អេហ្ស៊ីបថ្កោលទោសអាមេរិកដែលផ្អាកព្យួរជំនួយយោធា
នៅទីបំផុត ទៅអាមេរិកបានសម្រេចផ្អាកជំនួយដល់រដ្ឋាភិបាលអេហ្ស៊ីប ដែលជាសម្ព័ន្ធមិត្តរបស់ខ្លួន នៅតំបន់ដើមបូព៌ា។ នៅល្ងាចថ្ងៃព្រហស្បតិ៍ទី១០ តុលា គឺនៅមួយថ្ងៃក្រោយការប្រកាសរបស់សេតវិមាន អ្នកនាំពាក្យរបស់ក្រសួងការបរទេសអេហ្ស៊ីបបានប្រតិកម្មរិះគន់ការសម្រេចចិត្តរបស់អាមេរិក និងគំរាមសើរើឡើងវិញសហប្រតិបត្តិការយោធារបស់អេហ្ស៊ីប ជាមួយអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥០
តាំងពីប្រទេសព្រុយណេ ជាទីដែលលោកចូលរួមក្នុងជំនួបកំពូលអាស៊ានប្រមុខការបរទេសអាមេរិក លោកJohn Kerryបានបញ្ជាក់ទៅភាគីអេហ្ស៊ីបថា ការផ្អាកជំនួយ មិនមែនមានន័យថា អាមេរិកនឹងដកខ្លួនពីមិត្តភាព ជាមួយអេហ្ស៊ីបទេ។ លោកJohn Kerryប្រញាប់ឆ្លើយបកស្រាយ ទៅរដ្ឋាភិបាលអេហ្ស៊ីប បន្ទាប់ពីអ្នកនាំពាក្យរបស់ក្រសួងការបរទេសអេហ្ស៊ីបបានមានប្រតិកម្មរិះគន់ខ្លាំងៗដល់អាមេរិកដែលប្រើលក្ខខណ្ឌជំនួយដើម្បីដាក់គំនាបលើរដ្ឋាភិបាលអេហ្ស៊ីប។
កាលពីថ្ងៃពុធ សេតវិមានបានប្រកាសផ្អាកព្យួរជំនួយយោធាដល់ទីក្រុងគែរ បន្ទាប់ពីកងទ័ពអេហ្ស៊ីប នៅបន្តបង្រ្កាបយ៉ាងហិង្សាលើក្រុមប្រឆាំង មកពីក្រុមភាតរអ៊ីស្លាម។ ជាក់ស្តែង អាមេរិកនឹងផ្អាកមិនបញ្ជូនឧទ្ធម្ភាគចក្រ មីស៊ីល និងគ្រឿងបន្លាស់សម្រាប់រថពាសដែកដែលតាមកិច្ចព្រមព្រៀងនឹងត្រូវបញ្ជូនទៅអេហ្សីប ក្នុងឆ្នាំ២០១៣។ អាមេរិកផ្អាកផងដែរ មិនបញ្ជូនថវិកាប្រមាណ ២៦០ លាន និងកម្ចី ៣០០ លានដល់រដ្ឋាភិបាលអេហ្ស៊ីប។
សូមបញ្ជាក់ថា អាមេរិកផ្តល់ជំនួយក្នុងមួយឆ្នាំៗ ១៣០០ លានដុល្លារដល់កងទ័ពអេហ្ស៊ីប។ ប៉ុន្តែ ចាប់តាំងពីកងទ័ពធ្វើរដ្ឋប្រហារទម្លាក់ និងចាប់ដាក់គុកប្រធានាធិបតី លោកម៉រស៊ី អាមេរិកដែលជាម្ចាស់ជំនួយយោធាដ៏ធំរបស់អេហ្ស៊ីប មានការរារែក និងទើសទាល់ តែមិនថ្កោលទោសសកម្មភាពរបស់យោធាអេហ្ស៊ីប។ រដ្ឋបាលលោកអូបាម៉ាថែមទាំងមិនបានប្រកាសចាត់ទុកសកម្មភាពរបស់កងទ័ពអេហ្ស៊ីបថា ជារដ្ឋប្រហារផង និងបានសុំពេលពិចារណាលើសំណុំរឿងអេហ្ស៊ីប។ ប៉ុន្មានខែក្រោយ គឺទើបតែ នៅថ្ងៃពុធ ដែលអាមេរិកបានសម្រេចចិត្ត ផ្អាកជំនួយរបស់ខ្លួន ប៉ុន្តែ បញ្ជាក់ថា នឹងមិនរហូតនោះទេ។ អាមេរិកនឹងផ្តល់ជំនួយឡើងវិញ ដល់អេហ្ស៊ីប នៅពេលណារដ្ឋាភិបាលថ្មីកើតមានចេញមកពីការបោះឆ្នោត ដោយសេរី និងយុត្តិធម៌។តាមអ្នកនាំពាក្យរបស់ សេតវិមានជំនួយដែលអាមេរិកផ្អាក គឺភាគច្រើន ជាជំនួយយោធា ប៉ុន្តែ អាមេរិក នៅបន្តជំនួយលើផ្នែកសុខភាព សេដ្ឋកិច្ច និងអប់រំ។ ជាមួយគ្នានេះអាមេរិក នៅបន្តជួយកម្មវិធីប្រយុទ្ធប្រឆាំងនឹងពួកអ៊ីស្លាមជ្រុលនិយម នៅតំបន់ ស៊ីណៃ កម្មវិធីត្រួតពិនិត្យតាមព្រំដែនអេហ្ស៊ីប ជាមួយតំបន់ហ្គាហ្សា និងជាមួយព្រំដែនអ៊ីស្រាអែល។
ភាគីអេហ្ស៊ីបបានចាត់ទុកការសម្រេចចិត្តរបស់អាមេរិកថា ធ្វើឡើងដោយមិនត្រឹមត្រូវ។ តាមអ្នកនាំពាក្យក្រសួងការបរទេសអេហ្ស៊ីប អេហ្ស៊ីបនឹងមិនចុះចាញ់នឹងការដាក់សម្ពាធរបស់អាមេរិក ហើយនិងនៅតែបន្តនយោបាយបែបប្រជាធិបតេយ្យរបស់ខ្លួនដូចមុន។ មន្រ្តីនាំពាក្យរបស់ក្រសួងការបរទេសអេហ្ស៊ីបបញ្ជាក់ដែរថា រដ្ឋាភិបាលអេហ្ស៊ីបអាចនឹងសើរើទំនាក់ទំនង របស់ខ្លួនជាមួយអាមេរិកដែរ។ នៅក្នុងនោះ អេហ្ស៊ីបអាចនឹងពិនិត្យសើរើមើលមូលដ្ឋានទ័ពរបស់ខ្លួន ដែលអាមេរិកបានប្រើក្នុង កន្លងមក ក្នុងសម័យសង្រ្គាម នៅអ៊ីរ៉ាក់។ តាមអ្នកជំនាញយោធាអេហ្ស៊ីបជំនួយយោធារបស់អាមេរិកមានជាប់ទាក់ទង នឹងកិច្ចព្រមព្រៀងសន្តិភាព ជាមួយអ៊ីស្រាអែល។ កិច្ចព្រមព្រៀងដែលអេហ្ស៊ីបជាប្រទេសតែមួយគត់ នៅតំបន់ដើមបូព៌ាបានចុះជាមួយអ៊ីស្រាអែល។ ដូច្នេះ ផ្អាកជំនួយ គឺដូចជា ធ្វើឲ្យអេហ្ស៊ីបសើរើ លើកិច្ចព្រមព្រៀងសន្តិភាព ជាមួយអ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ