មន្ទីរប៉ង់តាហ្កូនបង្កើនសម្ពាធប្រឆំាងនឹង Wikileaks
នៅថ្ងៃព្រហស្បតិ៍ ទី៤ សីហា មន្ទីរប៉ង់តាហ្កូនបានដំឡើងសំឡេងប្រឆំាងនឹងវិបសៃត៍ Wikileaks ដោយបានទាមទារឲ្យវិបសៃត៍ព័ត៌មានមួយនេះបញ្ជូនត្រឡប់ទៅឲ្យខ្លួន វិញនូវឯកសារចំនួន ១៥ ០០០ ឯកសារដែលមិនទាន់បានចុះផ្សាយ។ គឺជាឯកសារសម្ងាត់របស់ក្រសួងការពារជាតិអាមេរិកំាងស្តីពីសង្រ្គាមនៅក្នុងប្រទេសអាហ្វហ្កានីស្តង់។ ជាមួយគ្នានេះ មន្ទីរប៉ង់តាហ្កូនក៏បានបង្ខំឲ្យវិបសៃត៍ Wikileaks ដកចេញវិញនូវឯកសារមួយចំនួនដែលខ្លួនបានចុះផ្សាយរួចហើយ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ គួច គន្ធារ៉ា
ការទាមទារនេះបានត្រូវប្រកាសដោយអ្នកនំាពាក្យក្រសួងការពារជាតិអាមេរិកំាងលោក Geoff Morrel។ អ្វីដែលក្រសួងការពារជាតិបានទាមទារ គឺសុំឲ្យវិបសៃត៍ Wikileaks បញ្ជូនទៅឲ្យរដ្ឋាភិបាលអាមេរិកំាងជាបន្ទាន់ នូវគ្រប់ឯកសារសម្ងាត់ទំាងអស់ដែលជាកម្មសិទ្ធិរបស់ក្រសួងការពារជាតិ។ មួយវិញទៀត លោក Geoff Morrel ក៏បានស្នើឲ្យវិបសៃត៍ Wikileaks ដកឯកសារសម្ងាត់ទំាងនោះចេញពីគេហទំព័ររបស់ខ្លួន លុបចេញពីម៉ាស៊ីនកុំព្យូទ័រ និងពីកន្លែងតម្កល់ទុក។
អ្នកនំាពាក្យក្រសួងការពារជាតិអាមេរិកំាងរូបនោះដដែលបានអះអាងថា ឯកសារសម្ងាត់ជាច្រើនស្តីពីសង្រ្គាមនៅប្រទេសអាហ្វហ្កានីស្តង់ដែលវិបសៃត៍ Wikileaks បានចុះផ្សាយលើគេហទំព័ររបស់ខ្លួននាពេលនេះ បាននិងកំពុងធ្វើឲ្យកម្លំាងទ័ពអាមេរិក និងកម្លំាងទ័ពអន្តរជាតិដែលកំពុងបំពេញបេសកកម្មក្នុងប្រទេសអាហ្វហ្កានីស្តង់ជួបគ្រោះថ្នាក់។
សូមជម្រាបជូនថាកាលពីដំណាច់ខែកក្កដាកន្លងទៅថ្មីៗនេះ វិបសៃត៍ Wikileaks បានចុះផ្សាយនៅលើគេហទំព័ររបស់ខ្លួននូវឯកសារសម្ងាត់ជាង ៩ម៉ឺនឯកសារ។ សុទ្ធសឹងជាឯកសារសម្ងាត់របស់ក្រសួងការពារជាតិអាមេរិកំាងដែលពាក់ព័ន្ធនឹងសង្រ្គាមនៅក្នុងប្រទេសអាហ្វហ្កានីស្តង់ចន្លោះឆ្នំា ២០០៤ និង ២០០៩។ អ្វីដែលធ្វើឲ្យទំាងអស់គ្នាចាប់អារម្មណ៍ជាងគេនៅក្នុងឯកសារសម្ងាត់នោះ គឺការលេងល្បែងមុខពីររបស់ប្រទេសប៉ាគីស្តង់ ក្នុងនាមជាសម្ព័ន្ធមិត្តចាក់ទឹកមិនលិចរបស់សហរដ្ឋអាមេរិក នៅក្នុងយុទ្ធនាការប្រយុទ្ធប្រឆំាងនឹងភេរវនិយម។ ឯកសារសម្ងាត់របស់ទាហានអាមេរិកំាងបានបញ្ជាក់យ៉ាងច្បាស់ៗ អំពីការរួមសហការរបស់ភ្នាក់ងារស៊ើបការសម្ងាត់ប៉ាគីស្តង់ជាមួយពួកឧទ្ទាមតាលីបង់នៅក្នុងប្រទេសអាហ្វហ្កានីស្តង់។ យោងតាមឯកសារដដែល ទីភ្នាក់ងារស៊ើបការសម្ងាត់ប៉ាគីស្តង់ថែមទំាងបានផ្តល់តំបន់កុលសម្ព័ន្ធរបស់ខ្លួននៅតាមបណ្តោយព្រំដែនជាមួយអាហ្វហ្កានីស្តង់ ឲ្យពួកមេតាលីបង់ធ្វើជាមូលដ្ឋានរបស់គេក្នុងការជ្រើសរើសសមាជិកថ្មី។ ធ្ងន់ធ្ងរជាងនេះ បើយោងតាមឯកសារនោះដដែល ភ្នាក់ងារស៊ើបការសម្ងាត់ប៉ាគីស្តង់ និងមេតាលីបង់បានជួបប្រជុំគ្នាដោយសម្ងាត់ជាអចិន្ត្រៃយ៍ ដើម្បីរៀបចំផែនការ និងយុទ្ធសាស្រ្តក្នុងការវាយប្រហារទាហានអាមេរិកំាងនៅក្នុងប្រទេសអាហ្វហ្កានីស្តង់។
អ្នកនំាពាក្យក្រសួងការពារជាតិអាមេរិកំាងលោក Geoff Morrelបានព្រមានថា នៅក្នុងករណីដែលវិបសៃត៍ Wikileaks មិនព្រមដកចេញ និងលប់ឯកសារសម្ងាត់ទំាងនោះចោលទេ ទីក្រុងវ៉ាស៊ីនតោននឹងផ្តើមសិក្សារកវិធានការផ្សេងទៀត។ ជាមួយគ្នានេះ លោក Geoff Morrel ក៏បានរម្លឹកជាថ្មីថា ក្រសួងស៊ើបការសម្ងាត់អាមេរិកំាង FBI និងក្រសួងយុត្តិធម៌កំពុងបន្តការស៊ើបអង្កេតដើម្បីស្វែករកមូលហេតុនៃការធ្លាយឯកសារសម្ងាត់ទំាងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ