ម៉ិចស៊ិក ចោទដោយមិនបញ្ចេញឈ្មោះថា ដូណាល់ ត្រាំ បានបំភ័យអ្នកវិនិយោគទុន
ចុះផ្សាយនៅថ្ងៃ៖
ស្តាប់ - ០៦:១៧
នៅថ្ងៃទី ៧មករានេះ លោករដ្ឋលេខាធិការសេដ្ឋកិច្ច នៃប្រទេសម៉ិចស៊ិច បានថ្លែងនៅក្នុងសេចក្តីជូនដំណឹងមួយ ដោយបានលើកឡើងដោយមិនបញ្ចេញឈ្មោះថា ប្រទេសម៉ិចស៊ិច សូមថ្កោលទោសចំពោះទង្វើដែលដាក់កំហិត និងគំរាមកំហែងទៅលើអ្នកវិនិយោគ ដើម្បីធ្វើឲ្យពួកគេភ័យ លែងហ៊ានមកបោះទុន ក្នុងប្រទេសម៉ិចស៊ិច។ បើទោះបីជាមិនបញ្ចេញឈ្មោះ ក៏គេអាចស្មានដឹងយ៉ាងច្បាស់ថា សម្តីនេះ សំដៅចោទប្រកាន់ទៅលើលោក ដូណាល់ ត្រាំ ប្រធានធិបតីថ្មីអាមេរិក ដែលកន្លងមក តែងតែបំភ័យក្រុមហ៊ុនផលិតរថយន្តជាច្រើននៅម៉ិចស៊ិក ថា លោកនឹងតំឡើងពន្ធឲ្យខ្ពស់ ចំពោះរថយន្តដែលនាំចូលពីម៉ិចស៊ិក ទៅអាមេរិក។
មានភ្លើង ទើបវាមានផ្សែង ។ តាំងពីក្នុងពេលឃោសនាបោះឆ្នោត លោកដូណាល់ ត្រាំ តែងតែនិយាយសម្តីបែបវាយប្រហារ គំរាមកំហែង និងបំភិតបំភ័យគេឯងគ្រប់គ្នា។ ក្នុងនោះក៏មានប្រទេសម៉ិចស៊ិកដែរ។ ក្រៅពីការប្រកាសសន្យា ថានឹងធ្វើរបងថ្ម ខណ្ឌចែកតាមព្រំដែនរវាងអាមេរិក និងម៉ិចស៊ិក លោកដូណាល់ត្រាំ បានសន្យាទៀត ថា លោកនឹងតំឡើងពន្ធនាំចូលឲ្យខ្ពស់ ទៅលើរថយន្ត ដែលផលិតនៅប្រទេសម៉ិចស៊ិក។
លោក ដូណាល់ ត្រាំ បានចោទក្រុមហ៊ុនផលិតរថយន្តអាមេរិក ដូចជាក្រុមហ៊ុន Ford និង General Motors ជាដើម ថាមកពីក្រុមហ៊ុនទាំងនេះ បានរើរោងចក្រទៅផលិតនៅម៉ិចស៊ិក ទើបធ្វើឲ្យប្រជាជនអាមេរិកអត់ការងារធ្វើ។
Ford លប់ចោលគម្រោងសាងសង់រោងចក្រតំឡើងរថយន្តនៅម៉ិចស៊ិក៖
ស្រាប់តែកាលពីថ្ងៃអង្គារសប្តាហ៍នេះ ក្រុមហ៊ុនFord បានប្រកាសថា គេបានសម្រេចចិត្តលប់ចោល គំរោងសាងសង់រោងចក្រតំឡើងរថយន្តមួយកន្លែង នៅក្នុងប្រទេសម៉ិចស៊ិក។ កម្រោងសាងសង់រោងចក្រនេះ មានទឹកប្រាក់ប្រមាណជា ១៦០០លានដុល្លារ។ គឺសេចក្តីប្រកាសលប់គំរោងចោលរបស់ក្រុមហ៊ុនFord នេះហើយ ដែលធ្វើឲ្យម៉ិចស៊ិក ខឹង ហើយបានគិតថា ក្រុមហ៊ុនFord សម្រេចដូចនេះ ក៏ដោយសារតែខ្លាចការគំរាមរបស់លោកដូណាល់ ត្រាំ។
មិនត្រឹមតែប៉ុណ្ណោះ កាលពីថ្ងៃព្រហស្បតិ៍កន្លងទៅនេះ លោកដូណាល់ ត្រាំ ថែមទាំងបានចោទក្រុមហ៊ុនផលិតរថយន្តជប៉ុនធំៗ របស់ជប៉ុន ដែលមានរោងចក្រនៅក្នុងប្រទេសម៉ិចស៊ិកទៀតផង។ លោក ដូណាល់ ត្រាំ បាននិយាយសំដៅទៅក្រុមហ៊ុន Toyota ដោយផ្ទាល់តែម្តង ថារដ្ឋាភិបាលថ្មីរបស់លោក នឹងធ្វើច្បាប់ថ្មី ដើម្បីតំឡើងពន្ធនាំចូលឲ្យខ្ពស់ ចំពោះរថយន្តដែលផលិតនៅម៉ិចស៊ិក។ ក៏ប៉ុន្តែ យ៉ាងណាក៏ដោយ មកទល់ពេលនេះ ក្រុមហ៊ុន Toyota នៅមិនទាន់មានប្រតិកម្មអ្វីទេ។
ក្រុមហ៊ុនផលិតរថយន្តជប៉ុន អាចរងគ្រោះជាងគេ៖
ប្រទេសម៉ិចស៊ិក គឺជាទីតាំងសំខាន់មួយ សម្រាប់ក្រុមហ៊ុនផលិតរថយន្ត ដែលចង់ផលិតក្នុងតំលៃថោក ដើម្បីនាំចូលទៅក្នុងទីផ្សារអាមេរិក។ ការគំរាមតំឡើងពន្ធរបស់លោកដូណាល់ ត្រាំ ពិតជាអាចធ្វើឲ្យវិស័យផលិតរថយន្តនៅ ម៉ិចស៊ិក ជួបបញ្ហា។
តែយ៉ាងណា មកត្រឹមពេលនេះ អ្វីៗវាគ្រាន់តែជាការគំរាម គ្រាន់តែជាការសន្យា។ ហើយក្រុមហ៊ុន រឺក៏អ្នកវិនិយោគនៅម៉ិចស៊ិក ត្រូវថ្លឹងថ្លែង ថាតើវាអាចមានគ្រោះថ្នាក់សម្រាប់គេកម្រិតណា។ យ៉ាងណាក៏ដោយ ការដែលក្រុមហ៊ុន Ford ប្រកាសលប់ចោលគម្រោងសាងសង់រោងចក្រ គឺមានន័យថា ចង់មិនចង់ សម្តីលោកដូណាល់ ត្រាំ ដែលគំរាមកន្លងមក បានធ្វើឲ្យក្រុមហ៊ុនមួយនេះភ័យមែន។
ត្រលប់មកនិយាយពី វិស័យផលិតរថយន្តនៅម៉ិចស៊ិក យើងឃើញថា ប៉ុន្មានឆ្នាំចុងក្រោយនេះ ម៉ិចស៊ិកបានក្លាយជាប្រទេសផលិតរថយន្តធនតូច ធំជាងគេបង្អស់ លំដាប់ទីបួនទូទាំងពិភពលោក។ ក្រៅពីក្រុមហ៊ុនផលិតរថយន្តអាមេរិក នៅមានក្រុមហ៊ុនជប៉ុនធំៗជាច្រើន ដូចជា Toyota Honda និង Nissan ដែលមានរោងចក្រនៅម៉ិចស៊ិក។ បើគិតទៅ ក្នុងរយៈពេល១២ខែចុងក្រោយនេះ ក្រុមហ៊ុនជប៉ុនទាំង៣នេះ ផលិតរថយន្តបានប្រមាណជា១លាន៤សែនគ្រឿង ដែលវាស្មើនឹង៤០% នៃចំនួនផលិតទូទាំងប្រទេសម៉ិចស៊ិក។ រថយន្តដែលផលិតបាន គឺត្រូវនាំចូលទៅអាមេរិក សឹងតែទាំងអស់។
យ៉ាងណាមិញ លោកដូណាល់ ត្រាំ បានគំរាមទៅក្រុមហ៊ុន Toyota តែធាតុពិត បើសិនជាគាត់តំឡើងពន្ធនាំចូលមែន គឺមិនមែន Toyota ដែលភ័យខ្លួនខ្លាំងជាង តែគឺក្រុមហ៊ុន Nissan ឯនោះទេ។ Nissan មានរោងចក្រនៅម៉ិចស៊ិក ៥០ឆ្នាំមកហើយ ហើយបច្ចុប្បន្ននេះ ផលិតរថយន្តមួយឆ្នាំប្រមាណជា ៨សែនគ្រឿង។ រថយន្ត Nissan មាននាំចូលទៅអាមេរិក ច្រើនជាងគេបង្អស់។
ចង់តំឡើងពន្ធនាំចូល អាមេរិក ត្រូវរុះរើកិច្ចព្រមព្រៀងពាណិជ្ជកម្មសេរី ជាមួយម៉ិចស៊ិក៖
តែយើងសួរថា លោកដូណាល់ អាចសុខៗ ស្រាប់តែតំឡើងពន្ធនាំចូល តាមតែចិត្តនឹកឃើញបែបនេះ ដោយងាយរឺយ៉ាងណា? ត្រង់នេះទើបគួរយកមកពិចារណា។ ម៉ិចស៊ិក ជាប្រទេសហត្ថលេខី នៃកិច្ចព្រមព្រៀងដោះដូរពាណិជ្ជកម្មសេរី អាមេរិកខាងជើង ជាមួយសហរដ្ឋអាមេរិក និងកាណាដា។ ក្នុងកិច្ចព្រមព្រៀងនេះ គេមានកំណត់ច្បាស់អំពីការអត់ឱន ក្នុងវិស័យពន្ធដាទៅវិញទៅមក។
លោក ដូណាល់ ត្រាំ គាត់ចង់សើរើ និងចរចាកិច្ចព្រមព្រៀងនេះឡើងវិញ ដើម្បីបានតំឡើងពន្ធនាំចូលឲ្យដល់ ៣៥%។ តើអាចទៅរួចទេ? យ៉ាងណាក៏ដោយ ការចរចាគ្នា មិនមែនធ្វើមួយខែ ពីរខែបានទេ។ ចំណុចនេះហើយ បានជាអ្នកវិនិយោគភាគច្រើន គេនៅមិនទាន់ធ្វើអ្វីទាំងអស់ គឺគេកំពង់រងចាំមើល។ គ្រាន់តែថា ស្ថានការណ៍បែបនេះ គឺវាធ្វើឲ្យសេដ្ឋកិច្ចម៉ិចស៊ិក ជួបការលំបាក ដោយសារតែអ្នកវិនិយោគ មិនប្រាកដប្រជាក្នុងចិត្ត ទៅថ្ងៃខាងមុខ។
ម៉ិចស៊ិកជាប្រទេសសំបូរហិង្សាស្រាប់ វិបត្តិសេដ្ឋកិច្ច អាចក្លាយទៅជាវិបត្តិនយោបាយ៖
ប៉ុន្មានថ្ងៃចុងក្រោយនេះ មានសកម្មភាពហឹង្សា និងបាតុកម្ម កាន់តែកើនឡើងនៅក្នុងប្រទេសម៉ិចស៊ិក បន្ទាប់ពីរដ្ឋាភិបាល បានដំឡើងថ្លៃប្រេងឥន្ធនៈ។ ៣ថ្ងៃកន្លងមកនេះ ហាងទំនិញធំៗប្រមាណជា១០០០កន្លែង បានរងការខូចខាត ដោយសារអំពើហិង្សាកុប្បកម្ម។ ស្ថានភាពទាំងអស់នេះ ពិតជាមិនអំណោយផលទេ សម្រាប់សេដ្ឋកិច្ចម៉ិចស៊ិក។ កាលណាមានហិង្សា ចលាចល គឺវាមិនដែលមានផលល្អទេ។ ដើមឆ្នាំ២០១៧នេះ ម៉ិចស៊ិក កំពុងឆ្លងកាត់ការលំបាកណាស់ ហើយរដ្ឋាភិបាលប្រទេសនេះ ត្រូវប្រឈមមុខដោះស្រាយឲ្យបាន។
យើងឃើញថា បន្ទាប់ពីលោកដូណាល់ ត្រាំ បានជាប់ឆ្នោត និងពាក្យសម្តីគំរាមកំហែង បំភិតបំភ័យជាច្រើនដង ទីផ្សារហិរញ្ញវត្ថុម៉ិចស៊ិកបានខាតបង់។ អត្រាប្តូរប្រាក់ Peso របស់ម៉ិចស៊ិក បានធ្លាក់ចុះដល់ទៅជាង១៦%។ ការប្រមូលពន្ធរដ្ឋ ក៏បានថយចុះខ្លាំងដែរ។ តែយ៉ាងណា ការសម្រេចតំឡើងតម្លៃប្រេងឥន្ធនៈ ដល់ទៅ២០% គឺជារឿងមួយ ដែលអ្នកជំនាញយល់ថា រដ្ឋាភិបាលម៉ិចស៊ិកគិតខុស។ ធ្វើបែបនេះ គឺវាធ្វើឲ្យប្រជាជនកាន់តែមួរម៉ៅ ខឹងនឹងរដ្ឋាភិបាល។
មួយវិញទៀត នៅប្រទេសម៉ិចស៊ិក គឺសំបូរទៅដោយក្រុមមនុស្ស ដែលមាននិន្នាការហិង្សាខ្លាំងណាស់។ ហើយក្រុមសកម្មជនហិង្សាមួយចំនួនធំ គឺត្រូវបានញុះញង់ និងប្រើប្រាស់ ដោយអ្នកនយោបាយឆក់ឱកាស។ ដូច្នេះ បើសិនជាអំពើហិង្សានេះនៅតែបន្ត វានឹងអាចក្លាយទៅជាវិបត្តិនយោបាយផងក៏ថាបាន សម្រាប់ម៉ិចស៊ិក។ បើសិនជាមានវិបត្តិនយោបាយ បូកថែមជាមួយភាពមិនប្រាកដប្រជាដោយសារនយោបាយរបស់លោក ដូណាល់ ត្រាំ ជាមួយម៉ិចស៊ិកទៀតនោះ នោះអ្នកវិនិយោគប្រាកដជានាំគ្នាដើរចេញពី ម៉ិចស៊ិក មិនខានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ