សហរដ្ឋអាមេរិក៖ ចលាចលហិង្សារវាងសហគមស្បែកខ្មៅ និងនគរបាលក្រុងCharlotte
ចុះផ្សាយនៅថ្ងៃ៖
ស្តាប់ - ០៧:២២
អស់រយៈពេលពីរថ្ងៃមកហើយ ដែលអំពើហិង្សា និងការប្រឈមមុខដាក់គ្នា បានកើតឡើងរវាងសហគមជនជាតិស្បែកខ្មៅ និងកម្លាំងនគរបាលក្រុងCharlotte ក្នុងរដ្ឋការ៉ូលីនខាងជើង។ ទីក្រុងទាំងមូលត្រូវបានប្រកាសឲ្យស្ថិតក្នុងភាពអាសន្ន។ អំពើហិង្សាដ៏ធ្ងន់ធ្ងរទប់លែងបាននេះ បានកើតឡើងក្រោយពេលដែលបុរសស្បែកខ្មៅម្នាក់ ត្រូវបាននគរបាលបាញ់សម្លាប់។ អំពើហិង្សាថ្មីនេះ បានស្តែងចេញនូវបរិយាកាសអួរអាប់ ក្នុងសង្គមអាមេរិក ដែលពោរពេញទៅដោយការស្អប់ខ្ពើម ប្រកាន់ពូជសាសន៍ស្បែកសស្បែកខ្មៅ និងជាពិសេសគឺភាពតានតឹងរវាងកម្លាំងសមត្ថកិច្ច និងសហគមជនជាតិស្បែកខ្មៅតែម្តង។ បញ្ហានេះ ក៏កំពុងតែក្លាយជាកម្មវត្ថុ នៃការឃោសនាបោះឆ្នោតប្រធានាធិបតីអាមេរិកផងដែរ។
ស្ថានភាពនៅមិនទាន់វិលទៅរកភាពប្រក្រតីវិញទេ ផ្ទុយទៅវិញ វានឹងអាចកាន់តែជ្រួលច្របល់ជាងនេះទៅទៀត ដោយសារលោកអភិបាលរដ្ឋ ការ៉ូលីនខាងជើង បានប្រកាសភាពអាសន្ននៅថ្ងៃព្រហស្បតិ៍នេះ។ តាមន័យនេះ គឺអភិបាលរដ្ឋ បានសម្រេចបញ្ជូនកម្លាំងអាវុធហត្ថពិសេស និងនគរបាលចរាចរណ៍ ដើម្បីទៅជួយធ្វើអន្តរាគមន៍ជាមួយនិងនគរបាលក្រុងCharlotte។ មានន័យថា ការប្រឈមមុខដាក់គ្នា រវាងក្រុមបាតុករ និងសមត្ថកិច្ច គឺអាចមានកាន់តែធំ ហើយអាចកាន់តែហិង្សា។ យ៉ាងណាមិញ នៅថ្ងៃព្រហស្បត្តិ៍នេះដែរ អាជ្ញាធរបានបញ្ជារឲ្យបិទ ការធ្វើជំនួញ ភោជនីយដ្ឋាន ហាងទំនិញនានា នៅតាមផ្លូវដែលកើតមានបាតុកម្ម ដើម្បីចៀសវាងការចូលទៅវាយបំផ្លាញ ដោយប្រការណាមួយ។
អាជ្ញាធរប្រកាសភាពអាសន្ន ឯបាតុករម្នាក់ត្រូវគ្រាប់កាំភ្លើងស្ទើររស់ស្ទើរស្លាប់៖
ពីរយប់មកហើយ ដែលបាតុករភាគច្រើនជាជនជាតិស្បែកខ្មៅ និងជាយុវជនក្មេងៗ បានប្រឈមមុខដាក់គ្នាជាមួយនឹងនគរបាល។ ពីដំបូង វាជាក្បួនបាតុកម្មអហិង្សាទេ កាលពីយប់ថ្ងៃអង្គារ តែពេលដែលក្បួននេះ បានដើរទៅដល់ខាងមុខស្នងការនគរបាលក្រុង ស្រាប់តែមានយុវជនខ្លះ បានសមុ្រកទៅបំផ្លាញ រថយន្តនគរបាល ហើយវាយបំផ្លាញអាគារការិយាល័យនគរបាលទៀត។ ស្ថានការណ៍ ក៏បានប្រែប្រួល ក្លាយជាចលាចល និងអំពើហិង្សាតែម្តង។ តាមការឲ្យដឹងពីអាជ្ញាធរ កម្លាំងនគរបាលចំនួន៦នាក់ បានរងរបួសដោយអំពើហិង្សារបស់បាតុករ។ បាតុករជាយុវជនក្មេងៗ ពោរពេញដោយកំហឹង បានយកដុំថ្ម គប់ទៅលើនគរបាល ព្រមទាំងបានវាយបំផ្លាញទ្រព្យសម្បត្តិសាធារណៈ និងឯកជននៅតាមផ្លូវ។ សមត្ថកិច្ចបានវាយតបវិញ ដោយគ្រាប់បែកផ្សែង និងហ្គាសបង្ហូរទឹកភ្នែក។
កាលពីរសៀលថ្ងៃពុធ ក្រុមនិស្សិតជាច្រើនរយនាក់ បាននាំគ្នាដេកលើទ្រូងផ្លូវ ជាសញ្ញានៃការតវ៉ា ដោយសន្តិវិធី ទៅនឹងអំពើហិង្សាដែលនគរបាលស្បែកស តែងតែធ្វើទៅលើប្រជាជនស្បែកខ្មៅ ដោយអយុត្តិធម៌។ ក៏ប៉ុន្តែពេលយប់ អំពើហិង្សាបានផ្ទុះឡើងសាជាថ្មី។ យោងតាមអ្នករាយការណ៍ព័ត៌មានបារាំង ដែលនៅកន្លែងកើតហេតុផ្ទាល់ នគរបាលបានបាញ់ជាច្រើនគ្រាប់។ នៅយប់ថ្ងៃពុធ បាតុករម្នាក់ បានត្រូវគ្រាប់កាំភ្លើង ដួលនឹងដី ដែលតាមការឲ្យដឹងស្ថានភាពរបួស កំពុងស្ថិតក្នុងការព្រួយបារម្ភជាទីបំផុត។ ដូច្នេះ បើសិនជាបាតុកររងបួសម្នាក់នេះស្លាប់ ម្នាក់ទៀតនោះ គឺមានន័យថាក្រុមបាតុករនឹងកាន់តែក្រេវក្រោធ ហើយអំពើហិង្សាពិតជាកើតឡើង កាន់តែធំជាក់ជាមិនខានទេ។
យោងតាមនគរបាល ជនដៃដល់ មានកាន់កាំភ្លើងនៅនឹងដៃ៖
ដើមហេតុនៃអំពើហិង្សានៅក្រុងCharlotte នេះ គឺបន្ទាប់ពីនគរបាលបានបាញ់សម្លាប់បុរសម្នាក់ឈ្មោះ Keith Lamont Scott អាយុ៤៣ឆ្នាំ ជាជនជាតិអាមេរិកស្បែកខ្មៅ កាលពីល្ងាចថ្ងៃអង្គារ ទី២០ កញ្ញា។ ការពិតជាក់ស្តែង នៃហេតុការណ៍បាញ់សម្លាប់នេះ គឺនៅមិនទាន់ដឹងច្បាស់ទេ ដោយសារតែខាងនគរបាល ថាផ្សេង ឯប្រជាជននិងសាក្សី ថាផ្សឹង។
បើតាមការតំណាងនគរបាលក្រុងបានបញ្ជាក់ថា ដើមឡើយ សមត្ថកិច្ចបានចុះទៅតាមចាប់ជនសង្ស័យម្នាក់ផ្សេងទៀតទេ នៅកន្លែងកើតហេតុ ហើយក៏បានប្រទះនឹងជនរងគ្រោះឈ្មោះ Keith Lamont Scott នេះ ដោយជននេះកំពុងតែអង្គុយនៅក្នុងរថយន្ត ហើយមានកាំភ្លើងកាន់នឹងដៃទៀតផង។ ដោយមានការសង្ស័យ នគរបាលបានចូលទៅជិត ហើយបញ្ជារឲ្យជននេះ ដាក់អាវុធចុះ រួចចេញមកខាងក្រៅ។ បន្ទាប់ពីបានប្រកែកគ្នាចុះឡើង ហើយដោយជននេះ មិនព្រមទំលាក់កាំភ្លើង ទើបនគរបាល បានបាញ់ទៅលើជននេះ បណ្តាលឲ្យស្លាប់។ ផ្អែកតាមការអះអាងរបស់សមត្ថកិច្ចដដែល នគរបាលដែលបានបាញ់នោះ គឺជាជនជាតិស្បែកខ្មៅទៀតផង គឺឈ្មោះ Brentley Vinson ដែលបច្ចុប្បន្ននេះ ត្រូវបានគេបញ្ឈរជើងជាបណ្តោះអាសន្នសិន រងចាំការស៊ើបអង្កេតរកខុសត្រូវ។
សាក្សីថា ជនរងគ្រោះកាន់សៀវភៅនៅនឹងដៃ ហើយនគរបាលដែលបាញ់គឺស្បែកស៖
ដោយឡែក យោងតាមសាក្សី នៅកន្លែងកើតហេតុ ក៏ដូចជាក្រុមគ្រួសារជនរងគ្រោះ បានអះអាងផ្សេងពីនគរបាល។ សាក្សីម្នាក់ ជាស្ត្រីដែលមានផ្ទះនៅខាងមុខកន្លែងកើតហេតុ ហើយដែលស្គាល់បុរសរងគ្រោះយ៉ាងច្បាស់នោះ បានបញ្ជាក់ថា បុរសរងគ្រោះតែងតែមកអង្គុយនៅចំណតរថយន្តក្រុងខាងមុខផ្ទះគាត់រាល់ល្ងាច ដើម្បីរងចាំកូនដែលជិះរថយន្តក្រុងត្រលប់មកពីសាលារៀនវិញ។ សាក្សីបន្តថា ការដែលនគរបាលថាជនរងគ្រោះមានកាំភ្លើងនៅនឹងដៃ គឺជារឿងប្រឌិតទាំងស្រុង។ ក្នុងពេលកើតហេតុ ជនរងគ្រោះកាន់សៀវភៅនៅនឹងដៃ មិនបានកាន់កាំភ្លើងទេ។
ជាងនេះទៅទៀត មានសាក្សីផ្សេងទៀតបានអះអាងថា នាយនគរបាល ដែលបានបាញ់ទៅលើជនរងគ្រោះនោះ មិនមែនជាមនុស្សស្បែកខ្មៅទេ តែជាជនជាតិស្បែកស។ តាមយោបល់ពួកគេ ខាងសមត្ថកិច្ចបានប្រឌិតទាំងស្រុង ថានគរបាលដែលបាញ់ជាមនុស្សស្បែកខ្មៅ ដើម្បីផ្លាស់ប្តូរស្ថានភាព ក្នុងន័យថា មិនមែនប៉ូលីសស្បែកស ទៅបាញ់ជនរងគ្រោះជាស្បែកខ្មៅទេ។
យ៉ាងណាក៏ដោយ ក្រុមគ្រួសារជនរងគ្រោះ ក៏ដូចជាក្រុមបាតុករ បានទាមទារឲ្យនគរបាលធ្វើការផ្សព្វផ្សាយជាសាធារណៈ នូវរូបភាពវីដេអូ ថតដោយកាមេរ៉ាសុវត្ថិភាព និងវីដេអូ ថតដោយម៉ាស៊ីនថតរបស់នគរបាលផ្ទាល់ ដែលមានភ្ជាប់នៅនឹងរថយន្តរបស់នគរបាល ក្នុងពេលចុះធ្វើអន្តរាគមន៍។ ក៏ប៉ុន្តែ ខាងសមត្ថកិច្ច នៅមិនទាន់ប្រកាសយល់ព្រមផ្សាយរូបភាពទាំងនេះទេ។ ដូច្នេះ ការពិតយ៉ាងណា យើងនៅមិនទាន់ដឹងទេ ដោយម្ខាងៗ ព្យាយាមការពារដំណើរហេតុការណ៍ តែរៀងៗខ្លួន។
នៅOklahoma បុរសស្បែកខ្មៅម្នាក់ទៀត ត្រូវនគរបាលបាញ់សម្លាប់ ទាំងជននោះបានលើកដៃឡើងទៅលើ៖
គួរបញ្ជាក់ផងដែរថា មានករណីបាញ់សម្លាប់ជនស្បែកខ្មៅមួយទៀត កាលពីដើមសប្តាហ៍នេះដែរ នៅរដ្ឋOklahoma។ ជនរងគ្រោះ ឈ្មោះ Terence Crutcher បានស្លាប់ ដោយនគរបាលស្រីស្បែកសម្នាក់ បានបាញ់សម្លាប់។ ក្នុងរូបភាពវីដេអូដែលថតដោយកាម៉េរ៉ា របស់នគរបាល គេឃើញយ៉ាងច្បាស់ថា ជនរងគ្រោះស្បែកខ្មៅ បានលើកដៃឡើងទៅលើ ក្នុងពេលដែលនគរបាលបានភ្ជង់កាំភ្លើងនៅចំពីមុខ ។ នគរបាលម្នាក់ដែលនៅខាងលើឧត្ថម្ភាគចក្រ បានហៅជននេះថាមេអន្ធពាល។ ហើយនៅពេលជននេះបានរេដៃទៅក្បែររថយន្តខ្លួនបន្តិច នគរបាលក៏បានបាញ់ទៅលើតែម្តង ដោយក្រែងថាជននេះបំរុងយកកាំភ្លើង។ ករណីនេះ សមត្ថកិច្ចកំពុងធ្វើការស៊ើបអង្កេត ដើម្បីរកខុសត្រូវដែរ។
អំពើហិង្សាប្រកាន់ពូជសាសន៍ ជាជំងឺមហារីករបស់សហរដ្ឋអាមេរិក៖
ការឃោសនាបោះឆ្នោតកំពុងតែប្រព្រឹត្តិទៅយ៉ាងក្តៅគគុក។ ដូច្នេះ ព្រឹត្តិការណ៍ហិង្សានេះ បានក្លាយជាកម្មវត្ថុមួយនៃការឃោសនារបស់បេក្ខជនទាំងពីរ។ ទាំងលោកស្រីហ៊ីឡារី គ្លីនតុន ទាំងលោកដូណាល់ត្រាំ សុទ្ធតែបានប្រកាសថ្កោលទោសអំពើហិង្សានេះ។
លោកស្រីហ៊ីឡារី គ្លីនតុន បានថ្លែងថា ជនរងគ្រោះស្បែកខ្មៅបានស្លាប់២នាក់បន្ថែមទៀត ដោយសារគ្រាប់កាំភ្លើងរបស់នគរបាល ដែលរឿងនេះវាកាន់តែធ្ងន់ធ្ងរទៅៗ មិនអាចឲ្យអត់ទ្រាំបានទៀតទេ។ ចំណែកលោក ដូណាល់ ត្រាំវិញ បានសរសេរលើទំព័រTwitter របស់ខ្លួនថា លោកសន្យា ធ្វើឲ្យសហរដ្ឋអាមេរិក ក្លាយជាប្រទេសដែលមានសុវត្ថិភាពបំផុត។
យ៉ាងណាក៏ដោយ យើងឃើញថា បញ្ហាប្រកាន់ពូជសាសន៍ គឺជាជំងឺមហារីកនៅអាមេរិក ដែលរដ្ឋាភិបាលថ្មីត្រូវតែរកវិធីព្យាបាលឲ្យធូស្រាល។ តែបើយើងស្តាប់សម្តីរបស់លោកដូណាល់ ត្រាំ គឺថា យើងអស់សង្ឃឹមទៅហើយ ព្រោះគោលនយោបាយគាត់ គឺពន្យុះឲ្យមនុស្សកាន់តែស្អប់គ្នា ចង់បើកដៃឲ្យមនុស្សប្រើប្រាស់អាវុធ ដោយសេរី ហើយលើកតំកើងតែជនជាតិស្បែកសតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ