អាមេរិកហាមអ្នកដំណើរតាមយន្តហោះមកពីប្រទេស៨ មិនឲ្យយកឧបករណ៍អេឡិចត្រូនិចតាមខ្លួន ក្រៅពីទូរស័ព្ទ
អាជ្ញាធរសន្តិសុខផ្ទៃក្នុងអាមេរិក ទើបបានសម្រេច ហាមមិនឲ្យអ្នកដំណើរតាមជើងយន្តហោះ មកពីប្រទេស៨នៅតំបន់អារ៉ាប់ មិនឲ្យយកឧបករណ៍អេឡិចត្រូនិកទាំងឡាយណា ដាក់តាមខ្លួន ក្រៅពីទូរស័ព្ទដៃឡើយ។ ការហាមប្រាមនេះ ត្រូវបានផ្សាយទៅដល់ក្រុមហ៊ុនអាកាសចរណ៍ចំនួន៩ ហើយដែលរដ្ឋាភិបាលអាមេរិក បានអះអាងថា គឺដើម្បីបញ្ចៀស ការធ្វើភេរវកម្មនៅតាមយន្តហោះ ហើយបើក្រុមហ៊ុនណាមិនធ្វើតាម គេនឹងដកសិទ្ធិធ្វើអាជីវកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
“ចាប់តាំងពីថ្ងៃអង្គារ ទី២១មីនា ម៉ោង៧ព្រឹកមក ក្រុមហ៊ុនអាកាសចរណ៍ទាំងអស់ មានពេល៤ថ្ងៃ ដើម្បីធ្វើការជូនដំណឹងទៅកាន់អតិថិជនខ្លួនទាំងអស់ ដែលត្រូវធ្វើដំណើរតាមជើងយន្តហោះ មកកាន់សហរដ្ឋអាមេរិក ថាមិនត្រូវយកឧបករណ៍អាឡិចត្រូនិក ដូចជា កុំព្យូទ័រលែបថប និង តាប្លែត ដាក់តាមខ្លួនទេ លើកលែងតែទូរស័ព្ទដៃ។ ឧបករណ៍អេឡិចត្រូនិចទាំងនោះ ត្រូវតែដាក់ទៅក្នុងកញ្ចប់បញ្ញើរបិទជិត ទុកនៅបាតយន្តហោះ”។
នេះគឺជាការប្រកាស របស់រដ្ឋមន្ត្រីក្រសួងសន្តិសុខផ្ទៃក្នុងអាមេរិក កាលពីថ្ងៃអង្គារម្សិលមិញ។ ប្រទេសដែលជាប់ពាក់ព័ន្ធក្នុងបំរាមនេះ មានចំនួន៨ ដែលសុទ្ធតែជាប្រទេសជាប់ចំណងសម្ព័ន្ធមិត្ត ជាមួយសហរដ្ឋអាមេរិកទាំងអស់ មានដូចជា ហ្សកដានី អេហ្ស៊ីប តួកគី អារ៉ាប៊ីសាអូឌីត កូវ៉េត កាតា អេមៀរ៉ាតអារ៉ាប់រួម និងម៉ារ៉ុក។ ចំណែកក្រុមហ៊ុនអាកាសចរណ៍ ដែលមានជើងហោះហើរ ហោះត្រង់ពីប្រទេសទាំងនោះ មកកាន់សហរដ្ឋអាមេរិក មាន៩ក្រុមហ៊ុន ហើយដែលមួយថ្ងៃៗ មានជើងហោះហើរសរុបប្រមាណជាជាង៥០ មកកាន់សហរដ្ឋអាមេរិក។
ទោះជាយ៉ាងនេះក្តី ក្រសួងសន្តិសុខផ្ទៃក្នុងអាមេរិក មិនបានបញ្ជាក់ អំពីមូលហេតុឲ្យបានច្បាស់ល្អិតល្អន់ទេ គ្រាន់តែបានលើកឡើងថា គឺដើម្បីហេតុផលសុវត្ថិភាព ព្រោះពួកភេរវករ អាចប្រើប្រាស់ ឧបករណ៍អេឡិចត្រូនិកទាំងនោះ ធ្វើជាគ្រាប់បែកផ្ទុះបាន។ យ៉ាងណាមិញ មន្ត្រីសន្តិសុខផ្ទៃក្នុងអាមេរិក បានអះអាង ដោយបានលើកជាឧទាហរណ៍ ករណីភេរវកម្មកាលពីខែកុម្ភៈឆ្នាំ២០១៦ ដែលតាមការសន្និដ្ឋាន គឺភេរវជនបានយកគ្រាប់បែកទៅបំផ្ទុះនៅលើយន្តហោះ បណ្តាលឲ្យស្លាប់មនុស្ស៧៤នាក់។
ដោយឡែក បើយោងតាមការផ្សាយរបស់ទូរទស្សន៍CNN ដែលបានស្រង់សំដីមន្ត្រីអាមេរិកម្នាក់ បានលើកឡើងថា ការហាមឃាត់នេះ គឺអាជ្ញាធរអាមេរិក មានការព្រួយបារម្ភ ពីសកម្មភាពភេរវកម្ម របស់ក្រុមអាល់កាយដា នៅតំបន់ឧបទ្វីបអារ៉ាប់។
សូមបញ្ជាក់ថា វិធានការនេះ គឺជាផ្នែកមួយនៃគោលនយោបាយរបស់រដ្ឋាភិបាលលោកដូណាល់ ត្រាំ ដែលអះអាងថា ចង់សំដៅការពារសន្តិសុខអាមេរិក។ បន្ទាប់ពីបានជួបបរាជ័យ ក្នុងការហាមឃាត់ចរាចរណ៍ចូលដីអាមេរិក ទៅលើអ្នកដំណើរមកពីប្រទេសអារ៉ាប់មួយចំនួន រដ្ឋាភិបាលលោកត្រាំ បានព្យាយាមដាក់ឧបសគ្គថ្មីមួយផ្សេងទៀត តាមរយៈវិធានាការថ្មីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ