អង្គការទួលបន្ទុកជនភៀសខ្លួន អំពាវនាវឲ្យរដ្ឋាភិបាលអាមេរិក កុំផ្អាកកម្មវិធីទទួលជនភៀសខ្លួន
មួយថ្ងៃ ក្រោយការចុះហត្ថលេខា របស់លោកដូណាល់ ត្រាំ លើក្រឹត្យច្បាប់ផ្អាកកម្មវិធីទទួលជនភៀសខ្លួនមកពីប្រទេសកាន់សាសនាអ៊ីស្លាម ប្រតិកម្មបានមានជាបន្តបន្ទាប់ ដោយអ្នកខ្លះ ថ្កោលទោសថាគឺជាការសម្រេច ដោយគ្មានហេតុផល និងគ្មានមេត្តាធម៌ និងជាពិសេស គឺធ្វើឲ្យអព្វឱនកិត្តិយសរបស់សហរដ្ឋអាមេរិក។ ដោយឡែកឧត្តមស្នងការអង្គការសហប្រជាជាតិ ទទួលបន្ទុកជនភៀសខ្លួន (UNHCR) និងអង្គការអន្តរជាតិដើម្បីជនអន្តោប្រវេសន៍ (IMO) បានអំពាវនាវឲ្យលោកដូណាល់ ត្រាំ បន្តអនុវត្តកម្មវិធីទទួលជនភៀសខ្លួនដោយសង្រ្គាម តទៅទៀត។
ចុះផ្សាយនៅថ្ងៃ៖
ស្តាប់ - ០២:៣១
ឧត្តមស្នងការនៃអង្គការសហប្រជាជាតិទទួលបន្ទុកជនភៀសខ្លួន និងអង្គការអន្តរជាតិដើម្បីជនអន្តោប្រវេសន៍ បានចេញសេចក្តីប្រកាសរួមគ្នា សំណូមពរដល់រដ្ឋាភិបាលរបស់លោកដូណាល់ត្រាំ ឲ្យបន្តអនុវត្តកម្មវិធីទទួលជនភៀសខ្លួន តទៅទៀត កុំផ្អាកឲ្យសោះ។
ការអំពាវនាវនេះ បានធ្វើឡើងមួយថ្ងៃ បន្ទាប់ពីលោកដូណាល់ ត្រាំ ប្រធានាធិបតីថ្មីសហរដ្ឋអាមេរិក បានចុះហត្ថលេខា លើក្រិត្យច្បាប់ ដើម្បីផ្អាករយៈពេល៣ខែ មិនផ្តល់ទិដ្ឋាការដល់ប្រជាជន ដែលមកពីប្រទេសអ៊ីស្លាមចំនួន៧។ ប្រទេសទាំងនោះ មានស៊ីរី អ៊ីរ៉ាក់ អ៊ីរ៉ង់ យេមែន លីប៊ី ស៊ូដង់ និង សូម៉ាលី។ មិនត្រឹមតែប៉ុណ្ណោះ លោក ដូណាល់ ត្រាំ បានបញ្ជាឲ្យផ្អាក៤ខែ នូវកម្មវិធីទទួលជនភៀសខ្លួន ដែលរត់គេចពីសង្រ្គាម មិនថាមកពីប្រទេសណាក៏ដោយ។
អង្គការទទួលបន្ទុកជួយជនភៀសខ្លួនទាំង២ខាងលើ បានលើកឡើងថា បច្ចុប្បន្ននេះ ចំនួនជនភៀសខ្លួន បានកើនឡើងយ៉ាងខ្លាំង ដោយសារតែស្ថានភាពសង្រ្គាម នៅអាហ្វ្រិក និងតំបន់ដើមបូព៌ា។ កម្មវិធីជួយទទួលយកជនភៀសខ្លួនទៅស្នាក់នៅ របស់រដ្ឋាភិបាលអាមេរិក កន្លងមក គឺបានជួយសម្រាលច្រើនណាស់។ មានប្រទេស៦ ដែលចូលរួមអនុវត្តកម្មវិធីនេះ ដោយមានការសហការជាមួយនឹងអង្គការទាំងពីរខាងលើ ក្នុងការរៀបចំឯកសារសម្របសម្រួលដល់ជនភៀសខ្លួន។
អង្គការទាំងពីរ បានឆ្លៀតបន្ថែមថា ជនភៀសខ្លួនម្នាក់ៗ ត្រូវបានគេត្រួតពិនិត្យតាមដានយ៉ាងម៉ដ្ឋចត់ ពីសំណាក់ក្រុមការងាររបស់អង្គការ ព្រមទាំងមន្ត្រីអាមេរិក មុននឹងបញ្ជូនសំណុំឯកសារ ចូលទៅរស់នៅក្នុងសហរដ្ឋអាមេរិក។ ដូច្នេះ ហេតុផលរបស់លោក ដូណាល់ ត្រាំ ដែលចង់ទប់ស្កាត់ក្រុមភេរវកម្ម តាមរយៈការផ្អាកឈប់ទទួលយកជនភៀសខ្លួននោះ គឺជារឿងមិនសមហេតុផលទេ។ មួយវិញទៀត ជនភៀសខ្លួនទាំងអស់ ត្រូវតែទទួលបានសិទ្ធិនិងការគោរពដោយស្មើភាពគ្នា ទោះអ្នកនោះកាន់សាសនាអ៊ីស្លាម រឺសាសនា អ្វីក៏ដោយ។
ដោយឡែក សមាជិកសភាមកពីគណបក្សប្រជាធិបតេយ្យជាច្រើនអ្នក បានចេញមុខរិះគន់លោកប្រធានាធិបតី ត្រាំ ទាក់ទិនទៅនឹងវិធានការ ដែលគេចាត់ទុកថា ជាវិធានការបែបរើសអើង និងរំលោភលើសិទ្ធិសេរីភាពជាមូលដ្ឋាន។ ជាក់ស្តែង លោក Ben Cardin ប្រធានគណកម្មការកិច្ចការបរទេស នៃព្រឹទ្ធសភាអាមេរិក បានលើកឡើងថា លោកដូណាល់ ត្រាំគិតតែនឹងចុងក្រមុះ មើលមិនបានឆ្ងាយពីផលវិបាកនៃវិធានការដ៏ល្ងង់ខ្លៅរបស់ខ្លួន។
លោកលើកឡើងថា ជនភៀសខ្លួន ដែលគេទទួលឲ្យមករស់នៅសហរដ្ឋអាមេរិក គឺត្រូវបានគេពិនិត្យតាមដាន មាននីតិវិធីយ៉ាងតឹងតែង ដែលលោកដូណាល់ ត្រាំ មិនទាំងដឹងថានីតិវីធីនេះមានអ្វីខ្លះផង។ ផ្ទុយទៅវិញ ការដែលផ្អាក ឈប់ទទួលជនភៀសខ្លួន គឺជាការបំបាក់មុខសហរដ្ឋអាមេរិក ចំពោះមុខប្រទេសជាមិត្តផ្សេងទៀត និងជាពិសេស គឺបំភ្លេចអតីតកាលខ្លួនឯងរបស់សហរដ្ឋអាមេរិក ដែលជាដែនដីធ្លាប់តែទទួលជនភៀសខ្លួន និងអ្នកដែលត្រូវការជំនួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ