អាមេរិក និង អ៊ីរ៉ង់ ធ្វើការដោះដូរអ្នកទោសគ្នា ម្ខាងម្នាក់
កាលពីថ្ងៃសៅរ៍ ទៅ៧ធ្នូ សហរដ្ឋអាមេរិក និង អ៊ីរ៉ង់ បានប្រកាសរៀងៗខ្លួន ថាប្រទេសទាំង២ បានធ្វើការដោះដូរអ្នកទោសគ្នា ម្ខាងម្នាក់។ អាមេរិកបានដោះលែង អ្នកទោសជនជាតិអ៊ីរ៉ង់ម្នាក់ឈ្មោះ Massoud Soleimani ចំណែកអ៊ីរ៉ង់វិញ បានដោះលែងអ្នកទោសជនជាតិអាមេរិក ដើមកំណើតចិនម្នាក់ ឈ្មោះ Wang Xiyue។ គួរកត់សំគាល់ថា នេះគឺជាករណីកម្របំផុត ដែលប្រទេសទាំង២ និយាយត្រូវរូវគ្នា ព្រមព្រៀងដោះលែងអ្នកទោស ខណៈដែលកាលៈទេសៈពេលនេះ ប្រទេសទាំង២កំពុងគំរាមសំឡុតគ្នាទៅវិញទៅមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៩
រសៀលថ្ងៃសៅរ៍ ទៅ៧ធ្នូ នៅលើទំព័រ Twitter លោក Javad Zarif រដ្ឋមន្ត្រីក្រសួងការបរទេសអ៊ីរ៉ង់ បានសរសេរថា៖ សប្បាយចិត្តណាស់ បន្ទាប់ពីបានដឹងថា លោកសាស្ត្រាចារ្យ Massoud Soleimani និងលោក Wang Xiyue នឹងអាចត្រលប់ទៅជួបជុំក្រុមគ្រួសារវិញ។ លោករដ្ឋមន្ត្រីការបរទេសអ៊ីរ៉ង់ សរសេរបន្ថែមថា លោកសូមអរគុណ មន្តី្រការទូតស្វីស ដែលបានដើរតួជាអាជ្ញាកណ្តាល សម្រេចកិច្ចការនេះ ព្រោះស្វីសជាតំណាងឲ្យរដ្ឋាភិបាលអាមេរិក ប្រចាំនៅអ៊ីរ៉ង់ ក្រោយពេលដែលអាមេរិក និងអ៊ីរ៉ង់ ផ្តាច់ចំណងការទូតនឹងគ្នានៅឆ្នាំ១៩៧៩។
ប្រមាណមួយម៉ោងក្រោយ លោកដូណាល់ ត្រាំ បានលិខិតមួយ ដោយបានប្រកាសថា លោក Wang Xiyue កំពុងតែធ្វើដំណើរត្រលប់មកផ្ទះ ជួបជុំក្រុមគ្រួសារនៅសហរដ្ឋអាមេរិកវិញហើយ។ ក្នុងលិខិតដដែល លោកដូណាល់ ត្រាំ ក៏បានឆ្លៀតអរគុណរដ្ឋាភិបាលស្វីស ដែលតែងតែជួយសម្របសម្រួល ការពារផលប្រយោជន៍អាមេរិក។
សូមរំលឹកថា លោក Wang Xiyue ជនជាតិអាមេរិក ដើមកំណើតចិន គឺជាអ្នកស្រាវជ្រាវ សរសេរនិក្ខេបបទថ្នាក់បណ្ឌិត នៅសកលវិទ្យាល័យ Princeton។ លោកត្រូវបានអាជ្ញាធរអ៊ីរ៉ង់ចាប់ខ្លួន នៅពេលដែលលោកចុះទៅស្រាវជ្រាវនៅអ៊ីរ៉ង់ នៅឆ្នាំ២០១៦។ តុលាការអ៊ីរ៉ង់ បានកាត់ទោសលោក ឲ្យជាប់ពន្ធនាគារ១០ឆ្នាំ ពីបទធ្វើចារកិច្ច។ ចំណែកលោក Massoud Soleimani សាស្ត្រាចារ្យជនជាតិអ៊ីរ៉ង់ ជាអ្នកស្រាវជ្រាវជំនាញកោសិកា សរីរាង្គ។ លោក Massoud Soleimani ត្រូវបានសមត្ថកិច្ចអាមេរិក ចាប់ឃាត់ខ្លួន នៅឯព្រលានយន្តហោះChicago នៅខែតុលា ឆ្នាំ២០១៨ ដោយចោទថាលោកបានបន្លំបញ្ជូនសមាធាតុជីវសាស្ត្រ ចេញពីអាមេរិក ទៅអ៊ីរ៉ង់។
គួរកត់សំគាល់ថា ការព្រមព្រៀងគ្នា ដោះលែងអ្នកទោសទៅវិញទៅមក រវាងអ៊ីរ៉ង់ និងអាមេរិកនេះ គឺជារឿងកម្រណាស់។ ជាពិសេសទៀតនោះ គឺក្នុងពេលនេះទំនាក់ទំនងរវាងអាមេរិក និងអ៊ីរ៉ង់ បានឈានមកដល់ដំណាល់កាលមួយ ធ្ងន់ធ្ងរ គំរាមប្រើកម្លាំងដាក់គ្នាទៅវិញទៅមក។
សូមបញ្ជាក់ដែរថា ទោះយ៉ាងនេះក្តី អ៊ីរ៉ង់នៅបន្តបង្ឃាំងជនជាតិអាមេរិកជាច្រើននាក់ទៀត ដោយចោទពីបទធ្វើចារកិច្ចស៊ើបការសំងាត់។ ក្នុងនោះមានដូចជា ឪពុកកូន២នាក់ ជនជាតិអាមេរិក ដើមកំណើតអ៊ីរ៉ង់ Mohammed Bagher Namazi និង Siamak Namazi ដែលត្រូវតុលាការអ៊ីរ៉ង់ កាត់ទោសឲ្យជាប់ពន្ធនាគារ១០ឆ្នាំ។ អតីតទាហានអាមេរិកម្នាក់ ឈ្មោះ Michael R. White ក៏កំពុងជាប់ឃុំនៅអ៊ីរ៉ង់ដែរ ហើយចំណែកអ្នកស៊ើបការណ៍FBI ម្នាក់ ឈ្មោះ Robert Levinson បានបាត់ខ្លួននៅអ៊ីរ៉ង់ គ្មានដំណឹងសោះ។ ចំណែក អាមេរិកវិញ ក៏កំពុងបង្ឃាំង អ្នកទោសជនជាតិអ៊ីរ៉ង់ជាច្រើននាក់ដែរ ដោយចោទពីបទបំពាននឹងទណ្ឌកម្មសេដ្ឋកិច្ច ដែលអាមេរិកបានដាក់ទៅលើអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ