ប្រេស៊ីល៖ វាសនាចុងក្រោយ នៃតំណែងប្រធានាធិបតីរបស់លោកស្រី ឌីលម៉ា រូសែហ្វ
ចុះផ្សាយនៅថ្ងៃ៖
ស្តាប់ - ០៧:៤៥
លោកស្រី ឌីលម៉ា រូសែហ្វ ប្រធានាធិបតីប្រេស៊ីល ដែលបានរងនូវការចោទប្រកាន់នានា ហើយដែលឈានទៅដល់ការព្យួរតំណែងបណ្តោះអាសន្ន កាលពីខែឧសភាមក នៅថ្ងៃចន្ទទី ២៩ សីហានេះ លោកស្រីត្រូវចូលទៅមុខអង្គព្រឹទ្ធសភា ដើម្បីផ្តល់អំណះអំណាងការពារខ្លួន។ នេះគឺជាឱកាសចុងក្រោយបង្អស់ហើយ សម្រាប់លោកស្រី ឌីលម៉ា រូសែហ្វ ក្នុងការព្យាយាមរក្សាមុខតំណែងជាប្រធានាធិបតី។ លោកស្រីតែងតែបដិសេធ រាល់ការចោទប្រកាន់ ហើយបរិហារក្រុមអ្នកនយោបាយស្តាំនិយម ថាបានរៀបចំគ្រប់យ៉ាង ដើម្បីធ្វើរដ្ឋប្រហារនយោបាយ ទម្លាក់លោកស្រីចេញពីតំណែង។
លោកស្រីឌីល ម៉ារូសែហ្វ ត្រូវគេចោទប្រកាន់ ទៅលើពីរករណី។ ទីមួយគឺគេចោទថាបានប្រើប្រាស់ខ្ទង់ចំណាយរបស់ថវិកាជាតិ ច្រើនហួសហេតុ ដោយគ្មានការសម្រេចយល់ព្រមពីរដ្ឋសភា ហើយបទចោទប្រកាន់ទីពីរ គឺការរៀបចំកែច្នៃគណនីហិរញ្ញវត្ថុរបស់រដ្ឋ ដើម្បីបិទបាំងពីឱនភាពនៃស្ថានភាពហិរញ្ញវត្ថុរបស់រដ្ឋ ក្នុងអំឡុងពេលដែលលោកស្រីធ្វើការឃោសនាបោះឆ្នោត អាណត្តិទី២ នៅឆ្នាំ២០១៤។
ឱកាសចុងក្រោយ ដើម្បីការពារខ្លួន មុននឹងត្រូវគេដកហូតតំណែងប្រធានាធិបតី៖
នីតិវិធីចោទប្រកាន់ និងដកហូតតំណែងប្រធានាធិបតីនេះ បានចាប់ផ្តើមឡើងដោយមនុស្សម្នាក់គឺលោក Eduardo Cunha អតីតប្រធានសភា កាលពីខែធ្នូ ឆ្នាំ២០១៥។ ដោយយោងលើការចោទប្រកាន់ទាំងពីរខាងលើ លោក Eduardo Cunha ដែលជាមនុស្សមកពីគណបក្សស្តាំនិយម បានប្រមែលប្រមូលសម្លេងគាំទ្រក្នុងសភា ដើម្បីបោះឆ្នោតយល់ព្រមទម្លាក់លោកស្រីឌីលម៉ា រូសែហ្វ កាលពីថ្ងៃទី១៧ មេសា។ នីតិវីធីបន្ទាប់មកទៀត គឺដល់វេនដែលព្រឹទ្ធសភាត្រូវបោះឆ្នោត។ សមាជិកព្រឹទ្ធសភា បានបោះឆ្នោតរួចម្តងមកហើយ កាលពីថ្ងៃទី១២ ឧសភា ដោយសម្លេងភាគច្រើន ២ភាគ៣ បានសម្រេចព្រមព្យួរតំណែងបណ្តោះអាសន្នលោកស្រីឌីល ម៉ារូសែហ្វ។
ក្នុងអំឡុងពេលនេះ គឺលោក Michel Temer អនុប្រធានាធិបតីរបស់លោកស្រី ដែលត្រូវកាន់មុខតំណែង ជាប្រធានាធិបតីបណ្តោះអាសន្ន។ ហើយនៅថ្ងៃចន្ទ ទី២៩ឧសភានេះ គឺព្រឹទ្ធសភា ត្រូវបោះឆ្នោតម្តងទៀត ដើម្បីសម្រេចជាចុងក្រោយ និងជាផ្លូវការថាត្រូវដក រឺមិនដកតំណែងលោកស្រីឌីលម៉ា រូសែហ្វ។ ដូច្នេះនេះគឺជាឱកាសចុងក្រោយហើយ សម្រាប់លោកស្រីឌីល ម៉ារូសែហ្វ ដើម្បីផ្តល់អំណះអំណាង ការពារខ្លួន នៅចំពោះមុខព្រឹទ្ធសភា។
យោងតាមនីតិវិធី គឺលោកស្រីឌីលម៉ា រូសែហ្វ មានពេល៣០នាទី ដើម្បីធ្វើបទបង្ហាញ ផ្តល់អំណះអំណាង ទៅកាន់អង្គព្រឹទ្ធសភា។ ហើយបន្ទាប់មកទៀតព្រឹទ្ធសភា ត្រូវប្រជុំវែកញែក ដេញដោលយោបល់គ្នា មុននឹងធ្វើការបោះឆ្នោតរកសម្លេងភាគច្រើន ក្នុងរយៈពេលពីរថ្ងៃបន្ទាប់។ ពោលគឺនៅថ្ងៃទី៣១សីហា ព្រឹទ្ធសភាត្រូវបោះឆ្នោតជាចុងក្រោយ។ បើសិនមានសម្លេង២ភាគ៣ ក្នុងចំណោម៨១សម្លេង គឺមានន័យថា លោកស្រីត្រូវដកហូតចេញពីតំណែង។ ក្នុងករណីនេះ លោក Michel Temer នឹងត្រូវក្លាយជាប្រធានាធិបតីប្រេស៊ីល យ៉ាងពេញមុខ រហូតដល់ចប់អាណត្តិនៅចុងឆ្នាំ២០១៨។ ហើយលោកស្រី ឌីលម៉ា រូសែហ្វ វិញ នឹងត្រូវគេហាមឃាត់ មិនឲ្យធ្វើនយោបាយរយៈពេល៨ឆ្នាំ។
៣០នាទី ដើម្បីបញ្ចុះបញ្ចូលសមាជិកព្រឹទ្ធសភា៖
តាមការផ្តល់ដំណឹងពីអ្នកនាំពាក្យរបស់លោកស្រី ឌីលម៉ា រូសែហ្វ ក្នុងសន្ទរកថារយៈពេល៣០នាទីនេះ លោកស្រីរូសែហ្វ នឹងលើកឡើងជាសំខាន់ ទាក់ទងទៅនឹងការប្រយុទ្ធតស៊ូ សឹងតែពេញមួយជីវិតរបស់គាត់ ក្នុងការការពារសិទ្ធិសេរីភាព និងលទ្ធិប្រជាធិបតេយ្យប្រេស៊ីល។ លោកស្រីនឹងប្រាកដជាលើកឡើងអំពី បទពិសោធន៍ជីវិត ក្នុងពេលដែលលោកស្រីត្រូវបានរបបផ្តាច់ការយោធា ចាប់ដាក់ឃុំ សួរចម្លើយ និងធ្វើទារុណកម្ម ក្នុងរវាងឆ្នាំ១៩៧០។
អ្វីដែលជាការប៉ាន់ស្មានរបស់អ្នកវិភាគ គឺលោកស្រី រូសែហ្វ និងផ្តល់អំណះអំណាង តាមរយៈការចោទប្រកាន់បកទៅវិញ ថាការអនុវត្តន៍នីតិវិធីទម្លាក់លោកស្រីចេញពីតំណែងនេះ គឺជារឿងដ៏អម៉ាសបំផុត ព្រោះវាមិនខុសពីការធ្វើរដ្ឋប្រហារ ដោយយករដ្ឋធម្មនុញ្ញមកជាខែលនោះទេ។ ម្តេចបានលោកស្រីហ៊ាននិយាយដូច្នេះ គឺថារាល់ការចោទប្រកាន់ទាំងអំបាលមាណ គឺពុំសមស្របទាល់តែសោះ។ ទីមួយ ទាក់ទិនទៅនឹងការចំណាយថវិការដ្ឋ ដោយមិនបានសុំការយល់ព្រមពីរដ្ឋសភា គឺមិនមែនមានតែលោកស្រីម្នាក់ឯងទេ ដែលធ្វើ គឺប្រធានាធិបតីប្រេស៊ីលមុនៗ ក៏ធ្លាប់ធ្វើបែបនេះដែរ ក្នុងករណីចាំបាច់នានា ដើម្បីសម្រេចគោលនយោបាយរដ្ឋាភិបាល ឲ្យបានរហ័ស។ ហើយចំណែកការចោទប្រកាន់ទីពីរ ទាក់ទិននឹងការបិទបាំងឱនភាពនៃថវិការដ្ឋ លោកស្រីអះអាងថា វាគឺជាការប្រឌិតរៀបចំទាំងស្រុង របស់អ្នកនយោបាយ និងអ្នកជំនាញហិរញ្ញវត្ថុ ដើម្បីដាក់បន្ទុកលើលោកស្រី។
ប៉ុន្តែសួរថា តើអំណះអំណាង ត្រឹម៣០នាទី នេះ តើសមាជិកព្រឹទ្ធសភា ដែលធ្លាប់បោះឆ្នោតសម្លេងភាគច្រើនម្តងរួចមកហើយនោះ អាចនឹងប្តូរចិត្តបានទេ? គ្មានអ្នកណាជឿថា សមាជិកព្រឹទ្ធសភា និងបោះឆ្នោតសង្រ្គោះលោកស្រីឌីលម៉ា រូសែហ្វទេ។ សូម្បីតែលោកស្រី រូសែហ្វខ្លួនឯង ក៏មិនសង្ឃឹមដែរ។ ក៏ប៉ុន្តែមនុស្សលោកស្រីរូសែហ្វ មិនងាយចុះចាញ់ងាយៗទេ ហើយវាគឺជាការការពារកិត្តិយស នឹងគោលជំហររបស់លោកស្រី ដែលគាត់ត្រូវតែមានវត្តមានចំពោះមុខអង្គព្រឹទ្ធសភា។
តាមច្បាប់ ទាល់តែសមាជិកព្រឹទ្ធសភាចំនួន៥៤នាក់ ក្នុងចំណោម៨១ បោះឆ្នោតព្រម ទើបអាចដកលោកស្រីរូសែហ្វបាន។ យ៉ាងណាមិញ បើយោងតាមលទ្ធផលស្ទាបស្ទង់មតិ ធ្វើឡើងដោយសារព័ត៌មាន Folha de Sao Paulo កាលពីថ្ងៃទី២៥សីហា បានបង្ហាញថា សមាជិកព្រឹទ្ធសភា៥១នាក់ នឹងបោះឆ្នោតព្រម ទល់នឹង១៨នាក់ ដែលមិនយល់ព្រម។ ចំណែក១២នាក់ទៀត មិនបានប្រាប់ពីការសម្រេចចិត្តរបស់ខ្លួនទេ។ ហើយបើយោងតាមការស្ទាបស្ទង់មតិ ធ្វើឡើងដោយសារព័ត៌មាន El Globo វិញ គឺមានសមាជិកព្រឹទ្ធសភា៥៣រូបឯនោះ ដែលបានអះអាងថានឹងបោះឆ្នោតទម្លាក់លោកស្រីរូសែហ្វ។ មាន១០រូបដែលបានសុំមិនប្រាប់។ អញ្ចឹងជារួម យើងឃើញថា សំណាងដែលលោកស្រីមិនត្រូវដកពីតំណែងនោះ គឺមានតិចណាស់។
ឆាកល្ខោននយោបាយ ដើម្បីអំណាច និងផលប្រយោជន៍សេដ្ឋកិច្ច៖
ក្នុងរឿងបែបនេះ គ្មាននរណាម្នាក់ស្អាតស្អំទាំងស្រុងទេ។ ប្រជាជនប្រេស៊ីលទូទៅ អស់សង្ឃឹមនឹងរដ្ឋាភិបាលប្រេស៊ីល ដែលបានចាយលុយរាប់រយលាន ក្នុងការរៀបចំការប្រកួតបាល់ទាត់ពិភពលោក និងកីឡាអូឡាំពិក ដែលទើបតែបិទបញ្ចប់ទៅថ្មីៗនេះ។ ការរៀបចំទាំងអស់នេះ បានធ្វើឲ្យប្រេស៊ីលជំពាក់គេវ័នក ខណៈដែលប្រជាជនប្រេស៊ីលប្រមាណ១១លាននាក់ កំពុងតែអត់ការងារធ្វើ។ ទាំងនេះ គឺជាអ្វីដែលគេអាចបន្ទោសរដ្ឋាភិបាល ដឹកនាំដោយលោកស្រីរូសែហ្វ។
ក៏ប៉ុន្តែ បញ្ហាគឺវាស្មុគស្មាញជាងនេះឆ្ងាយណាស់។ វិបត្តិនយោបាយប្រេស៊ីលនេះ គឺមិនខុសពីរឿងភាគចាក់ផ្សាយតាមទូរទស្សន៍ទេ។ វាគឺជាលទ្ធផល នៃរឿងអាស្រូវពុករលួយ ព្រមទាំងវិបត្តិសេដ្ឋកិច្ច ដែលបានអូសប្រេស៊ីល ឲ្យធ្លាក់ចូលក្នុងវិបត្តិ។ រឿងអាស្រូវពុករលួយ ដ៏ធំ ទាក់ទងនឹងក្រុមហ៊ុនPetrobas មិនមែនជាប់ពាក់ព័ន្ធតែលោកស្រីម្នាក់ឯងទេ។ ផ្ទុយទៅវិញ រឿងដែលគួរឲ្យអស់សំណើចនោះ គឺថា អ្នកដែលចេញមុខចោទលោកស្រីឌីលម៉ា រូសែហ្វ ថាពុករលួយ មុនគេនោះ គឺខ្លួនឯង ក៏ត្រូវតុលាការចោទពីបទពុករលួយដែរ។ ហើយចំណែកសមាជិកព្រឹទ្ធសភាទៀតសោត ជាងពាក់កណ្តាល សុទ្ធតែជាប់សង្ស័យថាពុករលួយ។
ជាងនេះទៅទៀត សាច់រឿងវាមានការសងសិកគ្នាទៅវិញទៅមក។ លោក Eduardo Cunha ប្រធានសភា ដែលបានចាប់ផ្តើមនីតិវិធីទម្លាក់លោកស្រីរូសែហ្វនេះ គឺមានបំណងសងសិកលោកស្រី និងគណបក្សលោកស្រី ដែលមិនបានជួយការពារកុំឲ្យខ្លួន ត្រូវតុលាការចោទប្រកាន់រឿងអំពើពុករលួយ។ ការឃប់ឃិតគ្នា គឺបានបន្តទៅរហូតជាមួយនឹងមន្ត្រីមានអំណាច ដែលជាប់ពាក់ព័ន្ធនឹងក្រុមហ៊ុនធំៗនៅប្រេស៊ីល។ ជាក់ស្តែង លោក Jesse Souza អតីតប្រធានវិទ្យាស្ថានស្រាវជ្រាវសេដ្ឋកិច្ចប្រេស៊ីល បានអះអាងថា ក្នុងនាមលោកជាសេដ្ឋវិទូ លោកយល់ថាការទំលាក់លោកស្រីរូសែហ្វ វាគឺជាចេតនានយោបាយសុទ្ធសាធ ដែលកម្មវត្ថុចំបង គឺដើម្បីបំផ្លាញគណបក្សពលករ សង្គមនិយម របស់លោកស្រីរូសែហ្វ មិនឲ្យដឹកនាំប្រេស៊ីលតទៅទៀត។ ហើយបន្ទាប់មកទៀត លោក Michel Temer និងបក្សពួក នឹងរៀបចំចាត់ចែងគ្នាគេ ដើម្បីងាយស្រួលធ្វើការ យកផលប្រយោជន៍ជាមួយក្រុមហ៊ុនធំៗនៅប្រេស៊ីល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ