នាយករដ្ឋមន្រ្តីអ៊ីស្រាអែល ទៅអាមេរិក ដើម្បីសុំបង្កើនជំនួយយោធាពីអាមេរិក
លោកនាយករដ្ឋមន្រ្តីបិនចាមីន នេតានីញ៉ាហ៊ូចាប់ផ្តើមបំពេញទស្សនកិច្ចរយៈពេល៤ថ្ងៃ នៅសហរដ្ឋអាមេរិក។ នាយករដ្ឋមន្រ្តីអ៊ីស្រាអែលនឹងត្រូវទទួលជួបដោយលោកប្រធានាធិបតីបារ៉ាក់ អូបាម៉ា នៅសេតវិមាន នៅល្ងាចថ្ងៃចន្ទ ទី ៩វិច្ឆិកា។ នៅក្នុងជំនួបកំពូលលើកទី ១ ចាប់តាំងពីមានកិច្ចព្រមព្រៀងនុយក្លេអ៊ែរអ៊ីរ៉ង់ ដែលជាសត្រូវរបស់អ៊ីស្រាអែល ថ្នាក់ដឹកនាំអាមេរិក និងអ៊ីស្រាអែលនឹងជជែកគ្នាពីជំនួយយោធា ដែលអាមេរិកត្រូវផ្តល់ទៅឲ្យអ៊ីស្រាអែល ក្នុងរយៈពេល ១០ឆ្នាំទៅមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ប្រធានាធិបតីអាមេរិក និងនាយករដ្ឋមន្រ្តីអ៊ីស្រាអែល ជាមនុស្សពីររូប ដែល នឹងគ្មានថ្ងៃ អាចចុះល្អូកល្អឺននឹងគ្នា។ ថ្នាក់ដឹកនាំទាំងពីរ អាចទុកដាក់ បញ្ហាផ្ទាល់ខ្លួន នៅមួយកន្លែង និងងាកមកជជែកគ្នា ដើម្បីផលប្រយោជន៍សន្តិសុខរួមរបស់អាមេរិក និងអ៊ីស្រាអែល។
ការចរចាស្តីពីកម្មវិធីនុយក្លេអ៊ែរអ៊ីរ៉ង់បានធ្វើឲ្យទំនាក់ទំនងសម្ព័ន្ធមិត្តអាមេរិក និងអ៊ីស្រាអែល ល្អក់កករ។ លោកអូបាម៉ា និងលោកនាយករដ្ឋមន្រ្តីអ៊ីស្រាអែលមើលមុខគ្នា កាន់តែមិនត្រង់ បន្ទាប់ពី នាយករដ្ឋមន្រ្តីអ៊ីស្រាអែល កាលពីខែមីនា បានឡើងទៅនិយាយរិះគន់រដ្ឋបាលអាមេរិក នៅមុខអ្នកតំណាងរាស្រ្តសភាអាមេរិក មកពីគណបក្សសាធារណរដ្ឋ។ នៅក្នុងទស្សនកិច្ចនៅអាមេរិក កាលណោះ លោកនេតានីញ៉ាហ៊ូមិនបានចូលជួបលោកអូបាម៉ាទេ។ តាមមន្រ្តីអាមេរិក លោកនេតានីញ៉ាហ៊ូ បានរំលោភពិធីការរបស់សេតវិមាន។
ទៅអាមេរិកលើកនេះ ដើម្បីផលប្រយោជន៍អ៊ីស្រាអែល លោកបិនចាមីន នេតានីញ៉ាហ៊ូទំនងនឹងមិនធ្វើកំហុសឆ្គង ដូចលើកមុននោះទេ។ នៅក្នុងជំនួបជាមួយលោកប្រធានាធិបតីអាមេរិក ប្រមុខរដ្ឋាភិបាលអ៊ីស្រាអែលចង់សុំបង្កើនជំនួយ យោធា ដែលអាមេរិក បានផ្តល់ទៅឲ្យអ៊ីស្រាអែល ប្រមាណ ៣ពាន់លានដុល្លារ ក្នុងមួយឆ្នាំៗ។ តាមសមាជិកសភាអាមេរិកដែលដកស្រង់សំដីដោយទីភ្នាក់ងារព័ត៌មានអង់គ្លេស Reuters អ៊ីស្រាអែលចង់ឲ្យអាមេរិក បន្ថែមជំនួយយោធា ឲ្យដល់ ៥០ពាន់លានដុល្លារ សម្រាប់រយៈពេល ១០ឆ្នាំ គឺដើម្បីជាសំណងជម្ងឺចិត្ត ដែលអាមេរិកបានចុះកិច្ចព្រមព្រៀងនុយក្លេអ៊ែរ ជាមួយអ៊ីរ៉ង់ ដែលជាសត្រូវរបស់អ៊ីស្រាអែល។
កិច្ចព្រមព្រៀងផ្តល់ជំនួយយោធាដល់អ៊ីស្រាអែល ដែលមានតម្លៃ ៣០ពាន់លានដុល្លារ សម្រាប់រយៈពេល ១០ឆ្នាំ នឹងត្រូវបិទបញ្ចប់ នៅឆ្នាំ២០១៧។ លោកបារ៉ាក់ អូបាម៉ាធ្លាប់បាននិយាយថា លោកត្រៀមខ្លួន ដើម្បី ចុះកិច្ចព្រមព្រៀង សម្រាប់រយៈពេល ១០ឆ្នាំបន្តទៀត។ ប៉ុន្តែ តាមមន្រ្តីអាមេរិក នឹងគ្មានទេ ការចុះហត្ថលេខាលើកិច្ចព្រមព្រៀងជំនួយយោធា នៅក្នុងអំឡុងដំណើរទស្សនកិច្ចរបស់លោកនេតានីញ៉ាហ៊ូនៅអាមេរិក។ ផ្ទុយទៅវិញ លោកអូបាម៉ា និងលោកនាយករដ្ឋមន្រ្តី អ៊ីស្រាអែល អាចផ្តោតលើការចរចាស្តីពីអនុស្សរណៈយោគយល់គ្នា ដែលនៅក្នុងនោះ អ៊ីស្រាអែលចង់បានសព្វាវុធទំនើបៗបន្ថែមពីអាមេរិក។ តាមការចុះផ្សាយរបស់ទីភ្នាក់ងារព័ត៌មានបារាំង AFP អ៊ីស្រាអែលចង់បានបន្ថែមយន្តហោះចម្បាំងប្រភេទ F35 ដែលជាយន្តហោះមហាទំនើបចុងក្រោយរបស់អាមេរិក ដែលមានសមត្ថភាពបំភាន់គ្រាប់មីស៊ីលបាញ់យន្តហោះ។ អ៊ីស្រាអែលដែលនឹងទទួលបានយន្តហោះចម្បាំង ប្រភេទ F35 ចំនួន៣៣គ្រឿង នៅឆ្នាំ ២០១៦ ចង់បានយន្តហោះទំនើបរបស់អាមេរិក ដើម្បីយកទៅទប់ទល់នឹងគ្រាប់មីស៊ីលដែលអ៊ីរ៉ង់បានបញ្ជារទិញរួចហើយដែរពីរុស្ស៊ី។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ