លោកដូណាល់ ត្រាំ កាក់កបនឹងជំនួញ តែជំពាក់បំណុលធនាគារ ជាង៣០០លានដុល្លារ
ការិយាល័យសីលធម៌ក្នុងការដឹកនាំ របស់អាមេរិក ទើបបានចេញរបាយការណ៍មួយ បង្ហាញពីស្ថានភាពប្រាក់ចំណូល និងប្រាក់បំណុលរបស់លោកដូណាល់ ត្រាំ ប្រធានាធិបតីអាមេរិក។ យោងតាមរបាយការណ៍ នេះ លោក ដូណាល់ ត្រាំ កំពុងជាប់ជំពាក់ប្រាក់បំណុលធនាគារ ចំនួនប្រមាណជាង៣០០លានដុល្លារ ខណៈដែលប្រាក់ចំណូលរបស់គាត់ បានកើនឡើងខ្លាំង នៅក្រោយពេលដែលគាត់បានក្លាយជាប្រធានាធិបតី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ការិយាល័យក្រមសីលធម៌ក្នុងការដឹកនាំ របស់សហរដ្ឋអាមេរិក (www.oge.gov) បានចេញរបាយការណ៍កម្រាស់៩៨ទំព័រមួយ ជាសាធារណៈ កាលពីថ្ងៃសុក្រ ទី ១៦ មិថុនា ស្តីអំពីស្ថានភាពទ្រព្យសម្បត្តិ ប្រាក់ចំណូល ក៏ដូចជាបំណុល របស់លោកដូណាល់ ត្រាំ ប្រធានាធិបតីសហរដ្ឋអាមេរិក។ ទោះយ៉ាងណា គេមិនអាចដឹងអំពីប្រាក់ចំណូលលំអិត របស់លោកដូណាល់ ត្រាំទេ ដោយសារតែលោក បានបដិសេធ មិនព្រមប្រកាសផ្សាយជាសាធារណៈ។
យោងតាមរបាយការណ៍នេះ ក្នុងឆ្នាំពន្ធដាកន្លងទៅ ដែលទើបបិទបញ្ចប់ នៅថ្ងៃទី១៥ មេសា ២០១៧ លោកដូណាល់ ត្រាំ បានរកប្រាក់ចំណូលផ្ទាល់ខ្លួន បានប្រមាណជា ៣៧លានដុល្លារ។ ប្រាក់ចំណូលនេះ បានមកមួយភាគធំ ពីក្លឹបឯកជនរបស់លោកឈ្មោះ Mar-a-Lago នៅឆ្នេរសមុទ្រម៉ៃអាមី រដ្ឋហ្ល័ររីដា។ ប្រាក់ចំណូលនេះ បានកើនឡើង៧លានដុល្លារ បើប្រៀបធៀបទៅឆ្នាំកន្លងទៅ។ ក្រៅពីប្រាក់ចំណូលបានមកពីក្លឹបឯកជននេះ លោកត្រាំ ក៏មានប្រាក់ចំណូលកើនឡើង បានមកពីការលក់សៀវភៅរបស់លោក ឈ្មោះថា “ The Art of Deal” ដែលលោកបានបោះពុម្ពនៅឆ្នាំ១៩៨៧។
គួរកត់សម្គាល់ថា ក្លឹប Mar-a-Lago គឺជាកម្មសិទ្ធិរបស់លោក ដូណាល់ ត្រាំ។ ក្លឹបនេះ មានកន្លែងស្នាក់នៅដ៏ប្រណិត និងទីលានវាយហ្គោល។ យោងតាមរបាយការណ៍ តម្លៃស្នាក់នៅ និងតម្លៃចុះឈ្មោះចូលក្នុងក្លឹបនេះ បានកើនឡើងយ៉ាងខ្លាំង នៅក្រោយពេលលោកដូណាល់ ត្រាំ បានក្លាយជាប្រធានាធិបតី។ យ៉ាងណាមិញ លោកដូណាល់ ត្រាំ បានព្យាយាម ធ្វើការផ្សាយពាណិជ្ជកម្ម ឲ្យក្លឹបនេះ តាមរយៈការរៀបចំបដិសណ្ឋារកិច្ច ទទួលភ្ញៀវបរទេសធំៗ នៅទីនោះ ជាញឹកញាប់ បន្ទាប់ពីលោកឡើងកាន់អំណាច។ លោកត្រាំ ថែមទាំងបានហៅក្លឹបដ៏ប្រណិតនេះ ថាជាសេតវិមានសម្រាប់ខែរងារទៀតផង។
អ្នកវិភាគ យល់ថា លោកដូណាល់ ត្រាំ បានព្យាយាម យកក្លឹបឯកជនរបស់គាត់នេះ ធ្វើជាទីនិវេសនដ្ឋានផ្លូវការ ក្នុងមុខតំណែងប្រធានាធិបតីអាមេរិក។ របាយការណ៍ខាងលើ បានធ្វើការលំអិត អំពីការចំណាយហួសហេតុ មិនសមហេតុផល ទៅលើក្រុមការងារ ធានាសន្តិសុខយ៉ាងខ្វាត់ខ្វែង នៅពេលដែលលោកដូណាល់ ត្រាំ ទៅក្លឹបនោះម្តងៗ ខណៈដែលអ្វីៗមានសព្វគ្រប់ នៅឯសេតវិមាន ក្រុងវ៉ាស៊ីនតោន ឯនោះ។
របាយការណ៍របស់ការិយាល័យសីលធម៌ក្នុងការដឹកនាំ ក៏បានសរសេរផងដែរថា លោកដូណាល់ ត្រាំ បានបង្ខំចិត្តលាលែងតំណែងពីក្រុមហ៊ុនប្រមាណជា ៥៦៥ក្រុមហ៊ុន។ តែយ៉ាងណា អាណាចក្រក្រុមហ៊ុន Trump ដ៏ធំ នៅតែមានភាគហ៊ុនលោកជានិច្ច។ ជាអតីតមហាសេដ្ឋីជំនួញ លោកដូណាល់ ត្រាំ បច្ចុប្បន្ន កំពុងជាប់បំណុលផ្ទាល់ខ្លួន ប្រមាណជា ៣១៥,៦ លានដុល្លារ។ ម្ចាស់បំណុលមានជាអាថទិ៍ ធនាគារDeutsch Bank របស់អាល្លឺម៉ង់ និងក្រុមហ៊ុនកម្ចីអចលនទ្រព្យអាមេរិក Ladder Capital៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ