សភាអាមេរិកចាប់ផ្តើមចូលធ្វើការឆ្នាំថ្មី ត្រៀមខ្លួនធ្វើកំណែទម្រង់បែបអភិរក្សនិយម
ចុះផ្សាយនៅថ្ងៃ៖
ស្តាប់ - ០៧:៣៦
ថ្ងៃទី៣ មករានេះ សមាជិកសភាទាំងពីរ របស់សហរដ្ឋអាមេរិក បានចាប់ផ្តើមចូលធ្វើការ សម្រាប់ឆ្នាំថ្មី ឆ្នាំ២០១៧។ អ្វីដែលជាការកត់សំគាល់សំខាន់នោះ គឺទាំងសភាតំណាង និងទាំងព្រឹទ្ធសភា គឺគណបក្សសាធារណរដ្ឋមានសម្លេងភាគច្រើនទាំងអស់។ ដូច្នេះ ចាប់ពីពេលនេះទៅ ជាមួយនឹងលោកដូណាល់ត្រាំ ដែលនឹងឡើងកាន់តំណែងជាប្រធានាធិបតី នៅថ្ងៃទី២០ មករា ខាងមុខនេះ គឺគណបក្សសាធារណៈរដ្ឋ មានទាំងអំណាចនៅក្នុងសភា និងទាំងនៅក្នុងរដ្ឋាភិបាល។ នេះគឺជាឱកាសមាសសម្រាប់គណបក្សនេះ ដើម្បីធ្វើកំណែទម្រង់ធំៗ បែបអភិរក្សនិយម និងជាពិសេស គឺដើម្បីលប់ចោលនូវស្នាដៃ ទាំងឡាយណា ដែលលោកអូបាម៉ា បានសម្រេចបានកន្លងមក។
បក្សសាធារណៈរដ្ឋ កាច់ចង្កូតសហរដ្ឋអាមេរិក តែម្នាក់ឯង៖
នៅសល់ពេល មិនដល់២០ថ្ងៃទៀតទេ លោកដូណាល់ ត្រាំ នឹងក្លាយជាប្រធានាធិបតីសហរដ្ឋអាមេរិកពេញច្បាប់។ ថ្ងៃទី៣មករានេះ សភាទាំងពីរអង្គរបស់អាមេរិក ក៏ចាប់ផ្តើមចូលធ្វើការដែរ។ អ្វីដែលគេចាប់អារម្មណ៍បំផុត គឺទាំងសភា ទាំងរដ្ឋាភិបាលថ្មី គឺសុទ្ធតែស្ថិតក្នុងដៃគណបក្សសាធារណៈរដ្ឋ ដែលការនេះ គឺមានន័យថា គណបក្សនេះ នឹងធ្វើកំណែទម្រង់នានា បានយ៉ាងងាយស្រួល។
ចាប់ពីពេលនេះទៅ សភាទាំងពីរអង្គរបស់អាមេរិក រឺដែលយើងហៅម្យ៉ាងទៀតថា កុងហ្ក្រេ ព្រមទាំងរដ្ឋាភិបាល ដែលមានលោកដូណាល់ ត្រាំជាប្រមុខ គឺសុទ្ធតែជារបស់គណបក្សសាធារណៈរដ្ឋទាំងអស់។ តាមពិតទៅ សភាទាំងពីរអង្គ បានធ្លាក់មកក្នុងដៃរបស់គណបក្សសាធារណៈរដ្ឋ តាំងពីឆ្នាំ២០១៤ ក្រោយពេលបោះឆ្នោតពាក់កណ្តាលអាណត្តិ។ ក្នុងរយៈពេល២ឆ្នាំចុងក្រោយនេះ សមាជិកសភាមកពីគណបក្សសាធារណៈរដ្ឋ បានបោះឆ្នោតបដិសេធសំណើរច្បាប់ ក៏ដូចជារារាំងកំណែទម្រង់ធំៗរបស់លោកអូបាម៉ា បានសឹងតែទាំងអស់។
សម្រាប់ពេលនេះ អ្វីដែលអ្នកវិភាគទូទៅបានយល់ឃើញ គឺថាគណបក្សសាធារណៈរដ្ឋនឹងមានភាពងាយស្រួល ក្នុងការគ្រប់គ្រងសហរដ្ឋអាមេរិកតែម្នាក់ឯង ដោយសារគេមានសភា និងប្រធានាធិបតីដែលជាមនុស្សរបស់បក្សគេ។ គម្រោងកំណែទម្រង់ និងច្បាប់ថ្មីៗជាច្រើន ត្រូវគេឲ្យដឹងថា គេធ្វើសឹងតែរួចរាល់ទៅហើយ គឺរងចាំឲ្យតែលោកដូណាល់ត្រាំ ចូលកាន់តំណែងពេញលេញ នឹងអាលចុះហត្ថលេខាអនុវត្តិវាតែប៉ុណ្ណោះ។
លប់ដាន និងបំបាត់ស្នាដៃរបស់អូបាម៉ា ចោលទាំងអស់៖
អ្នកវិភាគជាច្រើនយល់ថា អ្វីដែលលោកដូណាល់ត្រាំ ក៏ដូចជាគណបក្សសាធារណៈរដ្ឋ នឹងរួមគ្នាធ្វើ ចាប់ពីពេលនេះទៅ គឺលប់បំបាត់ដាន និងស្នាដៃរបស់លោកអូបាម៉ា ដែលគាត់បានកសាងកន្លងមក ចោលទាំងអស់។ មានន័យថា ចង្កូតនយោបាយដឹកនាំប្រទេស ទាំងគ្រប់វិស័យ នឹងត្រូវផ្លាស់ប្តូរទាំងស្រុង ខុសពីលោកអូបាម៉ា ហើយច្បាប់ខ្លះដែលលោកអូបាម៉ា បានអនុម័ត គឺគេអាចនឹងលប់វាចោលទាំងស្រុងទៀតផង។
ជាក់ស្តែង ច្បាប់ស្តីពីការធានារ៉ាប់រងសុខភាពប្រជាពលរដ្ឋ រឺហៅម្យ៉ាងទៀតថា Obamacare។ ច្បាប់នេះ គឺជាស្នាដៃធំបង្អស់របស់លោកអូបាម៉ា ដែលលោកបានមានៈ បង្កើតវាឡើង ដើម្បីស្ថាបនាប្រព័ន្ធធានារ៉ាប់រងសុខភាព ដល់ប្រជាជនអាមេរិកក្រីក្រ រឺអ្នកដែលគ្មានលទ្ធភាព។ តែច្បាប់នេះ ត្រូវបានលោកដូណាល់ត្រាំ និង គណបក្សសាធារណៈរដ្ឋប្រកាសថា គឺនឹងលប់វាចោល ហើយដាក់ស្នើរច្បាប់ថ្មី។
គណបក្សសាធារណៈរដ្ឋ មានគម្រោងធ្វើកំណែទម្រង់ជាច្រើនផ្សេងទៀត ដែលសុទ្ធតែជាកំណែទម្រង់បែបអភិរក្សនិយមទាំងអស់។ តួយ៉ាងគំរោងកំណែទម្រង់ច្បាប់ពន្ធដា ដែលបើកដៃ ផ្តល់ប្រយោជន៍ខ្លាំងឲ្យក្រុមហ៊ុនឯកជន។ ចំណែកវិស័យហិរញ្ញវត្ថុសាធារណៈ គឺការចំណាយរបស់រដ្ឋ ក៏អាចនឹងត្រូវកាត់បន្ថយផងដែរ។ មិនត្រឹមតែប៉ុណ្ណោះទៀត សកម្មជនការពារសិទ្ធិមនុស្ស កំពុងតែព្រួយបារម្ភ ថាក្រុមគណបក្សសាធារណៈរដ្ឋ អាចនឹងធ្វើកំណែទម្រង់ ដើម្បីបំបិទសិទ្ធិក្នុងការរំលូតកូន រឺមួយក៏រារាំងការប្រើប្រាស់ថ្នាំពន្យាកំណើតជាដើម។
ដូចគ្នាដែរ ទាក់ទិននឹងវិស័យការពារបរិស្ថាន គឺជឿថា គណបក្សសាធារណៈរដ្ឋប្រាកដជា កាត់បន្ថយកាតព្វកិច្ចរបស់ក្រុមហ៊ុនសហគ្រាស ព្រោះគណបក្សនេះ មិនដែលបារម្ភអំពីការប្រែប្រួលអាកាសធាតុ រឺក៏ការចុះថយនៃធនធានធម្មជាតិអ្វីទេ។ នេះយើងនៅមិនទាន់រាប់អំពីគោលនយោបាយគ្រប់គ្រងការកាន់កាប់អាវុធផង ដែលកន្លងមកយើងដឹងគ្រប់គ្នា ថាគណបក្សស្តាំនិយមនេះ មិនដែលខ្វល់ថាមានអ្នកស្លាប់ប៉ុន្មានអ្នកទេ ហើយតែងតែការពារសិទ្ធិកាន់កាប់អាវុធដោយសេរីនេះជានិច្ច។
ម្នាក់ឯង តែឧបសគ្គមានច្រើន៖
បក្សសាធារណៈរដ្ឋ ក្តាប់អំណាចតែម្នាក់ឯង តែមិនមែនមានន័យថា វាគ្មានឧបសគ្គនោះទេ។ ទីមួយគឺពេលវេលាខ្លី។ ឱកាសមាសនេះ គណបក្សសាធារណៈរដ្ឋអាចមានតែ២ឆ្នាំទេ ព្រោះថាសម្រាប់សមាជិកសភាតំណាង គឺមានអាណត្តិតែ២ឆ្នាំទេ ហើយសម្រាប់សមាជិកព្រឹទ្ធសភាវិញ គឺត្រូវផ្លាស់ប្តូរ១ភាគ៣ នៅរៀងរាល់២ឆ្នាំម្តង។ ដូចនេះ ថាមិនត្រូវចាប់ពីដើមឆ្នាំ២០១៩ សភាទាំងពីរអង្គ អាចនឹងធ្លាក់ទៅក្នុងដៃគណបក្សប្រជាធិបតេយ្យ វិញក៏ថាបានដែរ។
ឧបសគ្គមួយទៀត គឺក្នុងគណបក្សសាធារណៈរដ្ឋខ្លួនឯងនេះ ក៏មានចរន្តពីរមិនស្របគ្នាដែរ ជាពិសេសក្នុងចំណោមសមាជិកសភាទាំងពីរអង្គ។ ពោលគឺមានសមាជិកសភា ដែលជាក្រុមអភិរក្សនិយម និងមួយក្រុមទៀត ដែលជាក្រុមកណ្តាលនិយម។ ក្រុមទាំងពីរនេះ ការពារផលប្រយោជន៍ខុសគ្នា ហើយតែងតែប្រកែកគ្នាតឹងសសៃក ក្នុងពេលធ្វើច្បាប់ម្តងៗ។ ដូច្នេះ គេជឿថា ការអនុម័តច្បាប់ និងគំរោងកំណែទម្រង់ផ្សេងៗប្រាដកជាត្រូវឆ្លងកាត់ការជជែកតវ៉ាគ្នា ខ្លាំងក្លាមិនខាន ហើយថាមិនត្រូវវាប្រាដកជាចំណាយពេលយូរ។
យ៉ាងណាមិញ គម្រោងលប់ចោលច្បាប់ Obamacare ហើយដាក់ជំនួសដោយច្បាប់ថ្មី គឺមិនប្រាដកថាអាចចេញដោយស្រួលទេ ព្រោះច្បាប់ថ្មី នៅមិនទាន់សរសេរបានមួយតួអក្សរនៅឡើយទេ។ មួយឆ្នាំទៀត មិនទាន់ដឹងយ៉ាងណាផង ទំរាំតែដល់ពេលត្រូវជជែកដេញដោលគ្នា នៅក្នុងសភាទាំងពីរអង្គ។
ឧបសគ្គមួយទៀតដែរ គឺនៅព្រឹទ្ធសភា គណបក្សប្រជាធិបតេយ្យ នៅមានសម្លេងជាង៤០%ដែរ ដែលការនេះ អាចរារាំង មិនឲ្យគណបក្សសាធារណៈរដ្ឋធ្វើអ្វីបានដោយងាយ ក្នុងករណីមួយចំនួន ដែលត្រូវការសម្លេងឆ្នោតយ៉ាងហោចណាស់៦០%។ តួយ៉ាង ដូចជាការតែងតាំងចៅក្រមទី៩ នៃសមាសភាពសមាជិកចៅក្រមតុលាការកំពូល។ តុលាការនេះ មានតួនាទីឃ្លាំមើលការគោរពរដ្ឋធម្មនុញ្ញ ហើយជាស្ថាប័នយុត្តិធម៌កំពូលរបស់សហរដ្ឋអាមេរិក ដែលធានាការពារសិទ្ធិសេរីភាព ព្រមទាំងរបត់វិវឌ្ឍន៍របស់សង្គម តែម្តង។
ដោយឡែក បើយើងត្រលប់ទៅមើលលទ្ធផលបោះឆ្នោត កាលពីខែវិច្ឆិកាកន្លងទៅ គឺលោកស្រីហ៊ីឡារី គ្លីនតុន មានចំនួនឆ្នោតលើសលោក ដូណាល់ ត្រាំ ដល់ទៅ៣លានសម្លេង។ ដូច្នេះមានន័យថា ប្រជាជនអាមេរិកភាគច្រើន ប្រាកដជាមិននៅស្ងៀម បណ្តោយឲ្យលោកដូណាល់ត្រាំ ក៏ដូចជាគណបក្សសាធារណៈរដ្ឋធ្វើអ្វីបានតាមចិត្តទេ។ គេជឿថា បាតុកម្មតវ៉ា ទូទាំងប្រទេសប្រាកដជាសំបូរណាស់ ចាប់ពីពេលនេះទៅ។
រវាងគណបក្សសាធារណៈរដ្ឋ និងលោកដូណាល់ត្រាំ មិនមែនទឹកឃ្មុំផ្អែមគ្រប់រឿងទេ!
លោកដូណាល់ ត្រាំ ជាមនុស្សគណបក្សសាធារណៈរដ្ឋមែនពិត តែមិនមែនមានន័យថា គណបក្សនេះ មានទស្សនវិស័យដូចលោកដូណាល់ត្រាំ ទាំងអស់ទេ ជាពិសេសគឺទាក់ទិននឹងនយោបាយការបរទេសតែម្តង។ តាមការវិភាគ កន្លងមកនេះ យើងឃើញថា របត់នយោបាយការបរទេសរបស់សមាជិកសភា និងព្រឹទ្ធសភាគណបក្សសាធារណៈរដ្ឋ គឺមានទំនោរច្រើនដូចទៅនឹងការយល់ឃើញរបស់រដ្ឋាភិបាលលោកអូបាម៉ា តែវាផ្ទុយសឹងតែទាំងស្រុង ពីទស្សនវិស័យរបស់លោកដូណាល់ ត្រាំ។
ជាក់ស្តែង ទាក់ទិនទៅនឹងវិបត្តិជាមួយរុស្ស៊ី ក្រោយពេលដែលរដ្ឋាភិបាលលោកអូបាម៉ា បានចោទរុស្ស៊ី ថាបានចូលលូកដៃ ក្នុងកិច្ចការបោះឆ្នោត តាមរយៈការបញ្ជាឲ្យចោរព័ត៌មានវិទ្យា ចូលមកលួចទិន្ន័យ។ បញ្ហានេះ គឺសមាជិកសភាគណបក្សសាធារណៈរដ្ឋ យល់ដូចលោកអូបាម៉ា ហើយទាមទារឲ្យមាននយោបាយវាយបកទៅលើរុស្ស៊ីវិញ ក៏ប៉ុន្តែលោកដូណាល់ ត្រាំ នៅតែប្រកែកថាវាមិនមែនជាការពិត ថារុស្ស៊ីមិនធ្វើរឿងបែបនេះ។
ចំណុចមួយទៀត មិនមែនជាឧបសគ្គរឺវិវាទអ្វីទេ តែជាការព្រួយបារម្ភ ស្តីពីសមត្ថភាពដឹកនាំប្រទេសរបស់លោកដូណាល់ត្រាំ។ សហរដ្ឋអាមេរិក ជាមហាអំណាចកំពូលគ្រប់វិស័យ ដូច្នេះ ការដឹកនាំកាច់ចង្កូតប្រទេសនេះ មិនមែនចេះតែធ្វើឲ្យតែបានៗទៅទេ។ គ្រាន់តែក្នុងសេតវិមាន មានមនុស្សជាង៤០០នាក់ ដែលជាទីប្រឹក្សា នឹងត្រូវធ្វើការជាប្រចាំជាមួយប្រធានាធិបតី។
មានគេកំពុងតែចោទសួរច្រើនណាស់ថា លោកដូណាល់ត្រាំ ប្រហែលជាមិនដឹង មិនយល់ពីកិច្ចការងារប្រចាំថ្ងៃរបស់ប្រធានាធិបតីអាមេរិកទេ ថាតើត្រូវប្រឈមមុខនឹងបញ្ហាអ្វីខ្លះ ត្រូវសម្រេចអ្វីខ្លះរាល់ថ្ងៃ។ សេចក្តីសម្រេចនីមួយៗចេញពីសេតវិមាន មិនមានប៉ះពាល់តែអាមេរិក តែឯងទេ តែវាប៉ះពាល់ដល់ពិភពលោកទាំងមូល។ ប្រធានាធិបតីអាមេរិកមួយទាំងមូល មិនអាចចេះតែនិយាយតែផ្តេសតែផ្តាស នៅលើទំព័រ Twetter ដូចដែលលោកដូណាល់ ត្រាំ ធ្លាប់ធ្វើកន្លងមកនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ