លោកដូណាល់ ត្រាំ ចុះហត្ថលេខាលើក្រិត្យច្បាប់ថ្មី ហាមឃាត់ប្រជាជនប្រទេសអ៊ីស្លាម ចូលសហរដ្ឋអាមេរិក
បន្ទាប់ពីត្រូវបានតុលាការអាមេរិក សម្រេចព្យួរមិនឲ្យអនុវត្តិក្រិត្យច្បាប់ដែលហាមឃាត់ប្រជាជនប្រទេសអ៊ីស្លាម៧ប្រទេស មិនឲ្យចូលសហរដ្ឋអាមេរិក នៅថ្ងៃចន្ទទី៦មីនា ម្សិលមិញ លោកដូណាល់ ត្រាំប្រធានាធិបតីអាមេរិក បានចុះហត្ថលេខាលើក្រិត្យច្បាប់ថ្មីមួយទៀត ដោយបានកែរសម្រួលខ្លឹមសារខ្លះ ដើម្បីគេចចេញពីការចោទប្រកាន់របស់តុលាការ។ តែយ៉ាងណា សម្រាប់សកម្មជនការពារសិទ្ធិមនុស្ស ក្រិត្យច្បាប់ថ្មីរបស់លោកដូណាល់ ត្រាំ នៅតែមានខ្លឹមសាររើសអើង ទៅលើប្រជាជនកាន់សាសនាអ៊ីស្លាម ដដែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ខុសពីលើកមុនៗ លោកដូណាល់ ត្រាំ បានចុះហត្ថលេខាលើក្រិត្យច្បាប់អន្តោប្រវេសន៍ថ្មី នៅថ្ងៃចន្ទទី៦មីនា ដោយស្ងាត់ៗ ដោយពុំបានប្រកូកប្រកាសហៅអ្នកកាសែត ឲ្យទៅផ្អើលឈូរឆទេ។ ក្រិត្យច្បាប់ រុះរើសាជាថ្មីនេះ មានប្រវែងវែងជាងក្រិត្យច្បាប់ចាស់ ដល់ទៅពីរដង ដែលមន្ត្រីសេតវិមានបានអះអាងថា ព្រោះគេបានសរសេរលំអិតវា ដើម្បីសង្កត់ខ្លឹមសារអត្ថន័យឲ្យបានច្បាស់។
លោក Sean Spicer អ្នកនាំពាក្យសេតវិមាន បានបញ្ជាក់ថា គោលការគ្រិះនៃក្រិត្យអន្តោប្រវេសន៍ថ្មីនេះ មិនខុសពីក្រិត្យចាស់ ដែលបានចុះហត្ថលេខាកាលពីថ្ងៃទី ២៧មករាទេ។ អ្វីដែលដែលគេបានកែសម្រួល នៅក្នុងក្រិត្យថ្មីនេះ គឺគេបានដកប្រទេសអ៊ីរ៉ាក់ ចេញពីចំណោមប្រទេសដែលត្រូវហាមឃាត់ ហើយចំពោះអ្នកដែលមានបណ្ណស្នាក់នៅអចិន្ត្រៃយ៍ ឬក៏អ្នកដែលបានទទួលទិដ្ឋាការចូលដីអាមេរិករួចរាល់ហើយ គឺអាចចូលមកសហរដ្ឋអាមេរិក បានជាធម្មតា។
ទាក់ទិននឹងជនភៀសខ្លួន គឺក្រិត្យច្បាប់ថ្មីនេះ បានកំណត់ផ្អាក ឈប់ទទួលជនភៀសខ្លួនទាំងអស់មកពីគ្រប់ប្រទេស រយៈពេល១២០ថ្ងៃ ដដែល ចាប់តាំងពីថ្ងៃចូលជាធរមានទៅ គឺថ្ងៃទី ១៦ មីនា ដោយរាប់បញ្ចូលទាំងជនភៀសខ្លួនមកពីប្រទេសស៊ីរីដែរ។ ចំណែកជនភៀសខ្លួន ដែលបានទទួលក្រដាសស្នាមត្រឹមត្រូវ ហើយការធ្វើដំណើរត្រូវបានរៀបចំរួចរាល់ហើយនោះ នឹងអាចចូលមកអាមេរិកបាន។ រីឯមាត្រាដែលមានខ្លឹមសារលំអៀង ទៅលើជនអន្តោប្រវេសន៍កាន់សាសនាគ្រិស្តិ ក៏ត្រូវបានលប់ចោលដែរ។
យ៉ាងណាមិញ លោកប្រធានការិយាល័យសន្តិសុខផ្ទៃក្នុងអាមេរិក បាននិយាយថា ជាមួយនឹងក្រិត្យច្បាប់ថ្មី នេះ គឺរដ្ឋាភិបាល មានបំណងបញ្ចៀសបញ្ហារញ៉េរញ៉ៃ នៅតាមប្រលានយន្តហោះ និងច្រកចូលអន្តោប្រវេសន៍នានា មិនឲ្យកើតឡើង ដូចកាលពីលើកមុន។
លោកដូណាល់ ត្រាំ បានអះអាងជាថ្មីថា ក្រិត្យនេះ មានសារៈសំខាន់ណាស់ ក្នុងការទប់ស្កាត់ កុំឲ្យពួកភេរវកម្មចូលមកអាមេរិក។ រដ្ឋាភិបាលលោកត្រាំ បញ្ជាក់ថាក្រឹត្យនេះ គឺជាការចាប់ផ្តើម អនុវត្តគោលនយោបាយរួម ទៅថ្ងៃមុខរបស់រដ្ឋាភិបាលលោកត្រាំ ដែលសំដៅដាក់វិធានការឲ្យតឹងតែង ដើម្បីត្រួតពិនិត្យការធ្វើដំណើរចេញចូល មកក្នុងទឹកដីអាមេរិក។
តែយ៉ាងណាក៏ដោយ អង្គការការពារសិទ្ធិមនុស្សដ៏ធំ ព្រមទាំងសមាគម៍នានា នៅអាមេរិក បានបន្តរិះគន់ថា ក្រិត្យច្បាប់ថ្មីនេះ នៅតែមានខ្លឹមសាររើសអើង ទៅលើអ្នកកាន់សាសនាអ៊ីស្លាមដដែល។ ជាងនេះទៅទៀត វិធានការទប់ស្កាត់អំពើភេរវកម្មបែបនេះ គឺវាគ្មានប្រសិទ្ធិភាពទេ ផ្ទុយទៅវិញអាមេរិក ដែលលោកដូណាល់ ត្រាំ ចង់ធ្វើឲ្យខ្លាំងឡើងវិញនោះ គឺវាបានក្លាយជាអាមេរិកអន់ និងកំសាកជាទីបំផុត។ អង្គការ សមាគមនានា បានសន្យា ណាត់ជួបរដ្ឋាភិបាលលោកដូណាល់ ត្រាំ នៅចំពោះមុខតុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ