លោកដូណាល់ ត្រាំ ហាមមិនឲ្យលក់ក្រុមហ៊ុន Lattice Semiconductor ទៅឲ្យចិន
ក្រុមហ៊ុនរដ្ឋចិនមួយ កំពុងតែចរចា ចង់ទិញយកភាគហ៊ុន របស់ក្រុមហ៊ុនផលិតធាតុផ្សំអេឡិចត្រូនិក ដ៏ធំមួយ របស់អាមេរិក ឈ្មោះ Lattice Semicondutor Corporation។ ក៏ប៉ុន្តែស្រាប់តែនៅថ្ងៃពុធ ទី១៣កញ្ញានេះ លោកដូណាល់ ត្រាំ បានបញ្ជារឲ្យក្រសួងហិរញ្ញវត្ថុអាមេរិក បិទបញ្ចប់ការចរចានោះ ដោយបានលើកឡើងថា ការលក់ក្រុមហ៊ុនដ៏ធំនេះទៅឲ្យក្រុមហ៊ុនចិនកាន់កាប់ គឺវាអាចប៉ះពាល់ ទៅដល់សន្តិសុខជាតិអាមេរិក។ រដ្ឋាភិបាលចិន បានបរិហារថារដ្ឋាភិបាលសហរដ្ឋអាមេរិក កំពុងធ្វើទង្វើអយុត្តិធម៌ និងរើសអើងមកលើក្រុមហ៊ុនចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
តាមរយៈក្រុមហ៊ុនវិនិយោគ Canyon Bridge ក្រុមហ៊ុនរដ្ឋចិនមួយឈ្មោះថា China Venture Capital Fund Corp មានគំរោងទិញយកក្រុមហ៊ុនអាមេរិក Lattice Semiconductor Corporation ក្នុងតម្លៃ ១៣០០លានដុល្លារ។ ក៏ប៉ុន្តែការចរចាទិញយកនេះ ត្រូវបានបញ្ឈប់ទៅវិញ បន្ទាប់ពីលោកដូណាល់ ត្រាំ បានបញ្ជារទៅក្រសួងសេដ្ឋកិច្ច និងហិរញ្ញវត្ថុអាមេរិក។ ការសម្រេចរបស់លោកដូណាល់ ត្រាំនេះ គឺដោយយោងទៅលើការផ្តល់យោបល់ របស់គណកម្មាធិការ ត្រួតពិនិត្យការវិនិយោគបរទេសមកក្នុងសេដ្ឋកិច្ចអាមេរិក។ យោងតាមគណកម្មការនេះ ការលក់ក្រុមហ៊ុន Lattice Semiconductor Corporation ទៅឲ្យចិន អាចនឹងបង្កគ្រោះថ្នាក់ទៅដល់កិច្ចការសន្តិសុខជាតិ ទៅថ្ងៃខាងមុខ។
សូមបញ្ជាក់ថា Lattice Semiconductor Corporation គឺជាក្រុមហ៊ុនផលិត Semi-conducteur ដែលជាធាតុផ្សំអេឡិចត្រូនិកយ៉ាងសំខាន់ ប្រើប្រាស់ក្នុងឧបករណ៍ទូរគមនាគមន៍ និងបច្ចេកវិទ្យាព័ត៌មានវិទ្យា។ យោងតាមការអះអាងរបស់សេតវិមាន ក្រុមហ៊ុននេះ មិនមែនផលិត Semi-conducteur ប្រើតែក្នុងវិស័យទូរគមនាគមន៍ឯកជននោះទេ តែក៏ផលិតសម្រាប់បច្ចេកវិទ្យារបស់កងទ័ពផងដែរ។ ដោយហេតុនេះហើយ ទើបក្រុមហ៊ុននេះ ត្រូវចាត់ទុកជាក្រុមហ៊ុនយុទ្ធសាស្ត្រ មិនអាចឲ្យប្រទេសណាផ្សេង មកកាន់កាប់ ទាំងស្រុងបានទេ។
លោក កៅ ហ្វេង អ្នកនាំពាក្យក្រសួងពាណិជ្ជកម្មចិន បានបរិហារថា ការលូកដៃមកហាមឃាត់ការផ្ទេរភាគហ៊ុន ពីសំណាក់រដ្ឋាភិបាលអាមេរិកនេះ គឺជាសកម្មភាពរើសអើងមកលើក្រុមហ៊ុនចិន។ មន្ត្រីចិនរូបនេះ អំពាវនាវថា សុំកុំឲ្យយកហេតុផលសន្តិសុខជាតិ មកធ្វើជាលេស ដើម្បីការពារតែផលប្រយោជន៍សេដ្ឋកិច្ចរបស់ផងខ្លួន ឲ្យសោះ។
គួរបញ្ជាក់ថា នេះមិនមែនជាលើកទីមួយទេ ដែលរដ្ឋាភិបាលអាមេរិក បានរារាំង មិនឲ្យចិន ទិញយកភាគហ៊ុនរបស់ក្រុមហ៊ុនខ្លួន។ ចុងឆ្នាំ២០១៦ លោកបារ៉ាក់ អូបាម៉ា បានបិទបញ្ឈប់ មិនឲ្យលក់សាខាអាមេរិក របស់ក្រុមហ៊ុន Aixtron អាល្លឺម៉ង់ ទៅឲ្យចិន។ ការនេះ បានធ្វើឲ្យអាក់ខាន ដល់កិច្ចសន្យាទិញលក់ទាំងស្រុងរវាងក្រុមហ៊ុនអាល្លឺម៉ង់នេះ ជាមួយក្រុមហ៊ុនចិន។ កាលពីឆ្នាំ២០១៥ ក្រុមហ៊ុនចិន ក៏បានបរាជ័យក្នុងការច្បាមយកមកកាន់កាប់ នូវក្រុមហ៊ុន Micron Technology ដែរ។
ដោយឡែក នៅសហភាពអឺរ៉ុប លោកប្រធានគណកម្មការអឺរ៉ុប ក៏ទើបតែបានប្រកាស កាលពីថ្ងៃពុធទី ១៣ កញ្ញា ពីការដាក់វិធានការថ្មីបន្ថែម ដើម្បីត្រួតពិនិត្យឲ្យបានស៊ីជំរៅ មុននឹងសម្រេចលក់ភាគហ៊ុនរបស់ក្រុមហ៊ុនអឺរ៉ុបសំខាន់ៗ ទៅឲ្យក្រុមហ៊ុនបរទេស តួយ៉ាង ដូចជាក្រុមហ៊ុនរដ្ឋចិន ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ