Edward Snowdenហ៊ានផ្ចាញ់រដ្ឋបាលលោកអូបាម៉ា
ចុះផ្សាយនៅថ្ងៃ៖
ស្តាប់ - ០៥:១៤
អាជ្ញាធរអាមេរិកកំពុងតាមប្រមាញ់ Edward Snowden ដែលរដ្ឋាភិបាលចោទប្រកាន់ ថា ជាអ្នកទទួលខុសត្រូវ ក្នុងការដាក់សន្តិសុខជាតិ ទៅក្នុងគ្រោះថ្នាក់។ គេដឹងថា Edward Snowdenអាយុ ២៩ឆ្នាំ ជាអតីតជំនួយការព័ត៌មានវិទ្យា របស់ទីភ្នាក់ងារស៊ើបការណ៍សម្ងាត់CIA និងជាអ្នកទទួលម៉ៅការការងារបន្តពីទីភ្នាក់ងារសន្តិសុខជាតិ អាមេរិកាំង NSA។ តើយុវជនEdward Snowden ជាអ្នកណាឲ្យពិតប្រាកដ? ហើយតើគេអាងអ្វីបានជាហ៊ានផ្ចាញ់ផ្ចាលរដ្ឋាភិបាលអាមេរិក ដោយផ្តល់ឯកសារសម្ងាត់ទៅឲ្យអ្នកកាសែត?
កាលពីថ្ងៃពុធ សប្តាហ៍មុន Edward Snowden បានបង្ហាញមុខរបស់ខ្លួន នៅក្នុងបទសម្ភាសន៍ជាមួយកាសែត អង់គ្លេស The Guardian។ Edward Snowdenដែលបានទទួលស្គាល់ថា គេជាអ្នកបញ្ចេញឯកសារសម្ងាត់របស់ទីភ្នាក់ងារសន្តិសុខជាតិអាមេរិក ទៅឲ្យអ្នកកាសែត បានធ្វើឲ្យពិភពក្រុមអ្នកស៊ើបការណ៍សម្ងាត់ភ្ញាក់ផ្អើលយ៉ាងខ្លាំង។
តើយុវជនSnowden ជាអ្នកណា? ហើយតើមានអ្វីដែលជំរុញឲ្យយុវជនអាមេរិកាំងរូបនេះ ចេញមុខប្រឆាំងនឹងរដ្ឋាភិបាលរបស់ខ្លួន ហើយ រត់ទៅជ្រកកោន នៅទីក្រុងហុងកុង ដែលទឹកដីរបស់ប្រទេសចិន សត្រូវរបស់អាមេរិក?
Edward Snowdenកើតនៅរដ្ឋNorth Caroline បានធំដឹងក្តីនៅរដ្ឋMaryland នៅជិតFort Meade ដែលជាទីតាំងរបស់ទីស្នាក់ការកណ្តាលរបស់ទីភ្នាក់ងារសន្តិសុខជាតិNSA ដែលជាក្បាលម៉ាស៊ីនស្រង់ទិន្ន័យទូរស័ព្ទរបស់ប្រជាជនអាមេរិកាំង។ Snowdenមិនដែលបានបញ្ចប់ការសិក្សាថ្នាក់ជាន់ខ្ពស់ណាមួយទេ។ គេបានបោះបង់ចោលការសិក្សានៅវិទ្យាល័យ នៅត្រឹមថ្នាក់ទី ១០។ Snowdenធ្លាប់បានប្រាប់ថៅកែក្រុមហ៊ុនថា គេបានបញ្ចប់ថ្នាក់កុំព្យូទ័រនិងទទួលបានសញ្ញាប័ត្រពីសកលវិទ្យាល័យMaryland ក្នុងទីក្រុងតូក្យូ។ លើសពីនេះទៀត Snowdenធ្លាប់បាននិយាយថា គេនឹងត្រូវទទួលសញ្ញាប័ត្រអនុបណ្ឌិត ពីសកលវិទ្យាល័យLiverpool ក្នុងប្រទេសអង់គ្លេស។ ប៉ុន្តែ រាល់សាលាដែលគេបានទាក់ទងសួររកប្រវត្តិរបស់ Snowden សុទ្ធតែបានបញ្ជាក់ថា គេគ្មានឈ្មោះ សិស្សEdward Snowden ឬ Snowdenមិនសូវបានរៀនពេញលេញ។
ចាប់ពីឆ្នាំ ២០០១ យុវជន Snowdenធ្លាប់ធ្វើការជាអ្នកបង្កើតវិបសៃតិ៍ ឲ្យក្រុមហ៊ុនអ៊ីនធ័រណេត មុននឹងចុះឈ្មោះ ចូលធ្វើជាទាហាន នៅឆ្នាំ ២០០៣។ ប៉ុន្តែ ដោយសារគ្រោះថ្នាក់របួសជើង នៅក្នុងពេលហ្វឹកហាត់ គេបានចាកចេញពីកងទ័ព និងត្រូវបានទីភ្នាក់ងារស៊ើបការណ៍សម្ងាត់CIA រើសចូលធ្វើជាអ្នកជំនួយការ ផ្នែកសន្តិសុខព័ត៌មានវិទ្យា។
បើទោះបីជាគ្មានសញ្ញាប័ត្រធំដំ ប៉ុន្តែ អ្នកជំនាញមួយចំនួនភ្ញាក់ផ្អើលដែលឃើញ Snowdenចេះតែឡើងឋានៈមិនឈប់។ ជាក់ស្តែង នៅឆ្នាំ ២០០៧ Snowden ធ្លាប់កាន់លិខិតឆ្លងដែនការទូត នៅពេលគេបំពេញបេសកកម្ម ក្នុងប្រទេសស្វីស។ មួយវិញទៀត គេឆ្ងល់ថា ហេតុអ្វីបានជាបុគ្គលិកមានឋានៈ តួនាទីតូចតាចដូច Snowdenអាចមានសិទ្ធិ និងលទ្ធភាពរហូត អាចចូលមើល និងថតចម្លងឯកសារសម្ងាត់របស់ទីភ្នាក់ងារសន្តិសុខជាតិNSA? រហូតមកដល់ពេលនេះ គេនៅមិនទាន់បានទទួលចម្លើយច្បាស់លាស់ ទៅនឹងសំណួរនេះនៅឡើយទេ ប៉ុន្តែ បើតាម អ្នកជំនាញខាងផ្នែកស៊ើបការណ៍សម្ងាត់ យុវជន Snowdenត្រូវបានទីភ្នាក់ងារស៊ើបការណ៍សម្ងាត់CIA រើសបញ្ចូលជាបុគ្គលិក នៅក្រោយអំពើភេរវកម្ម ឆ្នាំ ២០០១ គឺក្នុងដំណាក់កាលមួយ ដែលគេត្រូវការច្រើន ចំនួន អ្នកចេះដឹងខាងផ្នែកបច្ចេកទេសព័ត៌មានវិទ្យា ដើម្បីស្វែងរក និងកំណត់អត្តសញ្ញាណរបស់ក្រុមភេរវករ។
ចុងក្រោយនេះ Snowden បានធ្វើការឲ្យក្រុមហ៊ុនBooz Allen Hamilton ដែលជាក្រុមហ៊ុនម៉ៅការផ្នែកយោធា ឲ្យទីភ្នាក់ងារNSA។ ធ្លាប់បានប្រាប់ទៅថៅកែរបស់ខ្លួន គឺក្រុមហ៊ុនថា សុំសម្រាកព្យាបាលជម្ងឺស្កន់ ដែលគ្រូពេទ្យបានរកឃើញក្នុងកាលពីឆ្នាំ ២០១២។ គេបានប្រាប់មិត្តស្រីរបស់គេថា គេនឹងអវត្តមានមួយរយៈ ប៉ុន្តែ មិនបានប្រាប់ពីហេតុផលអ្វីទេ។ នៅថ្ងៃទី ២០ ឧសភា Edward Snowden បានទៅដល់ទីក្រុងហុងកុង និងបានទាក់ទងអ្នកយកព័ត៌មានរបស់កាសែត The Guardian។
តាមយុវជន Snowden គ្មានហេតុផលពិសេសណាមួយជំរុញឲ្យ គេបញ្ចេញសកម្មភាពនៅពេលនេះទេ។ គឺគ្រាន់តែនៅពេលនេះ គេមានការភ្ញាក់មនសិការ ដែលឃើញរាល់ប្រធានាធិបតីចេះតែនិយាយកុហក ដើម្បីបានអំណាច និងមិនគោរពការសន្យារបស់ខ្លួន។ ចាប់ពីឆ្នាំ ២០០៩ គឺពេលគេធ្វើការឲ្យទីភ្នាក់ងារNSA យុវជន Snowden ធ្លាប់បញ្ចេញមតិ នៅក្នុងវិបសៃត៍នានា ដែលបញ្ជាក់ពីការមិនសប្បាយចិត្តរបស់គេ ទាក់ទងនឹងសកម្មភាពរបស់ទីភ្នាក់ងារNSA។ ដោយដាក់ឈ្មោះក្លែងក្លាយ Snowdenធ្លាប់សរសេរបរិហារពីសកម្មភាពមិនត្រឹមត្រូវរបស់ទីភ្នាក់ងារដែលបានប្រើកម្មវិធី Prisme ស្រង់ តាមដាន និងលបស្តាប់ការសន្ទនារបស់ប្រជាជនអាមេរិកាំង។
Snowden បាននិយាយថាគេមិនបានបោះឆ្នោតឲ្យលោកអូបាម៉ាទេកាលពីឆ្នាំ២០០៨ប៉ុន្តែគេនិយាយថាគេជឿនៅតែជឿលើការសន្យារបស់លោកអូបាម៉ាដែលបើតាម Snowden គឺធ្លាប់គោរពនិងផ្តល់តម្លៃដល់ជីវិតឯកជនរបស់ប្រជាជនអាមេរិកាំង។ នៅពេលនេះ Snowden បានសម្រេចចេញមុខ ដើម្បីទាមទារឲ្យគេផ្តល់យុត្តិធម៌ដល់ជនរងគ្រោះ និងដាក់ទោសលើសកម្មភាពរបស់រដ្ឋាភិបាល ដែលរំលោភយ៉ាងធ្ងន់ធ្ងរទៅលើជីវិតឯកជនមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ