំពាក្យសេតវិមាន លើកឡើងថា សហរដ្ឋអាមេរិក ចង់បង្ហាញជំហរ ជួយក្រុមអ្នកស្រលាញ់ប្រជាធិបតេយ្យ នៅតាមប្រទេសទាំងនេះ។
ព្រមជាមួយគ្នានេះដែរ បើតាមការលើកឡើង របស់លោករដ្ឋមន្ត្រីការបរទេសអាមេរិក គឺចាប់ពីថ្ងៃទី ២ ឧសភាទៅ អាមេរិកនឹងចាប់ផ្តើមអនុវត្ត ផ្នែកទី៣ នៃច្បាប់ Helms-Burton ដែលត្រូវបានគេអនុម័ត នៅឆ្នាំ១៩៩៦។ ច្បាប់នេះ នឹងបើកផ្លូវឲ្យគេអាចប្តឹងក្រុមហ៊ុនទាំងអស់ មិនថាក្រុមហ៊ុនអាមេរិក ឬប្រទេសផ្សេងទេ បើក្រុមហ៊ុននោះរកស៊ី ជាមួយក្រុមហ៊ុនគុយបា ដែលត្រូវបានគេធ្វើជាតូបនីយកម្មក្រោយឆ្នាំ១៩៥៩។
ក្រោយដឹងដំណឹងនេះ សហភាពអឺរ៉ុប និងកាណាដា ដែលបច្ចុប្បន្ន មានក្រុមហ៊ុនជាច្រើន កំពុងរកស៊ី និងវិនិយោគនៅគុយបានោះ បានចេញសេចក្តីប្រកាសរួមគ្នា ថាវិធានាការរបស់សហរដ្ឋអាមេរិក គឺជាវិធានការ ដ៏គួរឲ្យសោកស្តាយ ព្រោះវាបំពានទៅនឹងច្បាប់អន្តរជាតិ។ សហភាពអឺរ៉ុប និងកាណាដា ប្តេជ្ញាថា នឹងការពារក្រុមហ៊ុនខ្លួន ដែលរកស៊ីនៅគុយបា ហើយថា រាល់ការកាត់សេចក្តីលើវិវាទទាំងឡាយណា ដែលមិនចេញពីក្របខណ្ឌនៃអង្គការពាណិជ្ជកម្មពិភពលោក គឺមិនអាចមានសុពលភាពជាដាច់ខាត។ដោយឡែក លោករដ្ឋមន្ត្រីក្រសួងសេដ្ឋកិច្ចបារាំង បានលើកឡើងថា ការអនុវត្តពាក្យបណ្តឹងនៅអាមេរិក មកលើក្រុមហ៊ុនប្រទេសផ្សេង ដែលរកស៊ីនៅគុយបា គឺជារឿងមួយមិនអាចទទួលយកបានទេ ហើយអាមេរិក ត្រូវតែកែប្រែជំហរនេះជាបន្ទាន់។
គួរកត់សំគាល់ថា លំហូរសាច់ប្រាក់ដុល្លារ ដែលប្រជាជនគុយបា ភៀសខ្លួននៅសហរដ្ឋអាមេរិក ផ្ញើរទៅជួយ សាច់ញាតិក្រុមគ្រួសារ គឺជាដង្ហើមសេដ្ឋកិច្ច ដ៏សំខាន់សម្រាប់ជីវភាពប្រចាំថ្ងៃ។ រដ្ឋមន្ត្រីការបរទេសគុយបា បានអំពាវនាវ ឲ្យសហគមអន្តរជាតិ ថ្កោលទោសអាកប្បកិរិយា ក្អេងក្អាង គំរាមកំហែងគេ របស់រដ្ឋាភិបាលលោកដូណាល់ ត្រាំ។ លោក Ben Rhodes អតីតទីប្រឹក្សាផ្ទាល់ របស់លោកអូបាម៉ា បានលើកឡើងថា៖ “ប្រជាជនគុយបា លំបាកវេទនាប្រមាណកន្លះសតវត្សមកហើយ ដោយសារតែទណ្ឌកម្មសេដ្ឋកិច្ច។ តែថ្នាក់ដឹកនាំអាមេរិកខ្លះ មិនខ្វាយខ្វល់ឡើយ ហេតុតែចង់ឲ្យគេឃើញ ថាខ្លួនឯងខ្លាំង”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ