ពិធីតែងតាំងបេក្ខជនប្រធានាធិបតី ដូណាល់ ត្រាំភ៍ ស្ថិតក្នុងការការពារសន្តិសុខខ្ពស់
ចុះផ្សាយនៅថ្ងៃ៖
ស្តាប់ - ០៦:២៣
ចាប់ពីថ្ងៃចន្ទទី១៨ រហូតដល់ថ្ងៃព្រហស្បតិ៍ទី ២១កក្កដានេះ គឺជាពិធីសមាជតែងតាំងបេក្ខជនប្រធានាធិបតីអាមេរិក តំណាងឲ្យគណបក្សសាធារណរដ្ឋ គឺលោក ដូណាល់ ត្រាំភ៍។ ពិធីដែលកំពុងតែប្រព្រឹត្តិធ្វើនៅទីក្រុង Cleveland រដ្ឋOhio ត្រូវស្ថិតក្នុងកិច្ចការពារសន្តិសុខយ៉ាងតឹងរឹងបំផុត ជាពិសេសដោយកាលៈទេសៈនេះ សហរដ្ឋអាមេរិក កំពុងស្ថិតក្នុងភាពតានតឹងផ្នែកសន្តិសុខ ក្រោយហេតុការណ៍បាញ់សម្លាប់ជនជាតិស្បែកខ្មៅ និងការបាញ់សម្លាប់មន្ត្រីនគរបាលអាមេរិក កាលពីពេលថ្មីៗនេះ។ ហេតុការណ៍បាញ់សម្លាប់នគរបាល៣នាក់ផ្សេងទៀត បានកើតឡើងកាលពីថ្ងៃអាទិត្យម្សិលមិញនេះ ដែលជាស្នាដៃរបស់ជនស្បែកខ្មៅជ្រុលនិយមម្នាក់។
លោកដូណាល់ ត្រាំភ៍ នឹងត្រូវសមាជរបស់គណបក្សសាធារណរដ្ឋតែងតាំងជាផ្លូវការ ឲ្យក្លាយជាបេក្ខជនឈរឈ្មោះបោះឆ្នោត ប្រធានាធិបតីសហរដ្ឋអាមេរិក។ លោក ដូណាល់ ត្រាំ មហាសេដ្ឋីសម្តីក្អេងក្អាង ដែលមនុស្សភាគច្រើនស្អប់នោះ នឹងត្រូវប្រកួតប្រជែងជាមួយលោក ស្រី ហ៊ីឡារី គ្លីនតុន មកពីគណបក្សប្រជាធិបតេយ្យ ក្នុងការបោះឆ្នោតប្រធានាធិបតី ដែលនឹងត្រូវធ្វើឡើងនៅខែវិច្ឆិកា ខាងមុខនេះហើយ។
ពិធីសមាជតែងតាំងលោកដូណាល់ ត្រាំភ៍នេះ ត្រូវធ្វើរយៈពេល៤ថ្ងៃ ពីថ្ងៃចន្ទនេះរហូតដល់ថ្ងៃព្រហស្បតិ៍។ កន្លែងដែលគេរៀបចំធ្វើ គឺនៅក្នុងពហុកីឡាដ្ឋានឈ្មោះ Quicken Loans Arena ស្ថិតក្នុងក្រុង Cleveland រដ្ឋOhio។
កម្មវិធីប្រព្រឹត្តិទៅនៃពិធីនេះ ទើបតែត្រូវបានគេប្រកាសឲ្យដឹងជាសាធារណៈ កាលពីថ្ងៃយប់ថ្ងៃអាទិត្យប៉ុណ្ណោះ។ យោងតាមដំណឹងនេះ គឺនៅល្ងាចថ្ងៃចន្ទ លោកស្រីMelania ភរិយាលោកដូណាល់ ត្រាំភ៍នឹងឡើងថ្លែងសន្ទរកថា។ បន្ទាប់មកទៀតនៅល្ងាចថ្ងៃអង្គារ គឺដល់វេនសន្ទរកថារបស់កូនស្រី ឈ្មោះ Tiffany និងកូនប្រុសច្បងឈ្មោះ Donald Jr. ។ បន្ទាប់ទៀត នៅល្ងាចថ្ងៃពុធ គឺ កូនប្រុសទីពីរ ឈ្មោះ Eric នឹងត្រូវធ្វើសន្ទរកថា មុននឹងទុកក្បាលមីក្រូទៅឲ្យកូនស្រីសំណព្វចិត្ត និងជាអ្នកដែលសកម្មជាងគេក្នុងកិច្ចការនយោបាយរបស់លោក ដូណាល់ ត្រាំភ៍ គឺកូនស្រីគាត់ឈ្មោះ Ivanka នៅថ្ងៃព្រហស្បតិ៍។ ហើយនៅថ្ងៃចុងក្រោយនេះដែរ លោកដូណាល់ ត្រាំភ៍ នឹងធ្វើសន្ទរកថា ទទួលយល់ព្រមធ្វើជាបេក្ខជនឈរឈ្មោះបោះឆ្នោតប្រធានាធិបតី ដើម្បីបិទកម្មវិធី។
គេស្អប់ច្រើនពេក ត្រូវយាមកាមសន្តិសុខឲ្យបានខ្លាំង៖
កម្មវិធីតែងតាំងលោកដូណាល់ ត្រាំភ៍នេះ ត្រូវធ្វើឡើងដោយមានការយាមកាមសន្តិសុខយ៉ាងតឹងតែងបំផុត ដែលគេមិនធ្លាប់ឃើញទេ។ វិធានការសន្តិសុខទាំងនេះ ក៏ដោយសារតែសហរដ្ឋអាមេរិក កំពុងស្ថិតក្នុងស្ថានភាពវិកវរជាខ្លាំង ក្រោយហេតុការណ៍បាញ់សម្លាប់គ្នាទៅវិញទៅមក រវាងជនជាតិស្បែកខ្មៅ និងមន្ត្រីនគរបាលស្បែកស។ ដូច្នេះហើយ ទើបគេក្រែងបារម្ភពី អំពើហិង្សាដោយប្រការណាមួយ ដែលអាចនឹងកើតមានឡើងក្នុងកម្មវិធីរយៈពេល៤ថ្ងៃនេះ។
ពហុកីឡាដ្ឋាន ដែលគេរៀបចំពិធីនេះ ត្រូវបិទជាច្រើនថ្ងៃមកហើយ ដើម្បីត្រួតពិនិត្យសម្អាត ហើយមិនឲ្យមាននរណាចូលជិតទេ។ របងដែកកំពស់ជាង២ម៉ែត្រ ត្រូវបានគេដាក់នៅជុំវិញនោះ ហើយតាមច្រកចេញចូលសំខាន់ៗ គេមានដាក់ជាផ្ទាំងថ្មបេតុងធំៗ ហើយគេមានទាំងដាក់ត្រៀមរថយន្តឈូសទឹកកក ដើម្បីការពារក្នុងករណីមានការរុលសម្រុកចូល របស់ក្រុមបាតុករ។ រថយន្តនគរបាល ជាច្រើនគ្រឿងកំពុងបើកចុះបើកឡើងយ៉ាងមមាញឹក ហើយពីលើមេឃ គេសង្កេតឃើញមានឧត្ថម្ភាគចក្រ ជាច្រើនគ្រឿង ដែលចាំឃ្លាំមើលសន្តិសុខផងដែរ។
សម្រាប់អ្នកដែលចូលរួមនៅក្នុងកម្មវិធីនេះ ត្រូវបានគេត្រួតពិនិត្យយ៉ាងល្អិតល្អន់។ ក្នុងចំណោមនោះមាន អ្នកបោះឆ្នោតតំណាងទាំង៥០០០នាក់ ភ្ញៀវពិសេសរបស់គណបក្សសាធារណរដ្ឋ និងអ្នកសារព័ត៌មានប្រមាណជា១៥០០០នាក់ មកពីជុំវិញពិភពលោក។ មនុស្សទាំងអស់នេះ ថ្វីបើមានសិទ្ធិចូល តែមិនអាចយកអ្វីផ្តេសផ្តាស ចូលទៅបានទេ។ គេបានដាក់ប្រកាសហាមឃាត់ មិនឲ្យយកចូលនូវសម្ភារៈជាច្រើន ដូចជា អាវុធជាតិផ្ទុះ កាំបិត ចំណីអាហារគ្រប់មុខ ឆ័ត្រ គ្រាប់បាល់តេនីស និងកាបូបធំៗជាដើម។
វិធានការសន្តិសុខទាំងអស់នេះ គឺដោយសារតែលោកដូណាល់ ត្រាំភ៍ មានគេស្អប់ច្រើនពេក ម្លោះហើយគេត្រូវបង្ការវាទុកជាមុន។ ជាក់ស្តែងកាលពីចុងខែមិថុនា មានបុរសជនជាតិអង់គ្លេសម្នាក់ បានប៉ុនប៉ងសម្លាប់ លោកដូណាល់ ត្រាំភ៍ នៅកណ្តាលពិធីធ្វើសន្ទរកថានយោបាយតែម្តង។
ជម្លោះរវាងជនជាតិស្បែកស និងស្បែកខ្មៅ បូកបន្ថែមនឹងការកាន់អាវុធដោយសេរី៖
ក្រុមសកម្មជនដែលប្រឆាំងនិងគោលនយោបាយរបស់លោក ដូណាល់ ត្រាំភ៍ មានគម្រោងធ្វើបាតុកម្មនៅខាងមុខច្រកចូលពិធីនេះ។ បាតុកម្មមួយចំនួន បានចាប់ផ្តើមធ្វើរួចទៅហើយ កាលពីថ្ងៃអាទិត្យ ទី១៧ កក្កដា នៅក្រុង Cleveland នេះ ដូចជាបាតុកម្មប្រឆាំងនឹងនយោបាយប្រកាន់ពូជសាសន៍ បាតុកម្មប្រឆាំងនឹងអំពើភេរវកម្មដោយយកសាសនាមកជាត្រីមុខ ជាដើម។
អាជ្ញាធរបានចរចាជាមួយក្រុមបាតុករ ជាច្រើនសប្តាហ៍មកហើយ ដើម្បីកំណត់ពីទីតាំង នៃការដង្ហែរក្បួន ធ្វើយ៉ាងណាចៀសវៀងកុំឲ្យមានការបែងចែកកន្លែងច្រើនពេក ដែលអាចបង្ករឲ្យមានការលំបាក ក្នុងការការពារសន្តិសុខ។
បញ្ហាបារម្ភធំមួយទៀតនោះ គឺថានៅរដ្ឋOhio គឺនរណាក៏អាចកាន់អាវុធបានដែរ ឲ្យតែមានលិខិតអនុញ្ញាតត្រឹមត្រូវ។ លោក ប្រធានសហជីពនគរបាលនៅទីក្រុងនោះ បានព្យាយាមស្នើរសុំថាត្រូវហាមឃាត់កុំឲ្យ មនុស្សដែលមកធ្វើបាតុកម្ម កាន់អាវុធមកជាប់ខ្លួនឲ្យសោះ។ តែសម្នើរនេះ មិនត្រូវបានគេយល់ព្រមទេ។
ដូចយើងដឹងហើយ ថាលោកដូណាល់ ត្រាំភ៍ បានធ្វើការឃោសនាខ្លាំងៗដែលមានលក្ខណៈរើសអើង ស្អប់ខ្ពើមជនជាតិស្បែកខ្មៅ និងជនអន្តោប្រវេសន៍ទូទៅ។ ស្ថិតក្នុងកាលៈទេសៈ ដែលសហរដ្ឋអាមេរិកកំពុងតែហែកហួរដោយការស្អប់គ្នា រវាងក្រុមស្បែកខ្មៅ និងស្បែកស បូកផ្សំជាមួយចរាចរណ៍ ប្រើប្រាស់អាវុធដោយសារីទៀតនោះ គឺថាធ្វើឲ្យគេបារម្ភខ្លាំងណាស់ គឺបារម្ភក្រែងមានហេតុការណ៍បាញ់សម្លាប់គ្នា នៅក្នុងពិធីនេះ។
យ៉ាងណាមិញ ករណីបាញ់សម្លាប់មន្ត្រីនរគបាលស្បែកស ៣នាក់កាលពីថ្ងៃអាទិត្យ ១៧ កក្កដា គឺធ្វើឡើងដោយជនដៃដល់ជាជនជាតិស្បែកខ្មៅ ដែលជននេះ ជាសមាជិករបស់ចលនាជ្រុលនិយមមួយឈ្មោះថា Nation Washitaw។ ចលនានេះ ត្រូវគេស្គាល់ជាចលនាបែបហិង្សា របស់ក្រុមជនជាតិស្បែកខ្មៅជ្រុលនិយម ដែលមិនញញើតនឹងប្រើអំពើហិង្សា ដើម្បីសងសឹកទៅលើជនជាតិស្បែកស។
វិបត្តិដ៏ធំរបស់សហរដ្ឋអាមេរិក នាពេលនេះ គឺជម្លោះរវាងជនជាតិស្បែកខ្មៅ និងជនជាតិស្បែកសនេះឯង។ យោងតាមការស្ទាបស្ទង់មតិ ប្រជាជនអាមេរិកជាង៨០% ចង់ឲ្យរដ្ឋាភិបាលថ្មី ដោះស្រាយបញ្ហានេះជាអាទិភាព។ ក៏ប៉ុន្តែបើយើងក្រលេកមកមើលគោលនយោបាយរបស់លោក ដូណាល់ ត្រាំភ៍ គឺថាគ្មាននរណាមានសង្ឃឹមថា បញ្ហាជម្លោះប្រកាន់ពូជសាសន៍នេះ នឹងអាចដោះស្រាយបានទេ ព្រោះលោក ដូណាល់ ត្រាំភ៍ ខ្លួនឯង ជាមនុស្សប្រកាន់ពូជសាសន៍ដ៏ងប់ងុលបំផុតតែម្តង។ ដូច្នេះបើដូណាល់ ត្រាំភ៍ ជាប់ជាប្រធានាធិបតី គឺសហរដ្ឋអាមេរិក ប្រាកដជាធ្លាក់ក្នុងអំពើហិង្សាកាន់តែខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ