អគ្គនាយកFBI និងNSA ត្រៀមខ្លួនទៅឆ្លើយបំភ្លឺនៅចំពោះមុខសភាតំណាង ស្តីពីសំណុំរឿងចារកិច្ចរុស្ស៊ី
សភាអ្នកតំណាងអាមេរិក នឹងបើកការសួរដេញដោល ជាលើកដំបូង នៅថ្ងៃចន្ទនេះ ស្តីពីសំណុំរឿងចារកិច្ចរុស្ស៊ី ដែលត្រូវគេសង្ស័យថា បានលូកដៃចូលមកក្នុងការបោះឆ្នោតប្រធានាធិបតី កាលពីខែវិច្ឆិកាកន្លងទៅ ព្រមទាំងការចោទប្រកាន់របស់លោកដូណាល់ ត្រាំ ដែលថាលោកអូបាម៉ា បានបញ្ជាឲ្យគេលបស្តាប់ទូរស័ព្ទរបស់ខ្លួន។ អគ្គនាយកFBI និងអគ្គនាយកទីភ្នាក់ងារសន្តិសុខជាតិអាមេរិក នឹងត្រូវទៅឆ្លើយបំភ្លឺជាលើកទីមួយ បន្ទាប់ពីរឿងរ៉ាវទាំងអស់នេះបានផ្ទុះឡើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
នេះជាលើកទីមួយហើយ ដែលលោក James Comey អគ្គនាយក FBI និងលោក Mike Rogers អគ្គនាយកទីភ្នាក់ងារសន្តិសុខជាតិ ហៅកាត់ថា NSA នឹងត្រូវចូលទៅឆ្លើយបំភ្លឺ នៅចំពោះមុខគណកម្មការស៊ើបការសំងាត់ នៃសភាតំណាង ស្តីពីសំណុំរឿងពាក់ព័ន្ធនឹងរុស្ស៊ី។ សវនាកាសួរដេញដោល នឹងត្រូវធ្វើជាសាធារណៈ ដែលនេះគឺជាការទាមទាររបស់សមាជិកសភាជាច្រើនអ្នក ដើម្បីជំរះរាល់មន្ទិលសង្ស័យ។
អ្នកនាំពាក្យគណកម្មការស៊ើបការសំងាត់នៃសភាតំណាង បានបញ្ជាក់ថា គេរំពឹងថា លោកទាំងពីរនាក់ខាងលើ នឹងផ្តល់ព័ត៌មានលំអិត ស្តីអំពីសកម្មភាពលួចលាក់របស់រុស្ស៊ី កាលពីកំឡុងពេលឃោសនាបោះឆ្នោតនៅឆ្នាំ២០១៦ ស្តីពីវិធានការឆ្លើយតបរបស់រដ្ឋាភិបាលអាមេរិក ស្តីពីរបាយការណ៍សន្និដ្ឋានលំអិត ដែលធ្វើកាលពីថ្ងៃទី៦មករា និងចុងក្រោយ គឺទាក់ទងនឹងការចោទប្រកាន់ របស់លោកដូណាល់ ត្រាំ កាលពីពេលថ្មីៗនេះ ថាលោកអូបាម៉ា បានបញ្ជាឲ្យគេលបស្តាប់ទូរស័ព្ទខ្លួន និងក្រុមការងារខ្លួន។
តែយ៉ាងណា គេជឿថា លោកនាយក FBI និង NSA អាចប្រហែលជាមិនអាចនិយាយអ្វីបានច្រើនទេ ដោយសារតែផ្នែកខ្លះនៃសំណុំរឿងនេះ ត្រូវចាត់ទុកជាកិច្ចការសំងាត់របស់រដ្ឋ។ យ៉ាងណាមិញ សមាជិកសភាតំណាង មិនថាមកពីគណបក្សប្រជាធិបតេយ្យ រឺសាធារណៈរដ្ឋទេ បានរិះគន់ ស្ថាប័នទាំងពីរនេះ ថាមិនបានផ្តល់ព័ត៌មាន រឺក៏ទិន្ន័យឲ្យបានច្បាស់សោះ ទាក់ទិននឹងចារកិច្ចរុស្ស៊ី។
ដោយឡែក ចំពោះការចោទប្រកាន់របស់លោកដូណាល់ ត្រាំ ដែលថាលោកអូបាម៉ា បានបញ្ជាឲ្យគេលបស្តាប់ទូរស័ព្ទគាត់ កាលពីកំឡុងពេលឃោសនា បោះឆ្នោតនោះ មានសមាជិកសភាជាច្រើន ដែលអ្នកខ្លះមកពីគណបក្សសាធារណៈរដ្ឋ យល់ឃើញថា វាជាការចោទប្រកាន់ ដោយគ្មានភស្តុតាង និងដោយប្រឌិតទាំងស្រុង។ តាមរយៈ សវនាកាសួរដេញដោល នៅថ្ងៃនេះ និងលើកទីពីរ នៅថ្ងៃ២៨មីនាខាងមុខនេះ គេសង្ឃឹមថា ការពិតប្រាកដជាលាតត្រដាង ហើយលោកដូណាល់ ត្រាំ ត្រូវតែសុំទោសលោកអូបាម៉ា ជាសាធារណៈ ចំពោះពាក្យចោទប្រកាន់ បំភ្លើសការពិតរបស់ខ្លួន។
សូមរំលឹកថា មន្ត្រីរដ្ឋាភិបាលោកត្រាំ ជាច្រើននាក់ ត្រូវបានព័ត៌មានបែកធ្លាយបង្ហាញថា បានជាប់ទំនាក់ទំនង និងទទួលប្រាក់ពីភ្នាក់ងាររុស្ស៊ី។ យ៉ាងណាមិញ សមាជិកសភាតំណាង និងព្រឹទ្ធសភាអាមេរិក បានគំរាមថានឹងពន្យាការបោះឆ្នោត ផ្តល់សេចក្តីទុកចិត្តដល់រដ្ឋាភិបាលលោកត្រាំ បើសិនជាការពិតទាក់ទិននឹងរឿងអាស្រូវទាំងនេះ នៅមិនទាន់ដឹងច្បាស់ទេនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ